Máis da metade dos fogares chegan a fin de mes con dificultade ou moita dificultade

Até 54% dos fogares galegos sinalaron que experimentaron dificultade (46,2%) ou moita dificultade (7,7%) para chegar a fin de mes no primeiro trimestre de 2023, segundo a Enquisa conxuntural a fogares, publicada esta segunda feira polo Instituto Galego de Estatística (IGE). Ademais, a porcentaxe de fogares que chegaron con moita dificultade a final do mes aumentou en 1,44 puntos porcentuais con respecto ao trimestre anterior. As pensións de xubilación máis baixas do Estado percíbense na Galiza Por outra parte, na comparanza co mesmo trimestre do ano 2022, a porcentaxe de fogares que chegou con facilidade ou moita facilidade a fin de mes diminuíu 2,89 puntos porcentuais, mentres que a taxa dos que tiveron dificultade para completar o mes aumentou 1,92 puntos porcentuais e a dos que teñen moita dificultade medrou 0,97 puntos porcentuais. A pesar do aumento interanual xeneralizado das dificultades para chegar a fin de mes e da suba intertrimestral dos fogares que experimentan moitas dificultades, a porcentaxe de moradas que chegaron con facilidade ou moita facilidade a fin de mes experimentou unha repunta de 0,64 puntos porcentuais no último trimestre. As crecentes complicacións das economías familiares para completar o mes durante o último ano implicaron que até 26,95% dos fogares galegos non se permitira ningún extra nos tres últimos meses. Segundo sinala o IGE, "considéranse como extra os gastos destinados a vacacións ou viaxes, facer fronte a imprevistos ou grandes compras, extras de alimentación, roupa ou calzado, contratar novos servizos para o fogar, saír a cear, ir ao cine, etc". Ademais, "tamén se inclúe nesta categoría poder aforrar e traballar menos horas ou que algún membro do fogar se permita deixar de traballar". Por outra parte, 31,13% dos fogares galegos cambiou os seus hábitos de compra mercando marcas brancas e produtos en oferta no primeiro trimestre de 2023. Esta foi a medida económica máis habitual empregada polos fogares para reducir os gastos, aumentar os ingresos ou afrontar pagos neste período. Ademais, 27,06% das moradas do país diminuíu outros gastos comúns, como roupa e calzado, transporte, gas, electricidade, sen ter en conta a alimentación. Influencia das hipotecas sobre o empobrecemento O Consello de Goberno do Banco Central Europeo (BCE) acordou o pasado mes elevar novamente os tipos de xuro en 0,5%, tal e como anticipara xa a comezos de ano, de forma que o prezo do diñeiro para as operacións de refinanciamento ficou en 3,5%. 17,61% dos fogares galegos están pagando a vivenda que habitan A agresiva política monetaria do BCE provocou que o Euribor a 12 meses, o índice de referencia para a maioría das hipotecas na Galiza, fechase nunha taxa media de 3,647% no mes de marzo, a súa décimo quinta suba consecutiva e o seu valor máis alto desde finais de 2008. O aumento dos custos de pagamento das cotas hipotecarias ten unha importante influencia sobre o empobrecemento no país, posto que 17,61% dos fogares galegos está pagando a vivenda principal na que habitan, 8,66% o vehículo e 1,86% unha segunda vivenda. Con respecto ao mesmo trimestre de 2022, aumentou 1,75 puntos porcentuais a taxa de fogares que están a pagar a vivenda habitual. A pobreza na Galiza ten cara de muller traballadora Segundo as estimacións da Asociación de Usuarios Financeiros (Asufin), a alza de marzo traducirase nunha suba de 197,66 euros na cota mensual por cada 100.000 euros de préstamo. Neste sentido, unha persoa que teña contratada unha hipoteca variábel a 30 anos de 150.000 euros e cun diferencial de 0,99% máis Euribor sufrirá un aumento da súa cota hipotecaria de arredor de 300 euros. En termos absolutos, isto significa que pasará de pagar 465 euros a 772 por mes, o que equivale a un desembolso anual adicional de máis de 3.675 euros. Coas mesmas condicións, unha hipoteca de 300.000 euros de capital pendente de amortizar e 30 anos por diante de pagamento tería que asumir un encarecemento mensual de 612 euros, o que supón un incremento de máis de 7.351 euros ao ano adicionais. Cae a capacidade futura de aforro dos fogares galegos No primeiro trimestre de 2023, o indicador de confianza do consumidor (ICC) -que mide o grao de optimismo que as persoas consumidoras senten sobre o estado xeral da economía e sobre a súa situación financeira persoal- reflectiu un valor de -20,96 puntos, 3,57 puntos superior que o referido ao trimestre anterior. Non obstante, na comparanza co mesmo trimestre do ano anterior, a caída do índice foi de 0,96 puntos. 86% da poboación chega a fin de mes grazas aos aforros Os valores positivos do ICC (que varía de -100 a 100) amosarían optimismo. Porén, o valor negativo de -20,96 sinalou o pesimismo dos fogares galegos. Ademais, o indicador caeu en dous dos seus catro compoñentes durante o último ano. Desta maneira, a capacidade futura de aforro da cidadanía galega descendeu en máis de 10 puntos (-10,24), mentres que as perspectivas de evolución da situación económica na Galiza caeron en máis de 2,5 puntos (-2,58). Experimentaron unha repunta as perspectivas de evolución da situación financeira persoal (1,73 puntos) e do desemprego (7,24 puntos). O ICC varía en función do intervalo de ingresos do fogar. Os que teñen menores ingresos son os que presentaron valores máis baixos no índice, mentres que a confianza aumentou ao incrementárense os ingresos do fogar. Así, o indicador no caso dos fogares con menos de 600 euros ao mes situouse en -33,07, mentres que entre os que máis ingresan ao mes (por riba dos 3.000 euros) o indicador situouse en -1,13. Medra o número de familias con atraso no pagamento de facturas prioritarias As dificultades crecentes que experimentan os fogares galegos para chegar a fin de mes deixáronse ver no aumento da porcentaxe de fogares que tiveron algún atraso no pagamento de recibos de obrigado cumprimento (hipoteca ou aluguer da vivenda principal, préstamos, gas, auga ou electricidade) nos últimos tres meses, que chegou até a taxa de 3,84%, o que supuxo 0,71 puntos porcentuais que no trimestre anterior e 0,97 puntos porcentuais con respecto ao mesmo trimestre do ano anterior. As familias monoparentais son as que teñen máis dificultades No referente ao indicador de confianza do consumidor (ICC) por tipoloxía do fogar, as familias monoparentais son as que se atoparon nunha peor situación, cun índice de -30,41, case 10 puntos superior á media. As moradas galegas unipersoais tamén tiveron unha situación económica máis complicada que a nivel xeral, cun índice de -21,86. Pola súa parte, as parellas con crianzas (-17,89) e as parellas sen crianzas (-19,54) son as que gozan dunha mellor situación que a media. No caso dos fogares con outra situación (-21,58) experimentan un índice peor. As cifras do indicador de sentimento do consumidor (ISC) foron máis baixas que no caso do ICC. Desta forma, este índice foi de -34,74, case 14 puntos por baixo do que o indicador de confianza (-20,96). As familias monoparentais tamén foron neste caso as que amosaron unha peor situación (-40,30), máis de cinco puntos por baixo da media. O resto de tipoloxías de fogares situáronse por riba da cifra xeral, sendo as parellas con crianzas (-33,53) as que tiveron o mellor ISC, por riba dos fogares unipersoais (-34,12), das parellas sen crianzas (-34,22) e dos fogares noutra situación (-34,7).