O incremento de afiliación á Seguridade Social na Galiza fica por baixo do estatal

A Seguridade Social gañou unha media de 8.770 persoas afiliadas en maio na Galiza respecto ao mes anterior (+0,84%), até superar os 1,05 millóns de ocupadas, segundo os datos publicados esta sexta feira polo Ministerio de Inclusión, Seguridade Social e Migracións. O mercado laboral galego aumentou en 8.770 empregos durante o mes de maio Desta maneira, o incremento na Galiza foi inferior ao da medida estatal, xa que no conxunto do Estado rexistrouse unha suba das cotizacións de 0,97% respecto a abril, con 200.411 novas persoas afiliadas, até superar por primeira vez na historia os 20,8 millóns de ocupadas. O sector servizos xa conta co 72,8% da afiliación galega Nos últimos 12 meses, as afiliacións na Galiza aumentaron en 18.337, 1,76% máis que no mesmo mes de 2022. Porén, o incremento foi máis dun punto porcentual menor que o experimentado a nivel estatal durante o último ano, onde a Seguridade Social gañou 582.676 cotizacións, cun crecemento interanual que ascendeu a 2,9%. Por réximes, 833.369 persoas afiliadas á Seguridade Social na Galiza pertencían ao réxime xeral. Ademais, 206.154 eran autónomas e 19.562 traballaban no sector do mar. Así mesmo, as traballadoras en expedientes de regulación temporal de emprego (ERTE) por causas económicas, técnicas, organizativas ou de produción (ETOP) situáronse ao finalizar maio na Galiza en 700. Descenso do desemprego Con respecto ao desemprego, o número de parados e paradas rexistradas nas oficinas galegas dos servizos públicos de emprego baixou en 4.909 persoas no mes de maio en comparanza co mes anterior (-3,52%). Un descenso impulsado, especialmente, polo sector servizos, que concentrou máis de 75% da caída do desemprego, segundo os datos publicados esta sexta feira polo Ministerio de Traballo e Economía Social. O sector servizos lidera a caída do paro na Galiza Para analizar os datos de paro é preciso ter en conta que esta taxa non contabiliza as persoas cun contrato a tempo parcial que queren traballar máis horas nin as desocupadas non inscritas nas oficinas de desemprego mais que desexan traballar. A este respecto, Cristina Herrero, presidenta da Autoridade Independente de Responsabilidade Fiscal (Airef), organismo creado polo Goberno español para garantir a estabilidade financeira do Estado, advertiu este ano de que a taxa de desemprego cada vez "é menos representativa do que se quere medir". Pola contra, os datos de afiliación son unha mostra exacta da evolución das persoas rexistradas que se atopan traballando nun momento dado, sexa por conta allea ou por conta propia, polo que se trata dunha taxa máis fiábel. Así, o descenso do desemprego na Galiza no mes de maio foi superior ao rexistrado a nivel estatal, xa que no conxunto do Estado español o paro diminuíu 1,8%, con 49.260 persoas desempregadas menos, tamén grazas ao sector servizos. Na actualidade, o país contabiliza 134.434 persoas desempregadas, o que representa 8% menos que en maio de 2022, con 11.686 persoas que xa non están anotadas nas listas de procura de emprego. No conxunto do Estado español, no último ano o desemprego acumulou un descenso de 183.881 persoas, o que supón 6,3% menos. Reaccións sindicais Os sindicatos valoraron esta sexta feira os últimos datos de afiliación á Seguridade Social e de desemprego, aínda que advertiron sobre o aumento da "desigualdade" entre mulleres e homes e da "precariedade" do mercado laboral. Os sindicatos alertan do aumento da precariedade A CIG cualificou de "positivos" os datos do desemprego, aínda que lamentou que se está creando emprego "precario e case na mesma situación que antes da reforma laboral". Neste sentido, o secretario confederal de emprego do sindicato, Francisco González Sío, apuntou que "hai un cambio de tendencia na contratación, que agora xa non é conxuntural, senón estrutural", xa que os datos confirman que o que se incrementa son os contratos fixos descontinuos, que subiron 6% na afiliación á Seguridade Social, e os temporais, que aumentaron 3%. "Cada vez os traballadores indefinidos a tempo completo son unha excepción e non a regra", criticou o representante do sindicato. CCOO subliñou a baixada do paro na Galiza, que diminuíu máis que no Estado, aínda que puntualizou que a afiliación creceu menos que a media estatal. O sindicato remarcou que a caída do desemprego foi menor entre as mulleres que os homes, "o que agrava a situación de desigualdade no mercado laboral". A pesar diso, engadiu que a reforma laboral "segue influíndo positivamente na calidade do emprego", xa que máis de 30% dos contratos rexistrados en maio foron indefinidos (dato que inclúe fixos descontinuos). UXT tamén volveu pór en valor a reforma laboral porque "mellora a calidade de vida das persoas". Para a organización, os datos reflicten a excelente incidencia do acordo laboral. "É indubidábel o impacto positivo que está a ter a reforma laboral para as relacións laborais do noso país, introducindo os incentivos necesarios para acabar coa fraudulenta temporalidade que implicaba a concatenación de contratos de moi curta duración e reducindo a inestabilidade laboral que sufrían miles de persoas", afirmou o sindicato. Os servizos representan 76% da caída do desemprego Das máis de 4.900 persoas que saíron das listas do desemprego na Galiza no pasado mes de maio, 3.712 correspondían ao sector servizos, até 76% do total; 110, á agricultura; 506, á industria; 382, á construción, e 199, non tiñan un emprego anterior. A pesar diso, 70,7% dos desempregadas pertencían ao sector servizos. Menos persoal por conta propia que hai un ano As afiliacións ao réxime especial de autónomos sufriron un descenso na Galiza durante o último ano. Desta forma, as persoas traballadoras por conta propia contabilizadas na Seguridade Social no mes de maios foron 0,96% menos que no mesmo mes de 2022. Na Galiza só sobreviven hoxe 40% das empresas creadas en 2017 Unha situación que contrasta coa do conxunto do Estado español, xa que a afiliación á Seguridade Social por conta propia permaneceu practicamente invariábel con respecto ao mes de maio de 2022, cun ascenso de 0,04%. Na comparanza entre o mes de abril e o mes de maio de 2023, a cotización no réxime de autónomos aumentou o dobre no Estado español do que o fixo na Galiza. Desta forma, mentres que o incremento de persoal por conta propia rexistrado na Seguridade Social aumentou 0,29% a nivel estatal, esta suba rexistrou unha taxa de 0,15% no caso da Galiza.