Medran 38% os concursos de persoas sen vínculo empresarial

Os concursos presentados nos xulgados do Mercantil da Galiza mantiveron no terceiro trimestre deste mesmo ano a súa tendencia á alza. En concreto, interpuxéronse 495, fronte aos 379 do mesmo período de 2023, o que indica que se realizaron 30,6 % máis, segundo informa o Tribunal Superior de Xustiza da Galiza (TSXG).

Ademais, os concursos de persoas naturais sen actividade empresarial aumentaron 38,3 %, despois de que se presentaran 412 e, entre xullo e setembro de 2023, 298, mentres que os de persoas xurídicas -empresas- incrementaron 1,5 %, pois sumaron 67; e, os de persoas naturais empresarias foron 16, un 6,7 % máis. 

Ademais, os 448 concursos declarados no país no mesmo período supuxeron un incremento de 77,1 % respecto ao mesmo período do ano anterior. No mesmo trimestre chegaron á fase de convenio un total de dous concursos, 75 % menos que entre os meses de xullo e setembro de 2023, mentres que iniciaron a fase de liquidación 57, é dicir, foron 10,9 % menos.

O organismo xudicial aclara que desde a entrada en vigor da Lei Orgánica 7/2023, do 27 de xullo, os concursos de persoas naturais non empresarias, que se coñecían polos xulgados de Primeira Instancia e Primeira Instancia e Instrución, pasaron a ser competencia dos xulgados do Mercantil. Por iso, realízase unha análise destes procedementos polo tipo de persoa á que afectan e non polo órgano que os coñece. 

Despedimentos

Por último, o TSXG apunta que no mesmo período rexistráronse nos xulgados do Social 1.498 demandas por despedimento, cifra que mostra un aumento de 16,7 % respecto ás presentadas o ano anterior.

O número de demandas por reclamacións de cantidade interpostas nos xulgados do Social, 1.972, foi 1,4 % inferior ao rexistrado no mesmo período de 2023.