As organizacións agrarias critican o "desentendemento" da Xunta ante o problema da seca

O sector agrario galego amósase preocupado, outro ano máis, pola situación de seca que podería darse nos vindeiros meses se non chove no país e das derivadas que ten a situación agora mesmo noutros territorios polo encarecemento de forraxes. Neste sentido, Unións Agrarias (UUAA) e o Sindicato Labrego Galego (SLG) non tiveron máis noticias do grupo de traballo anunciado pola Consellaría de Medio Rural nunha xuntanza con eles o pasado 15 de maio para tratar “con urxencia” este tema. A gandaría galega só recibirá 25% das axudas da seca por parte do Goberno español A secretaria xeral do SLG, Isabel Vilalba, cre que é “fundamental” tratar a situación, como xa demandara a finais do verán pasado cando evidenciaron desde o sindicato que houbo perdas xeneralizadas en froitas, malas colleitas e con máis podremia en tubérculos, unha deterioración visual de tamaño en xudías e en moitas das verduras que se producen, ademais de problemas cos pastos e a ensilaxe. “Daquela a Consellaría indicounos que estaban traballando nun plan estratéxico para a horta, igual que na carne e no leite, mais non volvemos saber nada”, sinala a Nós Diario. Tampouco consideran desde o SLG que o Real Decreto Lei aprobado polo Goberno español a principios de maio con medidas fronte á seca solucione o problema. “Non se corresponde coa realidade dos nosos sectores, como no caso da apicultura onde só dúas persoas poderán acceder ás axudas na Galiza”, relata Vilalba, “despois trataba homoxeneamente todo o territorio galego cando sabemos que hai zonas como Ourense onde a incidencia da seca é moi importante”, engade. Os encoros galegos continúan á metade da súa capacidade a pesar das chuvias Sobre o tratamento da auga como recurso, este mesmo sindicato ten denunciado na Galiza, como indica a súa máxima responsábel, “o proxecto lexislativo que está no portal de transparencia onde se lle dá prioridade a grandes proxectos que teñen unha pegada hídrica moi importante como son os mineiros extractivos ou enerxéticos”. Estratexia "pouco intelixente" da Xunta Desde UUAA, o seu responsábel de producións extensivas, Xosé Ramón González, emprega un exemplo futbolístico para definir a última reunión que tiveron co conselleiro de Medio Rural, José González, e asegura a Nós Diario que foi “unha patada para adiante, desentendéndose do problema e sen concretar nada”, unha estratexia que considera “pouco intelixente”. Nesta organización, con todo, consideran que “todo dependerá da chuvia das vindeiras semanas” que podería facer que o problema “sexa menor”. González cre que “non nos podemos estar queixando sempre por todo, malia que temos constancia de que no sur de Ourense comeza a sentirse a falta de auga”. Aliás, pon sobre a mesa as consecuencias “indirectas” que teñen sectores como o do gando: “pola falta de cereal aumentará o prezo dos pensos e terá repercusión nos custos de produción”. A vendima de 2022 fecha como a segunda máis abundante dos últimos 10 anos, mais afectada pola seca Eucaliptización e modelos foráneos Desde a Federación Rural Galega (Fruga) alertan doutros elementos que agravan a situación de seca na Galiza: a proliferación de especies vexetais que precisan de moita auga e a entrada no país de novos modelos foráneos de agricultura extensiva. O seu responsábel de sectores vexetais, Gabriel Lopes, asegura, en declaracións a Nós Diario, que “este ano teremos o mesmo problema de falta de auga que o pasado ou peor, o nivel dos acuíferos está agora mesmo máis baixo”. Para este agricultor, a razón de que isto aconteza non só é consecuencia “da baixa pluviosidade, senón pola forte eucaliptización que padecemos na Galiza”. Lembra que os eucaliptos son unha especie que “precisa grandes cantidades de auga, uns 15.000 litros de auga por hectárea, e prexudican os acuíferos e mesmo as traídas de auga”. Por este motivo considera que a presenza destas especies “é incompatíbel co mantemento da produción de alimentos das hortas” e denuncia que “a Administración galega está apostando máis pola produción forestal”. Para Gabriel Lopes, as axudas non solucionan o problema social. “Podemos recibilas para chegar a fin de mes, mais a xente que come?”, pregúntase. Apunta a unha “desertización” que agranda coa chegada en busca de auga de “agroindustrias de territorios con máis problemas de seca ca nós”. Neste sentido, pon como exemplos as grandes empresas que traballan cos froitos vermellos e de viñedos. Neste último caso, sinala Lopes, son modelos latifundiarios que abandonan zonas como A Rioxa en busca de auga”. A seca prolongada continúa en toda a demarcación Galiza-Costa No sector do viñedo tamén están preocupados polas consecuencias da seca. Para o presidente da Asociación Galega de Viticultura (AGV Fruga), Roberto Rivas, o problema que tiveron cando baixou a produción polo inferior peso das uvas o ano pasado podería repetirse. “Este verán pode ser duro, a maior parte dos viticultores non temos regadío por estar en explotacións de pequenas dimensións”, asegura a Nós Diario. Fontes de Medio Rural consultadas por este xornal aseguran que “a Xunta reunirá proximamente o grupo de traballo acordado con asociacións, sindicatos e organizacións agrarias para comezar a analizar sector por sector cales son os máis prexudicados pola seca, así como polo efecto na suba dos custos de produción”. O obxectivo sería “contar con toda información sobre a situación do sector primario, de cara a tomar as decisións pertinentes”, din.