Os ingresos da hostalaría caeron preto dun 50% en 2020

A caída da actividade no sector servizos foi histórica en 2020 mais ningunha rama do mesmo sufriu tanto a crise como a hostalaría. Os datos divulgados esta semana polo Instituto Galego de Estatística (IGE) confirman unha baixada da facturación nos servizos dun 13,6% na Galiza. Malia que o comercio ten unha diminución no índice negocio de 15,6%, case catro puntos por riba da media estatal, a súa redución da facturación fica moi lonxe da hostalaría, situada en 47,9% para o conxunto do exercicio 2020 e cuns números que non resisten comparación con ningún outro sector da actividade económica. A hostalaría liderou a destrución de emprego en 2020. Mentres o desemprego na Galiza aumentou no último ano en 1,8%, unha cifra idéntica á do comercio, a hostalaría rexistrou unha caída da ocupación de 13,5%, unha porcentaxe superior en dúas décimas á media estatal. Esta alza do desemprego resulta máis preocupante polas condicións específicas do modelo de negocio hostaleiro galego, cun número maioritario de estabelecementos de propiedade familiar e cun réxime de explotación menos intensivo en man de obra. 3.400 locais menos Un informe de conxuntura turística elaborado pola Xunta da Galiza en relación co coronavirus recolle que en 2019 foron 3.200 os estabelecementos hostaleiros que permaneceron abertos, descendendo esta cifra a 2.300 en 2020, o que “supuxo unha caída de 32% na oferta dispoñíbel”. Na mesma liña, a Federación Galega de Industrias Inmobiliarias (Fgaim) sinalou a comezos de febreiro que 3.400 locais da hostalaría fecharon en 2020. A terceira onda da pandemia empeorou a situación. Precisamente, a Fgaim fixo público un novo informe a comezos desta semana en que advirte de que nos meses de decembro de 2020 e xaneiro de 2021 aproximadamente 300 novos locais hostaleiros deixaron de funcionar, concentrándose os cesamentos da actividade nos grandes núcleos urbanos e naquelas áreas onde predomina o réxime de alugueiro. Así, mantíñanse as tendencias de 2020, coas áreas de Compostela, A Coruña, Ferrol, Pontevedra e Vigo liderando a fin da actividade. O sector observa con preocupación a situación e amósase moi crítico coa resposta das administracións. O directivo de Hostalaría de Compostela e voceiro da Plataforma na Defensa da Hostalaría Galega, Lois Lopes, denuncia en declaracións a Nós Diario a “ausencia dun plan de rescate” para os pequenos negocios hostaleiros e a “insuficiencia das axudas”. “As administracións están centradas no rescate ás grandes cadeas, este non é un rescate para a hostalaría, senón para os grandes grupos empresariais”, sinala o hostaleiro, quen advirte de que “o Goberno do Estado nos seus programas non ten en conta as diferenzas entre a actividade hostaleira do sur peninsular e do levante coa do norte, e, en concreto, da realidade galega, moi diferente polo alto número de negocios”. Os problemas de débeda Lopes reclama “indemnizacións” para o sector e declárase desconforme coa xestión das axudas. “A Xunta fixou unha porcentaxe de perdas por negocio para acceder ás axudas moi elevado, até o punto de que aqueles estabelecementos que reduciron a súa facturación en 33% non poden acceder a elas”, afirma. Ao tempo, destaca que “aínda fican subvencións do primeiro plan que están sen pagar”, porén pon o foco “na necesidade doutros mecanismos de apoio porque os actuais están provocando un grave endebedamento que fan inviábeis os negocios”. O endebedamento preocupa moito a Elena Vitoria. A presidente da Asociación de Hostalaría de Pontevedra, Poio e Marín (Hoempo) declara a Nós Diario que se está a disparar. “Cada mes comeza con novos gastos e de pouco vale unha axuda puntual de 2.000 ou 4.000 euros se tes uns gastos fixos de 12.000. Cando remate a pandemia, non imos ser as mesmas empresas que eramos no mes de marzo do ano pasado, cada unha vai ter ás súas costas unha débeda brutal, polo que se precisa dun rescate e non só de liquidez”, di. “As axudas son unha perversión tal é como foron concibidas pola Xunta da Galiza, porque nós precisamos indemnizacións e un rescate”, engade Vitoria, quen lembra como as grandes cadeas hostaleiras remataron rescatadas polas administracións públicas. “Hai familias con poder para conseguir ser rescatadas, nós non temos esa forza pero temos detrás miles de negocios e o que nos toca é saír á rúa e seguir mobilizándonos”, afirma desde a cabeza da manifestación decorrida en Pontevedra. “Aos pequenos afúndennos” O portavoz da Plataforma de Hostaleiros e Autónomos de Ferrolterra, Serxio Perille, amósase moi crítico co réxime de axudas á hostalaría. Neste sentido explica que “só rescatan os grandes, pois a Xunta e o Goberno do Estado funcionan así. Aos pequenos afúndennos e aos grandes danlles todo feito”. Na mesma liña indica que “na comarca de Ferrol as axudas do Goberno galego non chegaron ao 20% dos hostaleiros que as solicitaron”. Perille critica os incumprimentos do Goberno local de Ferrol, “que no mes de novembro comprometeuse a non cobrarnos o recibo da auga, excepto a taxa de saneamento, mais a día de hoxe segue sen cumprir o acordo. Outro tanto sucede coas liñas de axuda aprobadas polo Pleno do concello o 25 de novembro e que aínda non están publicadas”. Ao tempo, evidencia a insuficiencia destas liñas e denuncia o acontecido “co primeiro programa de axudas do Concello de Ferrol do mes de maio, que nin a metade dos negocios chegaron a cobrar”. Os concellos están, tamén, no foco das demandas dos hostaleiros. Precisamente esta cuarta feira, a Federación Galega de Municipios e Provincias (Fegamp) achegou á Xunta da Galiza “as súas propostas para “mellorar o plan de seguridade” e manifestou a disposición dos “concellos a achegar todos os medios posíbeis para controlar o cumprimento de medidas Covid-19 na hostalaría”. A hostalaría mobilízase en toda Galiza A Plataforma na Defensa da Hostalaría Galega convocou na xornada de hoxe mobilizacións en máis de 20 localidades galegas. O novo colectivo, que agrupa máis de 3.000 empresas, manifestouse, en palabras do seu voceiro, Lois Lopes, “co obxectivo de visualizar a situación do sector” e de “ir preparando o camiño para a gran mobilización nacional do 13 de marzo en Santiago de Compostela”. As concentracións remataron coa lectura dun manifesto común onde fixeron pública “a gravísima situación na que está inmerso o sector da hostalaría, e que afecta todo o tecido empresarial das vilas: os propietarios dos negocios, os empregados, os provedores, o sector primario, pequenos propietarios dos baixos e todos os demais comercios”. As mobilizacións serviron para reclamar un plan de rescate para a hostalaría. Neste sentido, o manifesto deu conta de que “somos empresas intervidas polo Goberno, impídennos realizar a nosa actividade, legalmente desenvolvida, por iso exiximos un rescate sectorial e as indemnización ás que temos dereito porque así o marca a lei, que nos permitan manter vivos os nosos negocios e as nosas unidades familiares. E non falamos de pedir esmola, falamos de exixir o que nos corresponde polo feche gobernativo dos nosos centros de traballo, por impedirnos a actividade por unha razón de forza maior, a pandemia”. Os manifestantes dirixiron o groso das súas reclamacións ao Goberno español e á Xunta da Galiza. Así, ao Executivo estatal pídenlle, entre outras cuestións, “a exoneración da cota de autónomos mentres dure o fechamento ou as limitacións ao exercicio pleno da actividade”. Pola súa banda, do Goberno galego demandan “axudas directas para compensar as perdas ocasionadas polo fechamento, para autónomos e traballadores até chegar, cando menos, ao 70% da base de cotización”.