A I+D perde peso na Galiza: menos persoal e menos investigación

O Instituto Galego de Estatística (IGE) fixo públicos esta terza feira os últimos datos consolidados da Explotación da estatística sobre actividades de I+D (Investigación e Desenvolvemento), correspondentes a 2024. Galiza neste eido non sae ben parada nin a respecto dos datos do ano anterior nin comparándoos coa media española, moi por riba das cifras de I+D galegas en todos os parámetros. De acordo co IGE, os gastos internos totais en I+D no país alcanzaron os 1.058 millóns de euros, unha cifra superior en 95 millóns de euros á rexistrada en 2023 pero que se traduciu o ano pasado en menos persoal contratado neste sector (-509) e tamén menos persoal investigador (-320). Na anualidade analizada, por cada 1.000 persoas ocupadas no país 11,7 pertencían ao sector da I+D, unha cifra que descende no caso das investigadoras neste eido, pois apenas eran 7,6 por cada 1.000 persoas asalariadas. Tamén neste caso Galiza perdeu peso en comparanza con 2023, cando por cada millar de ocupados e ocupadas eran oito as persoas investigadoras en I+D. Galiza inviste en investigación e desenvolvemento menos da metade que a media da UE O esforzo que Galiza dedica ao gasto en I+D respecto do produto interior bruto (PIB) do país foi en 2024 de 1,30% ( 0,5% máis que no ano previo), por baixo da media do Estado español, onde representa 1,5% do PIB. Aliás, o gasto per cápita en I+D na Galiza é moi inferior á media estatal: 391 euros por cada galego e galega, segundo o IGE, mentres no Estado supera os 490 euros. As cifras de I+D da Galiza están por baixo da media en todos os indicadores. Polo miúdo, no caso do persoal dedicado a este sector Galiza representa só 4,5% do total estatal. Tamén no caso dos investigadores a media galega só alcanza 4,7% da do Estado, e no que respecta ao gasto interno total en I+D, o da Galiza no 2024 foi só 4,4% do español. Distintos obxectivos A respecto das áreas do coñecemento e os obxectivos aos que se dedica na Galiza o gasto e o persoal en I+D, os datos do IGE referidos ao feche de 2024 sinalan que o sector da administración pública dirixe a maior parte do seu persoal investigador ás ciencias médicas, as ciencias exactas e naturais e as ciencias agrarias. No caso do ensino superior, o persoal dedicado á I+D na Galiza centrou en 2024 os seus esforzos nas ciencias sociais, as exactas e naturais, enxeñaría e tecnoloxía e humanidades. Pola contra, o sector empresarial –que sustenta o maior gasto en persoal e recursos para I+D– centrou estas investigacións na industria e nos servizos. O investimento da Galiza en I+D é un 51,6% inferior ao da media da UE Polo miúdo, os datos do IGE relativos ao pasado ano sinalan que o gasto en I+D do sector das administracións públicas procurou maioritariamente como obxectivos a protección e mellora da saúde humana e o desenvolvemento agrícola, gandeiro, da silvicultura e da pesca. No caso do sector do ensino superior, estes obxectivos do gasto en I+D centráronse na investigación non orientada, na protección e mellora da saúde e no control e coidado do medio ambiente. No sector das empresas mudan estas metas, pasando a ser prioritarias a produción e tecnoloxía industrial e os sistemas de transportes e telecomunicacións. O peso da administración pública non chega a 15% Os últimos rexistros mostran o escaso peso da administración pública no sector. Segundo as cifras ao feche de 2024, dos 1.058 euros de gastos internos totais en I+D na Galiza só corresponderon ás administracións públicas 133,8 millóns, o que representa 12,6% do gasto total no país. Foron as empresas as que aportaron un maior gasto en I+D, superando os 510 millóns de euros, seguidas do sector do ensino superior, cun gasto de 413 millóns. Tampouco chega a 15% o dato de persoal e investigadores da administración pública. Do persoal total dedicado ao sector da I+D dese ano na Galiza, até 13.346 persoas, o sector das administracións públicas só achegou o 13%. No caso dos investigadores, que foron 8.736, o sector público apenas representou 10,6%. Galiza gasta en I+D 100 euros menos por habitante que a media do Estado Tamén neste sector mantense na Galiza a fenda de xénero no emprego tanto en persoal xeral como en persoal orientado á investigación. No ano 2024, do total de persoal e de investigadoras, só 40% eran mulleres, segundo as cifras do IGE. O peso feminino nos postos de traballo do sector da I+D é de 41% no que se refire ao persoal xeral dedicado a esta actividade, e de 40% cando falamos das investigadoras. Segundo as cifras concretas do IGE, do total das 13.346 persoas emprergadas no sector da I+D na Galiza ao remate de 2024, só 5.507 son mulleres. No caso da investigación, de 8.736 profesionais totais traballando na Galiza son mulleres un total de 3.528. As compras externas chegan a 30 millóns Ademais do gasto en persoal, investigadores e investigadoras e mais I+D con recursos propios, os tres sectores das administracións públicas, a ensinanza superior e sobre todo as empresas, destinaron no ano 2024 un total de 30 millóns de euros en total á compra de I+D externa. As cifras do IGE sitúan as empresas galegas como as que máis usaron o ano pasado o recurso de mercar recursos fóra. O citado sector privado investiu no pasado exercicio uns 20,5 millóns de euros neste tipo de compras, fundamentalmente a outras empresas e ás universidades. No caso das administracións públicas foron 444.000 euros, principalmente comprando a empresas de todo o mundo. O ensino superior tamén mercou I+D en 2024 por valor de até 4,1 millóns de euros, en empresas e noutras universidades.