O Goberno estatal elimina a prórroga do aluguer por seis meses mantendo o mesmo contrato

O Goberno español eliminou do paquete de medidas para facer fronte á suba de prezos a posibilidade de estender seis meses a vixencia dos contratos de aluguer cos mesmos termos e condicións estabelecidas no documento que tivesen en vigor. Neste sentido, o Consello de Ministros e Ministras aprobou esta terza feira un Real Decreto-lei para prorrogar algunhas das medidas 'anticrise' que caducan o próximo 30 de xuño, entre as que se non se inclúe esta prórroga. Porén, a limitación da actualización anual da renda dos contratos de arrendamento de vivenda que impide subas superiores a 2% está estendida até o 31 de decembro de 2023. A Lei de Vivenda estabelece un límite de 2% para este ano na suba do aluguer e elévao até 3% en 2024 para, antes do 31 de decembro do próximo ano, crear un novo índice de referencia aplicábel ao territorio á marxe do Índice de Prezos de Consumo (IPC). ANÁLISE | 'Direito a vivenda', por Nemésio Barxa En relación ás medidas de vivenda, mantéñense tamén até final de ano a suspensión dos procedementos de desafiuzamento e dos lanzamentos para fogares vulnerábeis cando non haxa alternativa habitacional. Ademais, o Goberno aprobou unha nova liña de avais do Instituto de Crédito Oficial (ICO) de 2.500 millóns de euros para axudar a menores de 35 anos e a familias con menores ao seu cargo sen límite de idade con ingresos individuais de até 37.800 euros anuais a pagar a entrada da súa primeira vivenda. Prórroga ás renovábeis As enerxéticas terán seis meses máis para emendar os proxectos de renovábeis O Goberno do Estado español aprobou unha extensión de seis meses no prazo, que expiraba o próximo 25 de xullo, para que os titulares de proxectos renovábeis e de almacenamento de enerxía poidan obter a súa acreditación da autorización de construción, dando así unha oportunidade ás empresas para emendar aqueles proxectos que non cumprían cos condicionamentos ambientais necesarios para ser legalmente autorizados. Ao aplicar o réxime de protección ambiental, moitos destes proxectos obtiveran unha Declaración de Impacto Ambiental (DIA) condicionada a modificacións substanciais, o que derivaba na necesidade de acometer novas consultas públicas que debían ser resoltas antes vencer o prazo do 25 de xullo. Unha medida encadrada na estratexia da Unión Europea (UE) de pór o foco nas rexións con "potencial renovábel" e de aumentar a instalación deste tipo de enerxía e as súas facilidades de autorización aínda en casos, como o galego, nos que xa se cumpran os obxectivos comunitarios na actualidade. Ademais, o Executivo español aprobou unha modificación das referencias de prezos dos mercados eléctricos e dos combustíbeis introducidos nas fórmulas que definen os parámetros retributivos das plantas de coxeración, biomasa e residuos, mellorando así a retribución para estas tecnoloxías. A medida aumentará en 180 millóns de euros os ingresos regulados das instalacións renovábeis en 2023, ao que se engaden 20 millóns para as plantas de coxeración a computar no primeiro semestre de 2023. Butano e combustíbel O Executivo estatal aprobou tamén prorrogar até o próximo 31 de decembro o prezo máximo de venda da bombona de butano de 19,55 euros que se estabeleceu en xuño do ano pasado. Na actualidade, grazas á relaxación das cotizacións internacionais, o prezo da bombona de butano está situado en 15,96 euros, afastado dese prezo máximo. Tamén se prorroga a bonificación ao gasóleo de 10 céntimos por litro para os transportistas profesionais, agricultores e gandeiros até o 30 de setembro. Aínda que boa parte dos sectores solicitaba o aumento da axuda até 20 céntimos, no último trimestre do ano a bonificación reducirase a 5 céntimos por litro. Bonificación do IRPF para a compra de coches eléctricos A adquisición de coches eléctricos será bonificada en 15% no IRPF O Goberno estatal tamén aprobou unha dedución no Imposto sobre a Renda das Persoas Físicas (IRPF) de 15% e un máximo de 20.000 euros para a compra de coches eléctricos e sistemas de recarga. A Galiza fica no vagón de cola do Estado e da UE nos indicadores de electromobilidade, o que complica o aproveitamento da bonificación. Permisos por coidados O Goberno estatal aprobou tres permisos por coidados de familiares e crianzas. O primeiro, retribuído, consiste en cinco días ao ano para empregar en caso de accidente ou enfermidade grave, hospitalización ou intervención cirúrxica sen hospitalización que necesite repouso, tanto dun familiar de até segundo grao, como dun convivinte. Estes son os tres permisos por coidados aprobados esta terza feira polo Goberno estatal O segundo, tamén retribuído, é un permiso "por causa de forza maior" que se distribuirá por horas e poderá alcanzar en total até catro días cando haxa motivos familiares urxentes. Pola súa parte, o terceiro trátase dun permiso parental de oito semanas, de forma continua ou descontinua, a tempo completo ou parcial, que se poderá distribuír até que o menor cumpra oito anos. Ademais, as parellas de feito tamén terán dereito aos quince días de permiso por rexistro, igual que os matrimonios. A carne e o peixe fican finalmente sen redución do IVE O Goberno español aprobou esta terza feira prorrogar a rebaixas do Imposto sobre o Valor Engadido (IVE) de determinados alimentos básicos, aínda que renunciou a incluír a carne e o pescado nos produtos bonificados. O Goberno español aproba a prórroga da rebaixa do IVE de alimentos e as axudas ao transporte público Ademais, prorrogouse tamén a redución do prezo de abonos e títulos multiviaxe de transporte público (o desconto de proximidade de Renfe e media distancia xa se estendeu todo o ano). Así, seguirase bonificando en 30% o transporte público do resto de Administracións sempre que estas se comprometan a aumentar este desconto até 50%. O bolseiros seguirán sen dereito a ter cotización O Goberno estatal asegurou que atrasará a entrada en vigor da inclusión no sistema da Seguridade Social do alumnado que realice prácticas formativas ou académicas externas incluídas en programas de formación. Segundo fontes ministeriais, a entrada en vigor desta medida pasará do 1 de xaneiro de 2023 até o comezo do ano 2024. Por outra parte, prorrogaranse as medidas laborais vinculadas coas axudas públicas. Desta maneira, o aumento dos custos enerxéticos non poderá constituír causa obxectiva de despedimento até o 31 de decembro de 2023. O incumprimento desta obrigación implicará o reintegro da axuda recibida.