A inflación marca a súa maior suba desde maio de 2022 e alcanza unha taxa de 4,1%

O Índice de Prezos de Consumo (IPC) do Estado español subiu 0,6% en abril en relación ao mes anterior e elevou oito décimas porcentuais a súa taxa interanual, até 4,1%, volvendo así aos ascensos despois da baixada de máis de dous puntos porcentuais que experimentou en marzo, segundo os datos avanzados publicados esta sexta feira polo Instituto Nacional de Estatística (INE). Os prezos dos alimentos marcan na Galiza o seu segundo aumento récord consecutivo Á espera de coñecer o dato galego da inflación no mes de abril, que en marzo se situou unha décima porcentual por riba da taxa do conxunto do Estado español, o IPC estatal experimentou a maior suba na taxa interanual desde maio de 2022. O INE atribuíu o maior crecemento dos prezos ao encarecemento dos carburantes e a que o custo da factura da electricidade baixou menos en abril deste ano que no mesmo mes de 2022. Sen especificar taxas concretas, o instituto estatístico sinalou que os prezos dos alimentos, que levan meses crecendo a taxas de dous díxitos, aumentaron en abril deste ano menos do que o fixeran un ano antes. O ministro español de Agricultura, Pesca e Alimentación, Luis Planas, indicou que a baixada das materias primas ten que significar unha caída dos prezos dos alimentos, que é "o que sinala o INE cos datos avanzados". Algo no que coincidiu a vicepresidenta primeira do Executivo estatal e ministra de Asuntos Económicos, Nadia Calviño, que achacou o descenso da inflación subxacente "á desaceleración do prezo dos alimentos". Ademais, o Ministerio de Asuntos Económicos atribuíu a repunta do IPC de abril ao "efecto base" que supón comparar os datos cos de abril de 2022, mes no que se introduciu a bonificación de 20 céntimos aos carburantes e outras medidas para aliviar a escalada inflacionista. "Como previamos, a inflación xeral tivo unha repunta polo efecto base", sinalou Calviño. A pesar de que as subas de prezo que se están a experimentar supoñen un dobre incremento con respecto aos prezos de hai dous anos, ao facelo sobre a propia base dun momento no que xa comezara a crise inflacionista, o Executivo español destacou que o IPC interanual do mes de abril é "a metade" do rexistrado un ano antes e subliñou que as medidas que o Goberno adoptou o pasado decembro de 2022 "seguirán contribuíndo a amortecer a evolución da inflación". A inflación subxacente marca unha taxa de 6,6% O INE incorpora no avance de datos do IPC unha estimación da inflación subxacente (sen alimentos non elaborados nin produtos enerxéticos), que en abril baixou nove décimas porcentuais, até 6,6%, situándose 2,5 puntos por encima do IPC xeral, a súa menor fenda desde o pasado mes de decembro. En termos mensuais (abril sobre marzo), a inflación rexistrou un aumento de 0,6%, dúas décimas porcentuais máis do que subiu en marzo (0,4%) e oito por encima do dato de abril de 2022, cando o IPC mensual baixou nunha taxa de 0,2%. O INE publicará os datos definitivos da inflación de abril, incluídos os relativos á economía da Galiza, o próximo 12 de maio. A caída do consumo reflíctese sobre o IVE A recadación galega do IVE diminuíu 11,6% en 2022 ante a crise de prezos A caída do consumo derivada da crise inflacionista fíxose notar na recadación no Imposto sobre o Valor Engadido (IVE) durante o ano pasado. Desta maneira, na Galiza recadáronse máis de 1.787 millóns de euros do IVE en 2022, o que supón 11,6% menos que o exercicio anterior. Porén, segundo datos difundidos esta sexta feira polo Instituto Galego de Estatística (IGE), a Galiza ingresou 2.873 millóns de euros de impostos directos, o que supón 5,48% máis que en 2021. O Euribor xa acumula un ano en taxas positivas O Euribor marcou o seu récord desde 2008 ao chegar a 3,757% O Euribor a 12 meses, o índice de referencia para as hipotecas variábeis na Galiza, escalou a 3,757% na taxa mensual de abril, fronte ao índice de 3,647% de marzo, polo que segue en valores máximos desde novembro de 2008, cando alcanzara 4,424%. A media do Euribor en abril, ademais, supón que o índice hipotecario continuou coa tendencia alcista que comezou en xaneiro de 2022, cando se situaba aínda en terreo negativo, ao marcar unha taxa de -0,477%. O Banco de España prevé que o Euribor alcance unha taxa de 4,5% Con todo, foi en abril de 2022 cando o Euribor pasou a rexistrar taxas positivas, situándose en 0,013%, e desde entón non deixou de avanzar até alcanzar a media de 3,757% deste mes de abril, esporeado polas subas dos tipos de xuro que o Banco Central Europeo (BCE) veu aplicando desde xullo de 2022. Co índice hipotecario medio mensual de 3,757%, unha persoa que teña contratada unha hipoteca variábel a 30 anos de 150.000 euros cun diferencial de 0,99% máis Euribor sufrirá unha suba da cota hipotecaria de 300 euros. En termos absolutos, pasará de pagar 483 euros a 781 por mes, cun desembolso anual adicional de 3.570 euros. Coas mesmas condicións, unha hipoteca de 300.000 euros de capital pendente de amortizar e 30 anos por diante de pagamento tería que asumir un encarecemento mensual de 596 euros, o que supón ao redor de 7.158 euros ao ano adicionais. A crise provoca que as familias sigan freando as súas compras No primeiro trimestre do ano, o Produto Interior Bruto (PIB) do Estado español creceu 0,5%, unha décima máis que no trimestre anterior, mais non polo consumo. O dos fogares caeu 1,3%, catro décimas porcentuais menos que no trimestre anterior, e xa suma dous trimestres consecutivos de retrocesos, o que non sucedía desde que o segundo trimestre de 2020, recentemente chegada a pandemia. Por outra parte, en termos interanuais, a economía do Estado español creceu 3,8%. A UE esquiva a recesión No conxunto da Unión Europea (UE), o PIB rexistrou no primeiro trimestre de 2023 unha expansión de 0,3%, esquivando así o risco de recesión técnica, despois da contracción de 0,1% no cuarto trimestre de 2022. A UE asómase á recesión tras caer o PIB no último trimestre de 2022 Entre os Estados cuxos datos estaban dispoñíbeis na base de datos de Eurostat, o maior crecemento do PIB no primeiro trimestre do ano correspondeu a Portugal (1,6%), seguido do Estado español, Italia e Letonia (todos 0,5%). Por contra, rexistráronse descensos no caso de Irlanda (-2,7%), así como no de Austria (-0,3%). Pola súa parte, na zona euro o PIB creceu 0,1% no primeiro trimestre de 2023, na primeira contabilización con vinte Estados membros, despois da entrada de Croacia no grupo da moeda.