venres 14/08/20

O novo dono de Vulcano aspira a crear un 'holding' naval en Vigo

O novo investidor conta con facturar máis de 8 millóns no primeiro ano, mais pide facilidades de financiamento da operación.
Acceso principal do estaleiro factorías Vulcano (Europa Press)
Acceso principal do estaleiro factorías Vulcano (Europa Press)

As instalacións de Factorías Vulcano na ría de Vigo teñen novo dono. Trátase de José Alberto Barreras, quen, a través da firma Marina Meridional, foi o único que presentou oferta por uns terreos nos que agora quere levantar talleres de calderaría.

Mentres resolve a cuestión do pago, 7,85 millóns que descarta aboar "de inmediato", como lle exixe a Administración concursal, Barreras vai desvelando as súas intencións, que pasan por crear un novo holding naval en Vigo orientado á construción, reparación, mantemento e acondicionamento de buques. 

A súa proposta contempla destinar os estaleiros a atender buques comerciais, pesqueiros, supply, remolcadores, pontonas, ferris de pasaxe e grandes iates. Tamén remarca que desenvolverá acordos e ofrecerá servizos a empresas locais relacionadas con metalmecánica e composites avanzados.

Segundo as súas previsións, o holding facturará máis de 8 millóns de euros desde o primeiro ano e xerará 70 empregos directos e 300 indirectos. Ademais, conta con acadar entre 85 e 100 postos de traballo directos entre os anos 2022 e 2023. Así, o documento estima que, após a consolidación do proxecto, dará servizo a entre 20 e 25 buques ao ano, o que permitirá manter 100 empregos no estaleiro e xerar outros 700 de modo indirecto. Tamén asegura que priorizará os empregados de Vulcano no proceso de selección de persoal.

Pendente da concesión

Pero para iso Barreiras quere despexar a cuestión da concesión dos terreos portuarios,  necesaria para garantir a viabilidade do seu proxecto de "alta calderaría". Será o ditame do Consello de Estado o que determine se os terreos de Vulcano deben reverter no Porto de Vigo, dada a situación do estaleiro ou se se mantén o prazo da concesión, que expira en 2027.

"O maior obstáculo é a postura firme de López Veiga", sinalou, ao tempo que afirmou que non venderá a sociedade nin especulará cos terreos se se lle adxudican. Así, o neto do fundador do estaleiro Hijos de J. Barreras e accionista de Vulcano (con 6%) confía en que a Administración concursal que leva o proceso de liquidación de Vulcano lle outorgue de prazo até setembro para aboar créditos contra a masa e estabelecer conversacións coa Xunta e o Goberno español até ese momento.

comentarios