Galiza rematou 2021 cunha ocupación media nos hoteis do 34,3%

Os datos publicados esta terza feira polo Instituto de Estatística estatal (INE) desvelan que en 2021 rexistráronse 6.512.333 noites de hotel na Galiza, unha suba do 84,7% sobre as cifras de 2020, que deixaron arredor de 3,5 millóns de noites de hotel ocupadas.

Non obstante esta recuperación, as estatísticas están un 27,6% por debaixo das de 2019, o último ano natural antes da chegada da pandemia de Covid-19.

Esta información é semellante á media estatal, que medrou un 86,7% o pasado ano. Non obstante, a comparativa con 2019 apunta que o Estado atópase cunha ocupación hoteleira do 49,8% inferior en 2021 aos números de hai dous exercicios.

Así e todo, o grao de ocupación das prazas hoteleiras rematou 2021 co 34,3%, case dez puntos por baixo da media estatal, do 43,3%.

A pesar da baixa ocupación do sector hoteleiro, a Vicepresidencia Primeira e Consellaría de Presidencia, Xustiza e Turismo defendeu que os datos “confirman o avance na recuperación turística” do país.

O 86,8% das persoas que se aloxaron nos hoteis do país procedían do Estado, mentres que o 13,2% restante viñan doutras latitudes. Neste grupo, duplicáronse o número de noites de hotel de 2020.

No que atinxe ao turismo estatal, a Galiza localízase na sexta praza entre os territorios, co 6,2% de todas as noite de hotel, só superada por Andalucía, cun 22,5%, Catalunya co 14,2%, Comunidade Valenciana co 12%, Comunidade de Madrid co 8,6% e Canarias, cun 7,6%.

Prezos da Hostalaría

En 2021, o Índice de Prezos Hostaleiros subiu un 11,8% na Galiza, cunha facturación media diaria dos hoteis por cada habitación ocupada de 64,2 euros, o que supón un 11,4% máis que en 2020.

Amais, o ingreso medio diario por habitación dispoñible, condicionado pola ocupación rexistrada nos establecementos, acadou os 24,5 euros.