A suba de até un 15% nas tarifas por baleirado sanitario alporiza as granxas: asegurar 40 vacas podería custar 7.000 euros

O anuncio realizado en febreiro por parte da Entidade Estatal de Seguros agrarios (ENESA) e a Agrupación Española de Entidades Aseguradoras de Seguros Agrarios Combinados (Agroseguro) de que se revisarían as tarifas para da retirada e destrución de animais creou malestar nas explotacións gandeiras galegas e afasta, aínda máis, a súa contratación. Os importes que agora pagan as granxas, segundo estas entidades, poderían incrementarse até nun 15% na liña 415, aquela que xestiona eses casos de baleirado sanitario, un aumento que explican polo “desequilibro” nos custos actuais. Desde a Federación Rural Galega (Fruga), Elías Somoza considera que esta suba “non é de recibo” e prexudica ás explotacións que traballan co gando no país. “Nos últimos anos, xa vimos observando sucesivos incrementos deste liña de seguros”, explica a Nós Diario. Este sindicato entende que “se a recollida de cadáveres é obrigatoria debería ser un servizo público que tería que xestionar a Xunta da Galiza e non un negocio”. A Administración como problema En opinión de Óscar Pose (UUAA), o anuncio de incremento de prezo non é “nada novo” para as explotacións. Lembra a Nós Diario que “cando hai un aumento de mortalidade aumentan o seguro”, unha situación que desde o seu sindicato, asegura, “denunciamos en varias ocasións, sobre todo por tratarse de circunstancias que non acontecen por un mal manexo nin por unha irresponsabilidade senón por unha causa excepcional”. Seguros caros e con baixas indemnizacións O cálculo dun baleirado sanitario de toda a explotación supón unhas perdas, segundo o Sindicato Labrego Galego (SLG) de 800 euros por cada animal sacrificado. Desde esta organización, Ánxo Pérez sinala a Nós Diario que "os seguros son caros". Pon como exemplo unha explotación galega de 40 vacas que "para que lle sexa rendíbel cubrindo o que pode precisar tería que pagar entre 6.000 e 7.000 euros cada ano". Ademais, Elías Somoza lembra que teñen outras eivas, entre elas a de que “hai que actualizar o que recibe a explotacións por cada res que ten que sacrificar”. Sobre este tema, Óscar Pose apunta que “malia que se foron actualizando nos últimos anos, subiu moito máis o prezo dos animais que o que sinala Agroseguro”, polo que considera que “é necesario pór ao día as indemnizacións que reciben as granxas”. Fruga denuncia o “abatemento” de animais sans na campaña de saneamento Baleirado en Manzaneda Un caso actual é o que padece unha granxa da parroquia da Raigada, no concello de Manzaneda (comarca de Terra de Trives), que esta semana terá que sacrificar toda a súa cabana gandeira, formada por 46 animais -entre vacas e becerros- ademais de tres ovellas e unha cabra. O responsábel da explotación, Secundino Domínguez, relata a Nós Diario que desde a Xunta da Galiza lle informaron que, tras un control, deran positivo por tuberculose bovina tres vacas obrigándolle agora a eliminar toda a cabana. Admite que “o peor é o tema emocional” tras compartir tantos anos cos seus animais nunha explotación que xa traballaba a familia. As perdas, neste caso, serían de 32.000 euros segundo o SLG que fai un seguimento deste caso. “Nós non temos seguro”, aclara este gandeiro, “e aínda que o tiveramos, só cobrariamos del a metade por animal ao pagar a Xunta a outra metade”, indica. Este gandeiro recoñece que hai moitos casos como o seu. “Estes días pasoulle a outra explotación da Poboa de Trives (na mesma comarca) con doce vacas que aínda está á espera dos resultados da análise do cultivo”, asegura Domínguez, “o gandeiro, neste caso xa me indicou que se lle obrigan a sacrificar toda a cabana renunciaba a seguir", engade. No seu caso, ademais, ten separadas en dous lugares diferentes os animais, sen ningún contacto entre eles. "Solicitei que só se sacrificaran as que estiveron en contacto coas tres positivas mais dixéronme que non podía ser por estar na mesma folla de saneamento". Falta de empatía e discriminación Desde o SLG denuncian “unha falta total de empatía e sensibilidade do persoal funcionario da Administración na toma de decisións e a frialdade con que se lles notifica un baleirado sanitario”. A Fruga, pola súa parte, introduce outra queixa nas intervencións que realiza a Administración galega. “Non sempre se aplicaron baleirados sanitarios dependendo das positivas que deran”, lembra Somoza en alusión ao tamaño das granxas e ao número de animais. UUAA defende que o lobo "non está" en perigo de extinción na Galiza e pide máis axudas para paliar os ataques “Non ten sentido que se produza un sacrificio de todos os animais dunha explotación cando hai un número de positivos e mesmo haxa algúns sen confirmar”, cre Óscar Pose. Neste tipo de situacións, este sindicalista de UUAA entende que “habería que agardar a ter a confirmación sanitaria oportuna para chegar ao baleirado total”. A Xunta segue coas medidas drásticas malia a situación A Comisión Europea declaraba en novembro de 2021 oficialmente á Galiza como zona libre de tuberculose bovina, o que quedou ratificado, precisamente polo Diario Oficial da Unión Europea ese mesmo ano. "A propia Consellaría de Medio Rural asegurou que esta doenza está controlada, cunha prevalencia do 0,1%", aseguran desde o SLG. Por este motivo, este sindicato non entende que non se mude a "unha cualificación sanitaria inferior, e desta maneira poder eliminar tan só aos animais afectados e evitar a morte innecesaria dos animais sans, provocando unha perda económica menos gravosa e emocionalmente máis levadeira". Recuperarse do baleirado Fruga, SLG e UUAA consideran que é moi difícil que as explotacións se recuperen dun baleirado sanitario como os que está a realizar a Administración galega. "Non só hai unha forte perda económica inicial cos custos que ten a operación, senón que tamén hai que ter en conta que este tipo de explotacións tardan anos en formarse", explica Elías Somoza. Para Anxo Pérez, o investimento "para compra un animal en condicións pode superar os 2.000 euros, un importe do que non dispoñen despois de desfacerse de toda a súa cabana bovina".