Pequenos produtores ven "en risco" os seus negocios ante as novas normas: "Parece que hai interese en que esteamos na ilegalidade"

O vindeiro 1 de xaneiro entrarán en vigor a obrigatoriedade da factura electrónica e o novo regulamento europeo relativo a envases, etiquetados e residuos. Miles de pequenas e medianas empresas ultiman xa o software e as medidas precisas para estaren ao día na aplicación da normativa. Esta terza feira representantes das pequenas produtoras e das cooperativas agrarias galegas denunciaron en rolda de prensa a súa “preocupación” ante unha normativa que “pon en risco” o futuro dos seus proxectos emprendedores, maioritariamente no rural galego. O director xerente da Asociación Galega de Cooperativas Agrarias (Agaca), con máis de 34.000 persoas socias e case 200 cooperativas agroalimentarias adheridas, Hixinio Mougán, criticaba esta terza feira “as dificultades” que as novas normativas supoñen para as e os pequenos produtores do país. "Parece que hai interese en que esteamos na ilegalidade. Non é forma de tratar os pequenos produtores”, afeou. As asociacións Slow Food Compostela, a Asociación Galega de Operadoras Artesanais de Alimentación e Pensos (Agoaap), a Asociación de Produtoras e Produtores de Ecolóxico de Galiza (Proecogal) e mais a propia Agaca uniron as súas forzas para demandar “unha aplicación gradual e adaptada das novas normativas, con períodos de transición realistas”. "Moitos non temos o software, nin coñecementos para usalo, nin unha conexión estábel a internet", lamenta Mougán Hixinio Mougán, acompañado de Leonor Lorenzo, presidenta de Slow Food Compostela, e de José Carlos Brea, presidente de Agoaap, alertou esta terza feira das múltiples dificultades para os negocios que implicará a entrada en vigor en 2026 do sistema VeriFactu de facturación dixital, que invalidará as facturas actuais emitidas en formatos Word e Excel. Unha normativa que, sinalaron, “non é clara” e supón unha “carga extra de burocracia” para os pequenos produtores agrarios do país que podería provocar “o feche” de moitos destes pequenos proxectos emprendedores. A partir do 1 de xaneiro Facenda quere, con ese novo sistema de facturación, ter ao momento as facturas que emiten estas empresas a través dun único sistema de facturación cun código de verificación QR. Haberá sancións de até 50.000 euros polo uso de sistemas non homologados. "Moitos nin temos o software, nin coñecementos para usalo, nin sequera cobertura de internet estábel para asegurar que a factura chega ao momento ao Ministerio de Facenda”, dixo Mougán. "Non nos dan os números" José Carlos Brea ademais de presidenre de Agoaap é un deses pequenos produtores no rural, coa cervexa artesanal Toupiña (Lalín, O Deza). “A normativa está moi ben, pero é para grandes empresas. 98% dos nosos asociados vivimos en aldeas do rural e grazas a estas normativas acabamos empregado entre 40 e 50% do noso tempo en burocracia”, cuestionou. "Os pequenos produtores galegos producimos, recollemos, transformamos, administramos e vendemos os nosos produtos”, dixo, e asegurou que coa dimensión destes proxectos “non dan os números para contratar administrativos que fagan toda esta burocracia, así que ou subimos os prezos aos consumidores ou fechamos”. A maiores, no rural galego, onde se sitúan a maioría destes proxectos empresariais, “nin sequera temos cobertura de internet de calidade para garantir poder cumprir coa normativa”, afirmou Brea. "Se agora temos que contratar administrativos para a burocracia, ou subimos os prezos, ou fechamos", di Brea Leonor Lorenzo, de Slow Food Compostela, sumouse ao “malestar” dos pequenos produtores: "Intentamos ofrecer formación aos asociados para implementaren a facturación electrónica, e nin sequera os relatores eran quen de resolver as dúbidas”. Diante desta situación e da inminente entrada en vigor da normativa, asegurou que “moitos abandonan porque así non poden seguir producindo”. E á burocracia da nova factura electrónica engaden os efectos do Real Decreto 1055/2022 de envases e residuos –xa en vigor–, que recoñecen que a maioría dos pequenos produtores galegos “non estamos a cumprir porque nin podemos nin sabemos como”, admitiu Mougán. Unha normativa que “provoca aos produtores a intranquilidade de vivir sempre no límite da legalidade”. Unha cobertura "deficiente" Pórse ao día e aplicar a nova normativa require os servizos de empresas como a de Bernardo Vázquez, Infor-B, unha compañía de solucións de software emprazada en Betanzos (As Mariñas) que prepara o novo sistema de facturación electrónica para produtores como a firma Bico de Xeado. "Os requisitos da normativa están por pulir, están facendo cambios e iso afecta todo o modelo de software”, advirte este informático. No caso dos produtores máis pequenos explica que "o primeiro hándicap son as infraestruturas de comunicación", ademais da “falta de formación” a respecto do novo procedemento nestes momentos, a falta de pouco máis de dous meses para a súa aplicación. A experiencia práctica neste senso achégaa o produtor de cervexa artesanal José Carlos Brea. "No último temporal estiven dous meses sen internet”, asegura. Demandan os pequenos produtores das administracións “que primeiro nos dean as ferramentas e os servizos”, porque impondo normativas como a nova factura electrónica “están a marearnos, é coma se che dan un coche sen rodas para andar na neve”, lamenta Brea. Autónomos reclaman "diálogo" para as novas cotas Pequenos autónomos do rural galego valoran positivamente o feito de que o Goberno español recuase esta semana a respecto da suba anunciada das cotas aos profesionais por conta allea. José Carlos Brea é un dos afectados e sinala en declaracións a Nós Diario que “teñen que mudar as tornas, primeiro que conten co sector para modificar o que sexa e así non fará falta recuar”. Brea aposta por estabelecer “mesas de traballo” entre as administracións e o sector “que serán máis produtivas que andar perdendo o tempo con 47 borradores dunha mesma lexislación”. "O lóxico", di, "é consensuar” os importes de cotización cun sector que “nunca puxo 'peros' a pagar impostos”, pero ao tempo pide unha estratexia que permita que “ao final non acabemos pagando sempre os máis pequenos e repercutindo os custos nos consumidores”. O novo plan presentado polo Ministerio de Facenda mantén conxeladas as cotas para os profesionais con rendas máis baixas, mais prevé un incremento progresivo nas achegas das rendas medias e altas, que oscilará entre 1% e 2,5%, segundo o tramo de ingresos. Na práctica, a suba nas cotas que están por riba dos 1.116,7 euros de rendementos ao mes situaríase entre 2,9 e 14,75 euros máis ao mes.