A Galiza xa cumpre co obxectivo de consumo renovábel que a Unión Europea marca para o ano 2030

A porcentaxe de consumo de enerxía renovábel durante o ano 2020 a nivel galego con respecto ao total da empregada foi de 46,2%, segundo o informe Balance Enerxético da Galiza, 2020, do Instituto Enerxético da Galiza (Inega). Desta maneira, constátase que a Galiza cumpre, xa desde o pasado ano 2020, co novo obxectivo de consumo de enerxías renovábeis que se marca a Unión Europea (UE) para 2030. A UE eleva a 42,5% o obxectivo de consumo de renovábeis para 2030 Neste sentido, os equipos negociadores do Consello e o Parlamento europeos pactaron esta quinta feira un acordo político provisional, que parte dunha proposta da Comisión no pasado mes de xuño, para aumentar a cota de enerxías renovábeis no consumo total de enerxía da UE, que pasa da taxa de 32% prevista inicialmente á de 42,5% para o ano 2030, cun complemento indicativo adicional de 2,5% que permitiría alcanzar 45%, cifra que defendeu o Estado español. A taxa de consumo renovábel en 2020 sobre o total da enerxía usada no país foi de 46,2% Segundo puido saber Nós Diario, a falta de coñecer o dato definitivo para o ano 2021, que se prevé que sexa publicado nas próximas horas ou días, xa está confirmado que a Galiza tamén superaría o limiar de 42,5% durante esa anualidade, a pesar de que se tratou dun exercicio no que a seca e a escaseza de vento minguaron a produción das enerxías renovábeis e de que as formulas de cálculo das taxas de consumo foron endurecidas pola entrada en vigor da aplicación dunha nova directiva da UE. O acordo provisional sobre a nova directiva de enerxías renovábeis aínda deberá ser referendado polas institucións da UE, cuxo obxectivo común, ao que deberá contribuír cada Estado, é acelerar a integración das renovábeis en sectores onde a incorporación foi máis lenta, como é o caso do transporte, a industria, os edificios e a calefacción e refrixeración urbanas. As institucións da UE remataron as súas negociacións na que foi a súa oitava reunión despois de que as reclamacións de Francia, que solicitaba un tratamento "diferenciado" entre enerxía nuclear e combustíbeis fósiles na directiva comunitaria, dificultaran aos Estados alcanzar unha posición xeral. Esta desbloqueouse con base nun compromiso presentado pola presidencia sueca do Consello Europeo. A proposta pactada decreta que a industria deberá incrementar o seu uso de enerxías 'verdes' anualmente en 1,6%, co fin de que até 42% do hidróxeno utilizado na industria proveña de combustíbeis renovábeis para 2030, e 60% para 2035. Non obstante, para atender as peticións de Francia de recoñecer a nuclear para alcanzar a neutralidade climática en 2050, o acordo introduce a posibilidade de que os Estados desconten a contribución do hidróxeno renovábel no uso industrial en 20% se se cumpre a contribución estatal agardada conforme ao obxectivo vinculante da UE, e se a cota de hidróxeno procedente de combustíbeis fósiles consumido non supera 23% en 2030 nin 20% en 2035. No que atinxe ao transporte, dáse a posibilidade aos Estados de elixir entre unha redución de 14,5% dos gases de efecto invernadoiro no transporte de cara a 2030 ou de, cando menos, 29% de participación de enerxías renovábeis no consumo final de enerxía no sector para ese ano. Ademais, estabelécese un obxectivo combinado vinculante de 5,5% para biocombustíbeis avanzados e combustíbeis como hidróxeno renovábel ou sintéticos na cota de enerxías renovábeis do sector do transporte. O acordo provisional fixa tamén outro obxectivo indicativo dun mínimo de 49% de cota de renovábeis nos edificios en 2030, e prevé un aumento gradual dos obxectivos renovábeis para calefacción e refrixeración, cun incremento vinculante de 0,8% por anualidade até 2026 e de 1,1% entre 2026 e 2030. Aceleración dos trámites en rexións estratéxicas A UE pon o foco nas rexións con "potencial renovábel". Así, chama a aumentar a instalación deste tipo de enerxía e as facilidades para a súa autorización aínda en casos, como o galego, nos que xa se cumpran os obxectivos na actualidade. "Os procedementos de autorización [de enerxía renovábel] serán máis fáciles e máis rápidos baixo a nova lei", sinala a Comisión. A Xunta reduce os trámites a 13 proxectos eólicos, 11 deles de Greenalia "A enerxía renovábel será recoñecida como un interese público primordial, sempre e cando se preserve un nivel alto de protección ambiental. En áreas con alto potencial renovábel e riscos ambientais baixos, os Estados instalarán áreas de aceleración dedicadas en concreto ás renovábeis, con procesos de autorización particularmente curtos e sinxelos", explica Bruxelas. A autorización de proxectos para renovábeis será "fácil e rápida", di a comisión europea Outra das medidas que afecta especialmente os recursos naturais galegos é a promoción do uso da biomasa leñosa para a xeración de enerxía, posto que máis de dous terzos do territorio da Galiza son superficie forestal. "As regras pactadas instauran que a biomasa leñosa terá que ser utilizada segundo o seu valor económico máis alto e o seu valor engadido ambiental", estabelece o Executivo da UE. Por outra parte, "o apoio financeiro será prohibido para a enerxía producida co uso de madeira serrada, laminada ou industrial, así como a xerada coas cepas e as raíces das árbores", salienta. Enagás confía na chegada de financiamento para o H2Med Coincidindo co acordo entre as institucións da Unión Europea (UE) para o aumento da taxa obxectivo de consumo de renovábeis no ámbito comunitario, a empresa Enagás anunciou esta quinta feira que prevé a inclusión do H2Med, o primeiro corredor de hidróxeno da UE que transitará entre os Estados portugués, español e francés, así como dos primeiros eixos da Rede Troncal Estatal de hidróxeno, na lista de Proxectos de Interese Común (PCI) da UE para recibir financiamento de Bruxelas antes de que finalice o ano 2023. Dúbidas na Galiza O Ministerio relega a inclusión da Galiza no corredor de hidróxeno á segunda fase A pesar de que todas as forzas parlamentarias do país coinciden na reivindicación da entrada no corredor de hidróxeno desde o primeiro momento, a incorporación da Galiza na fase inicial do proxecto segue no aire. O presidente da Xunta, Alfonso Rueda, anunciou o pasado 8 de marzo un acordo con Enagás para o desenvolvemento dunha conexión do corredor entre Guitiriz e Zamora e fixou como "obxectivo" que este tramo fose incluído na primeira fase do H2Med. Porén, as últimas declaracións da ministra para a Transición Ecolóxica e o Reto Demográfico, Teresa Ribera, o 24 de febreiro, relegaban a conexión galega do corredor a unha segunda fase para a que aínda non se coñece unha data exacta.