O prezo das importacións disparouse cinco puntos por riba do das exportacións

As importacións (34,8%) galegas medraron máis en 2022 que as exportacións (18,3%), mais non só en cifras totais, senón tamén no seu prezo. Así o certifican os datos publicados esta segunda feira polo Instituto Galego de Estatística (IGE), que sinalan que os bens chegados a Galiza desde o exterior [sen ter en conta os provenientes do resto do Estado español] incrementaron o seu valor 19,5% no ano 2022, mentres que os bens vendidos desde a Galiza a fóra do Estado encareceron 14,9%. Saldo exterior 2022: a Galiza exporta máis produtos, pero as importacións medran o dobre Por destino económico, produciuse unha suba en 2022 con respecto ao ano anterior de 11,5% nos prezos das exportacións de bens de consumo [produtos finais listos para a venda]. Os prezos dos bens intermedios [bens parcialmente acabados utilizados como insumos na produción doutros bens] aumentaron 21,6% en 2022 e os prezos dos bens de capital [aqueles que se empregar para producir outros bens] subiron 13,8%. Nas importacións, os prezos dos bens de consumo aumentaron 16,3% o ano pasado con respecto a 2021. Os prezos dos bens intermedios experimentaron un aumento de 22,8% e os bens de capital abaratáronse 4,9%. Neste sentido, as importacións relacionadas coa enerxía e o consumo alimentario son as que computaron o maior incremento no ano 2022. A diferenza entre o aumento do custo das importacións e o das exportacións acentúase ao ter en conta os datos interanuais de fechamento do ano. Así, o aumento dos bens chegados a Galiza desde o exterior aumentou en decembro de 2022 con respecto ao mesmo mes de 2021 en 17,5%, mentres que as vendas de bens desde a Galiza ao resto do mundo tan só o fixeron en 9,7%. Por destino xeográfico, en 2022 produciuse un aumento interanual de 16% nos prezos dos bens exportados aos Estados da zona do euro e un aumento de 16,2% nos das exportacións á Unión Europea (UE). Os prezos das exportacións aos Estados pertencentes á Organización para a Cooperación e o Desenvolvemento Económico (OCDE), coñecida como "o club dos Estados ricos", aumentaron en decembro 14,6% e os dos bens con destino ao resto do mundo incrementáronse 17,2%. Por orixe dos bens importados, os prezos dos bens procedentes de Estados pertencentes á zona euro aumentaron 8,8% en termos interanuais. Os prezos das importacións procedentes da UE incrementáronse 9,6%, os prezos dos bens chegados de Estados da OCDE subiron 16,2% e os custos dos bens importados procedentes do resto do mundo encareceron até en 26,6%. "A Galiza está importando a inflación", explica Dios Adrián Dios, profesor de Historia Económica na Universidade de Santiago de Compostela (USC), explica a Nós Diario que o efecto "máis inmediato" da diferenza no aumento de custos entre as vendas e as compras da Galiza ao exterior é que "estamos importando a inflación". O encarecemento das importacións inflúe de forma directa nunha maior inflación "Os prezos na Galiza medran non necesariamente por influencia dos produtos galegos senón porque os produtos que mercamos de fóra son máis caros", sinala o profesor da USC. "Isto prodúcese pola necesidade de importar produtos enerxéticos como o petróleo ou o gas, que son os que máis encareceron en 2022", acrecenta Dios. Por que no súper todo está tan caro? Ademais, afirma, "hai outro efecto, a balanza comercial empeora, pois estamos exportando ao exterior produtos cada vez máis caros, pero que medran máis a modo do que o fan aqueles bens que necesitamos do exterior". "Cada vez precisamos máis cartos para comprar cousas de fóra, cando non conseguimos tantos cartos polo que vendemos ao resto do mundo", conclúe o profesor da USC. A diferenza entre a evolución dos prezos das importacións e das exportacións galegas é especialmente preocupante no sector primario. O custo dos bens que chegaron a Galiza desde o exterior en 2022 no ámbito da agricultura, a gandaría, a silvicultura e a pesca aumentou 16,6%, mentres que as vendas ao resto do mundo abaratáronse 10,1%. Derrube dos prezos de venda do sector primario O economista e analista Marcelino Fernández Mallo, explica a este xornal que "a Galiza é absolutamente dependente dos produtos agrarios, importámolo todo, precisamente nun dos conxuntos de bens cun maior déficit na evolución dos custos entre compras e as vendas ao exterior". A falta de cultivos é unha das causas principais da evolución da economía galega "A falta de cultivos no país é case sempre unha das causas principais da evolución das variábeis económicas da Galiza", afirma o economista. "Sempre é un condicionante, o que pasa que non se menciona nunca", acrecenta. Ademais, Fernández Mallo sobre as cifras xerais, sinala que "a súa influencia sobre o valor engadido bruto na Galiza é negativa". A depreciación do euro influíu no saldo comercial O economista Joám J. Romero Durán, en declaracións a Nós Diario, explica que o maior encarecemento das transaccións cos Estados que non pertencen á UE vén en parte derivado da depreciación do euro. Paridade euro-dólar "Entre decembro de 2021 e decembro de 2022 o euro experimentou unha caída de case 6%. A cuestión é saber canto pondera o factor de cambio de moeda e canto provén dun problema estrutural de fondo", sinala. "A maior variación do valor das importacións de bens intermedios que das exportacións podería ser indicativo do proceso de deslocalización da industria auxiliar do automóbil da comarca de Vigo para o norte de Portugal ou mesmo para o norte de Marrocos", acrecenta Romero Durán. "Os produtos encarecen" Pola súa parte, a economista Rosa Regueira, en conversa con este xornal, engade que as consecuencias do maior incremento do prezo das importacións é que "os produtos encarecen para as persoas usuarias finais". "A suba de prezos derivada da alza dos alimentos e das materias primas e produtos enerxéticos trasládase a toda a cadea de compra e fai que encareza máis", sinala. "Hai elementos que tiveron unha influencia determinante no aumento dos custos das importacións galegas, como é o caso dos combustíbeis", conclúe.