Galiza segue dominando a industria e a comercialización da pesca do Estado

O estudo presentado esta cuarta feira pola Asociación española de almacenistas, importadores, exportadores e transformadores de produtos da pesca e acuicultura (Conxemar) confirma, con datos de 2022, que a Galiza é a comunidade con máis peso no sector en todo o Estado español. A memoria, realizada por esta entidade con sede en Vigo, indica que 33,87% das empresas do Estado español (272 sociedades) son galegas, das cales pertencen a Conxemar 42,28%. Ademais, as firmas galegas aglutinaron practicamente 50% dos ingresos de explotación da actividade a nivel estatal (9.076,2 millóns de euros). Na presentación participaron o delegado do Estado español no Consorcio da Zona Franca, David Regades, e o presidente de Conxemar, Eloy García. O primeiro agradeceu a confianza desta asociación sectorial á hora de realizar o informe contando coa súa colaboración. “O papel do Consorcio da Zona Franca de Vigo é cada vez máis importante para pór ao servizo da sociedade datos rigorosos sobre a evolución da economía que sirvan para a toma de decisións no ámbito empresarial e das políticas públicas”, asegurou. Pola súa parte, Eloy García destacou que os datos do informe presentados esta cuarta feira reflicten que a entidade que preside, en termos de emprego, "aglutina máis da metade dos postos de traballo do sector". Neste sentido, lembrou que se pasou "de 17.000 empregos en 2020 a máis de 20.000 en 2022, xerando máis de 5.000 empregos en dous anos, o que serían máis de 7 empregos novos todos os días”. Entre o traballo creado, García salientou que máis de 53 % é feminino, cun diferencial case 5 puntos porcentuais por enriba da actividade estatal”, proseguiu. Conxemar reivindica a existencia dun Ministerio exclusivo de Pesca As cifras, dadas a coñecer na sede do Consorcio da Zona Franca situada na cidade olívica, forman parte do seu informe anual. A elaboración realizouse a partir da información empresarial dispoñíbel no Servizo de Estudos Ardán e comprende unha análise económica-financeira da actividade empresarial de referencia para a asociación, concretamente no que se refire á transformación e comercialización almacenista de produtos pesqueiros, entre os que estarían como principais os conxelados, as conservas e as semiconservas. Máis empresas galegas Entre os datos que deu a coñecer, o principal indica que a Galiza conta coa porcentaxe maior de empresas do sector a nivel estatal (33,87%) por diante de Andalucía (12,83%) e Catalunya (9,59%). Na análise das empresas asociadas a Conxemar, en relación ao número de compañías asociadas, a Galiza está en primeira posición cun total de 115 (44,23% do total), supondo 53,07% da facturación total da asociación. As empresas asociadas galegas xeraron case 70% da facturación do sector. En segunda posición en canto a número de asociados atópase o País Valencià cun peso sobre o total de asociadas e asociados de 11,54%. En relación ao produto pesqueiro, a Galiza ocupa a primeira posición en xeración de ingresos de explotación (49,99%), seguida de Catalunya (12,92%) e Andalucía (12,60%). Dentro do sector de conxelados, a Galiza tería unha porcentaxe de 44,51%, seguida de Catalunya (15,73%) e Andalucía (10,04%). Segundo o estudo da actividade de produto conxelado en Conxemar, a Galiza obtén tamén o maior peso en canto a número de socios. 43,82% do total de compañías asociadas a Conxemar que se dedican ao produto conxelado son empresas galegas, 40 son sociedades manufactureiras e o resto son empresas comercializadoras de produto conxelado (70 en total). A área de Vigo No estudo presentado esta cuarta feira fíxose especial fincapé no caso da área de Vigo. O seu peso, entre as empresas de Conxemar e sobre o total de sociedades mercantís, concrétase en que teñen 11,5 % da facturación, 5,5% do valor engadido bruto e 3,3% dos empregos directos. Ademais, con respecto ao produto conxelado na comarca de Vigo, o informe tamén revela que se factura 32% da produción estatal, creando un de cada catro euros de riqueza e dando emprego a unha de cada cinco persoas. Conxemar abre as portas nun contexto complicado para o sector pesqueiro Emprego Precisamente en relación ao emprego nas empresas do ramo, a Galiza obtén un peso sectorial de 41,28% sobre o total estatal, achegando Catalunya 15,02% dos empregos directos. A terceira posición corresponde a Andalucía con 11,20% do persoal empregado do sector estatal. No caso da xeración de emprego para as empresas asociadas de Conxemar, destacan en primeiro lugar as galegas con 43,08% do emprego. En segundo lugar, atópase Catalunya, con 19,15% e, en terceiro lugar, Andalucía, que xera 10,15% do total. Por último, o dato sobre a distribución do emprego na actividade do produto pesqueiro conxelado, a Galiza dispón no estudo de 35,77% do persoal das compañías (2,36 puntos porcentuais máis con respecto ao total do sector conxelado no Estado español). Séguea Catalunya (22,09%) e en terceiro lugar Andalucía (11,71%). Emprego feminino O informe presentado esta cuarta feira na sede do Consorcio da Zona Franca de Vigo recóllense tamén datos sobre o emprego feminino no sector. Na industria de produtos pesqueiros, na Galiza, as mulleres representan 57,14% (50% no Estado español), unha porcentaxe que está por riba da media das que traballan na actividade da industria da alimentación (46,67%). Conxemar denuncia que a UE deixa fóra das axudas a transformadores e comercializadores da pesca Na comercialización de produtos pesqueiros na Galiza, as mulleres son 36,04% (27,94% no Estado español), unha porcentaxe que está por riba da media das que traballan na actividade en groso da alimentación (25%). No caso da industria de produtos pesqueiros conxelados na Galiza, as mulleres supoñen 50% (40,91% no Estado español), unha porcentaxe que está tamén por riba da media das que traballan na actividade da industria da alimentación (46,67%). Por último, o estudo presentado indica que en Conxemar o peso do emprego feminino é de 53,29% do total, un diferencial de 4,67 puntos porcentuais por enriba da actividade estatal. A distribución do emprego feminino, segundo esta segmentación é de 10,48% de mulleres en empresas comercializadoras e de 89,52% nas da industria.