A Galiza, xunto a Asturias e León, desperdician ao ano até 137,54 millóns de quilos de alimentos

A Comisión Europea alertaba en 2023 de que, sumando os resultados dos vinte e sete Estados membros, desperdiciábanse cada ano case 59 millóns de toneladas de alimentos, é dicir uns 131 kg por persoa. O maior causante está nos fogares (53%), seguido da transformación (20%), a produción (11%), os restaurantes e os servizos (9%), e a venda retallista e a distribución (7%). Ademais, indicaba que tiña unha repercusión directa na economía, con perdas que cuantifican con 132.000 millóns de euros, alén de provocar 16 % do total das emisións de gases de efecto invernadoiro do sistema alimentario da Unión Europea. Os últimos datos a nivel estatal, facilitados polo Ministerio de Agricultura, Pesca e Alimentación (MAPA), referidos a 2022, sinalan que, de media, cada fogar desperdicia, aproximadamente, 65,5 quilos ou litros de alimentos e bebidas. Os produtos sen elaborar seguen sendo os máis desperdiciados, aínda que en 2022 foron 9% menos que en 2021. Respecto aos pratos cociñados, o seu desperdicio aumentou 6,7% respecto a 2021. Respecto á Galiza, situada no informe como o grupo noroeste con León e Asturias, as cifras de desperdicio en 2022 foron de 137,54 millóns de kg dentro e fóra do fogar (1.201,92 millóns de kg no conxunto do Estado). 65% da poboación galega consome peixe con menor frecuencia da recomendada Un debate necesario A Unión de Consumidores da Galiza (Ucgal), dentro da análise que está a realizar da axenda 2030 aprobada pola ONU, continúa desenvolvendo iniciativas informativas e de sensibilización entre outros, sobre a temática alimentaria. Despois de tratar a calidade e a sustentabilidade, esta terza feira debullaron nunha xornada en Santiago o problema do desperdicio alimentario. No encontro participaron representantes deprodutores, industria, distribución, canle Horeca e asociacións de consumidoras e consumidores, ademais dunha representación institucional aproveitando que a subdirectora xeral de Calidade e Sostibilidade Alimentaria do Ministerio de Agricultura, Pesca e Alimentación, Ana Díaz Pérez explicou a futura lei de prevención de perdas e desperdicio alimentario. Desde a Ucgal, o seu secretario xeral, Miguel López, indica a Nós Diario que introduciron o tema, “cando está enriba da mesa esa lei”. ademais, de "ter sentido que o evento saia dunha organización como a nosa, de consumidores, se temos en conta que a maioría do refugallo alimentario parte dos fogares". Sabes que empresas de telefonía teñen máis reclamacións? Enquisa da Ucgal Previa á xornada, Ucgal realizou unha enquisa na que participaron máis de 600 persoas. Nela sinálase que 69,88% fai sempre ou case sempre unha lista da compra antes de ir á tenda e 72,2% aproveita os restos de comida para preparar outros pratos. Ademais, unha gran parte (41,93%) recoñece que aproveita as ofertas de tipo 3x2 ou descontos na segunda unidade. En relación á data de caducidade dos alimentos, 72,88% di respectala sempre ou case sempre mais, aínda así, 56,41% asegura que compra algunha vez alimentos próximos a caducar. No relacionado a desbotar alimentos, os máis sinalados son as froitas, verduras e hortalizas; e os que menos o peixe e os conxelados. Por último, a enquisa revela que na hostalaría, 68,05% dos estabelecementos case nunca ou só algunha vez informa da posibilidade de levar os alimentos non consumidos para casa mais 76% das persoas que responderon o cuestionario admiten que solicitan directamente que lles preparen para levar os alimentos que non consumen. Neste caso, 35,11% explican que se lles cobrou algunha vez ou sempre polo envase facilitado. Desde a Ucgal alertan das campañas de empresas que facilitan o desperdicio alimentario. López Crespo pon como exemplo as que, para incrementar máis as vendas, ofertan nos seus andeis o "3x2 ou a segunda unidade cun prezo moi rebaixado". Nese caso, a persoa consumidora leva "máis produto do que tiña pensado" polo que ten máis posibilidade de que remate por ser un refugallo. Outro caso máis evidente son as "ofertas de produtos que caducan no mesmo día ou ao día seguinte", sen ter en conta que "a maior parte das veces remata no lixo polo que o aforro, desaparece". Neste sentido, o responsábel da Ucgal cre fundamental "saber canto diñeiro perdemos tirando alimentos". Malestar e queixas nas persoas usuarias polo "oligopolio" nos horarios dos bancos Industria e cooperativas Nunha das mesas redondas, a denominada 'O desperdicio alimentario no sector primario e na industria', participan o Director xerente da Asociación Galega de Cooperativas Agroalimentarias (Agaca), Higinio Mougán e a Coordinadora da área de sostibilidade e economía circular no Clúster alimentario da Galiza (Clusaga), Perla Ferrer. "É necesario atacar este problema", recoñece Mougán a Nós Diario, "sobre todo analizando a situación", agrega. Neste sentido, considera que no sector agrícola moitas das perdas veñen de circunstancias "fóra do noso control, como no caso da problemática climática que estamos padecendo". Para Ferrer, pola contra, o desperdicio alimentario na industria trátase "como unha oportunidade e figura nas súas axendas". Afirma que agora aproveitase, sobre todo, "para deseñar produtos novos, valorizando o refugallo". Consiste en mudar o concepto de "subproduto" a "coproduto" para rematar por ser outro ingrediente "sexa para a industria alimentaria ou para outras". Por último, outro aproveitamento sae das doazóns "algo que xa figura na nova lei". Luis Planas di que o persoal veterinario nas explotacións "será voluntario" e os sindicatos amosan unha "cauta satisfacción" A nova lei dá prioridade ao consumo humano O proxecto de lei que aprobou o Goberno español en xaneiro deste ano estabelece unha xerarquía de prioridades para o destino dos alimentos que inevitabelmente se convertan en desperdicio alimentario. Por riba de todo estará o consumo humano, a través da doazón ou redistribución dos alimentos, e seguiralle a transformación dos alimentos (zumes, marmeladas) e, cando non sexan aptos para o consumo humano, a preferencia de uso será a alimentación animal, a fabricación de pensos ou a obtención de compost ou biocombustíbeis. Na norma, a hostalaría terá a obriga de facilitar levar os alimentos que non se consumise sen custo adicional algún en envases reutilizábeis ou facilmente reciclábeis, aínda que debe cobrar polos envases de plásticos dun só uso como estabelece a Lei de residuos 7/2022. Alén diso, a lei tamén articula medidas de boas prácticas en cuestións como a venda de produtos ‘imperfectos’; de produtos de tempada, de proximidade ou ecolóxicos; e tamén para a venda de produtos de consumo preferente ou de caducidade próxima. Para lograr estes obxectivos, a nova lei sinala a obriga para todos os axentes da cadea alimentaria de contar cun plan de prevención de perdas e desperdicio.