As emisións de dióxido de carbono das centrais de carbón situadas na Galiza caeron 75,2% en 2019 con respecto ao ano anterior. Isto significa unha baixada de 10,1 a 2,5 millóns de toneladas, segundo informou nun comunicado enviado aos medios a plataforma 'Galiza, un futuro sen carbón'.
Estes datos fan que as emisións territoriais do país se situasen no nivel máis baixo desde, polo menos, 1990, "unha caída sen precedentes". Nomeadamente, a central das Pontes (Endesa) emitiu en 2019 2,3 millóns de toneladas fronte aos 7,9 millóns de 2018. E a de Meirama (Naturgy) 0,2, en 2019, por 2,2 millóns en 2018.
"Demostra que o peche das xa innecesarias centrais de carbón é, de lonxe, a mellor medida ao noso alcance hoxe para reducirmos drasticamente as emisións galegas de gases de efecto invernadoiro", consideran desde 'Galiza, un futuro sen carbón'.
As emisións de CO2 das centrais de carbón diminuíron o 7⃣5⃣,2⃣% en Galicia durante 2019!!
— Un Futuro sen Carbón (@galizasencarbon) April 29, 2020
Aínda así, a central de carbón de @Endesa nas Pontes volveu ser a industria galega con maior impacto climático. Até cando?#emerxenciaclimática#unfuturosencarbón
👉https://t.co/nHWonlzs20 pic.twitter.com/qHyrYQJvPH
A caída das emisións de CO2, segundo a plataforma, foi motivada pola diminución nun 71,6% da produción eléctrica con carbón. "A suba do prezo do CO2 no mercado europeo de emisións restou competitividade ao carbón fronte aos ciclos combinados a gas natural, menos intensivos en emisións de CO2", apuntan.
Ciclo combinado, non renovábeis
Porén, a caída na produción das centrais de carbón en 2019 "non foi compensada pola produción de máis electricidade renovábel", senón polo descenso no consumo e na exportación neta de electricidade e polo aumento da actividade das centrais de ciclo combinado a gas natural de Sabón (Naturgy) e das Pontes.
A diminución das emisións de CO2 das térmicas de carbón na Galiza foi paralela á rexistrada en toda a UE, aínda que superior tanto á media europea (-24,3%) como á estatal (-59,4%). Situación que contrasta ─ou que se explica─ coa elevada achega por habitante galego nos últimos anos.
Desde 'Galiza, un futuro sen carbón' din que a Xunta "teima en minusvalorar a emerxencia climática e en defender o carbón". Por iso, sinalan, "a Estratexia Galega de Cambio Climático e Enerxía 2050 (EGCCE) carece de ambición", argumentando que en 2019 ficou "amplamente superado" o seu obxectivo de recorte das emisións das centrais térmicas ─as de ciclo combinado e as de carbón─ para 2030, fixado en 54,3% a respecto de 1990. En 2019, a redución xa atinxiu o 72,2%.
Feche das Pontes
Ademais, a plataforma salienta que malia a baixada da súa actividade, a central das Pontes "volveu ser, con diferenza, a industria que máis contribúe á crise climática desde a nosa terra".
Neste sentido, critican que malia que Endesa manifestou a súa intención de pechar a fábrica no segundo semestre de 2021, "a Xunta, o Goberno estatal e o Parlamento galego presionan para que alongue máis a súa vida mediante a co-combustión de carbón e residuos orgánicos ao 50%".
