O índice galego de prezos industriais descendeu 8,5% en 12 meses pola influencia da enerxía

Os prezos industriais descenderon 8,5% en agosto na Galiza en comparación ao mesmo mes de 2022, segundo os datos que publicou esta segunda feira o Instituto Nacional de Estatística (INE), na que supón a segunda maior baixada na serie histórica, só superada pola caída de 8,8% de abril de 2020, en pleno inicio da crise da Covid. O descenso de agosto é inferior ao da media rexistrada no conxunto do Estado español durante o mesmo período, no que se produciu unha caída interanual de 10%, a máis pronunciada desde o inicio da serie (en 1976), segundo informou o INE. Os prezos industriais acumularon seis meses consecutivos de retrocesos interanuais, co último incremento computado en febreiro. Non obstante, a baixada do índice no mes de agosto rexistrouse a pesar da suba dos custos fabrís en termos mensuais (respecto a xullo) de 1,3%. ANÁLISE | 'Cara a un novo ciclo alcista da inflación', por Adrián Dios O Índice de Prezos Industriais (IPRI) diminuíu na Galiza en agosto debido principalmente á abrupta baixada interanual da enerxía (-27,5%). De feito, ao excluír a influencia da enerxía no IPRI, os prezos industriais subiron 2,3% en agosto con respecto ao mesmo mes do ano 2022. Así e todo, os prezos do sector enerxético experimentaron unha suba en termos mensuais, ao aumentar 4,3% na comparanza con respecto ao mes de xullo. Alén da enerxía, os bens intermedios (aqueles empregados na fabricación doutros bens) tamén experimentaron un descenso interanual do seu custo, neste caso de 3,6%. Pola súa parte, os bens de equipo (os bens fixos que precisan posuír as empresas para a fabricación doutros bens), experimentaron un aumento de prezo de 1,3% no período. Máis acusado foi o incremento rexistrado polos bens de consumo (aqueles bens que xa están preparados para ser vendidos ás persoas usuarias finais), de 8,5%. Entre estes, os bens de consumo duradeiro incrementaron o seu prezo 2,5%, mentres que os bens de consumo non duradeiro fixérono en 8,7%. 44 meses sen rebaixas dos bens de consumo A caída dos prezos industriais, aínda que pode implicar unha caída das cifras de negocio do sector fabril, supón un incremento da competitividade das empresas. Porén, o feito de que as caídas no sector enerxético non se trasladasen a outros sectores como o dos bens de equipo e os bens de consumo provocou que este efecto sexa residual. O elevado prezo dos alimentos fai repuntar a inflación na Galiza, que sobe máis que no Estado Ademais, un dos tipos de bens que máis afectan as economías domésticas, como son os bens de consumo, acumularon un total de 44 meses (tres anos e oito meses), desde decembro de 2019, sen experimentar unha rebaixa interanual do IPRI na Galiza. De feito, na evolución mensual, os prezos dos bens de consumo no país sumaron máis de dous anos, desde xullo de 2021, sen anotar unha caída no índice. Desta maneira, as cifras constatan o incremento continuo dos custos que teñen que soportar as familias galegas, unhas subas que se prolongan xa por anos no caso dos bens de consumo, aqueles que saen ao mercado preparados para seren adquiridos polas persoas usuarias finais. O proceso inflacionista máis rápido da historia Precisamente, esta espiral inflacionista, que alcanzou unha especial intensidade nos meses posteriores á crise da Covid, foi destacada polo Banco de España como un proceso de suba de prezos máis rápido do que foron outros episodios históricos desta tipoloxía. Desde 2021, a inflación aumentou de forma intensa na economía mundial a raíz dunha sucesión de shocks, entre os que destaca o encarecemento da enerxía, sinalou esta segunda feira o Banco de España nun informe. Inflación, chave para aumentar beneficios empresariais Con todo, nun gran número de Estados a inflación tería alcanzado o seu pico nos últimos meses e iniciado a fase de descenso. Segundo o organismo, nos últimos meses, e a pesar dalgúns aspectos idiosincrásicos, cada vez hai máis Estados que mostran un descenso da inflación xeral. En particular, segundo a institución bancaria, a inflación alcanzou o seu pico entre marzo e abril de 2023 en todas as economías avanzadas, aínda que a moderación da inflación subxacente discorre con certo atraso e só afectaría, en xullo de 2023, a 80% das mesmas. O Banco de España destacou o desfasamento entre o máximo da inflación xeral e o da inflación subxacente, de ao redor de seis meses, a diferenza do observado noutras espirais inflacionistas, cando o pico da inflación subxacente foi contemporáneo do máximo da inflación xeral. Neste sentido, o aumento do prezo das materias primas alimenticias constitúe un elemento engadido diferencial desta crise de prezos, que contribúe a manter elevada a taxa de inflación subxacente. As empresas sosteñen prezos altos Segundo explica a Nós Diario o doutor en Historia Económica e profesor na Facultade de Ciencias Económicas e Empresariais da Universidade de Santiago de Compostela (USC) Adrián Dios "as empresas son moi pouco sensíbeis ao descenso dos custos, cústalles baixar prezos". Probabelmente, explica o especialista en relación ao índice de prezos industriais, "estase atrasando ese proceso, xa que aínda que baixen os custos enerxéticos, as empresas seguen sostendo os prezos altos".