Fonda preocupación polo futuro de Alcoa en San Cibrao: a multinacional ve "insostíbeis" as condicións para continuar

O presidente da Xunta da Galiza, Alfonso Rueda, e a conselleira de Economía e Industria, María Jesús Lourenzá, mantiveron esta segunda feira unha xuntanza cos responsábeis da multinacional Alcoa no Estado español. O encontro tiña o obxectivo de analizar o futuro do complexo alumineiro que a compañía mantén aberto na localidade de San Cibrao, no concello de Cervo (A Mariña), unha vez que transcendeu a decisión da corporación estadounidense de paralizar algúns dos investimentos previstos nesa factoría. Lourenzá sinalou ao remate do encontro que os responsábeis de Alcoa trasladaron que os custos "tan elevados" de enerxía no Estado leva a empresa a ter perdas "moi por encima" das que poden asumir. Neste sentido, destacou que a dirección da compañía "non ten tomada ningunha decisión a respecto da planta", de forma que "non supón, no momento actual, que vaian facer ningún procedemento de despedimento nin de fechamento nin de venda da fábrica". Porén, fontes do Goberno galego e do Goberno estatal apuntaron a Nós Diario que a preocupación de ambos os Executivos polo futuro da planta de aluminio de San Cibrao é máxima. O encontro desenvolveuse o mesmo día en que o Ministerio de Industria decidiu convocar unha xuntanza da comisión de seguimento do acordo de viabilidade da factoría de Alcoa en San Cibrao para a vindeira sexta feira, 15 de decembro. As razóns que levaron o Goberno do Estado a adoptar esta medida explícanse pola delicada situación que atravesa o complexo e polo posíbel incumprimento por parte da multinacional estadounidense do pacto asinado coa representación sindical dos traballadores. Neste sentido, desde a compañía indicaron que non incumpriu o acordo de viabilidade. Alcoa paraliza un investimento de 100 millóns en San Cibrao A convocatoria desta reunión chega após o anuncio da multinacional de paralizar a aprobación do proxecto do forno de cocción de ánodos, un investimento chave para a viabilidade do complexo alumineiro, que a compañía tiña comprometido coa representación sindical. Neste sentido, os responsábeis da empresa trasladaron esta segunda feira aos empregados da factoría da Mariña que “o atraso temporal na aprobación do proxecto do forno de cocción de ánodos debeuse á complexa situación financeira que afronta a planta” e aseguraron que “baseándose nas condicións económicas actuais e previsíbeis, necesítase unha solución a longo prazo para afrontar as condicións insostíbeis das operacións de San Cibrao”. O forno de cocción de ánodos, paralizado O forno de cocción de ánodos era o maior investimento comprometido pola empresa no marco do acordo pactado co seu persoal. A actuación, cuxa contía está fixada en 109 millóns de euros, prevía a aprobación do proxecto para novembro deste ano, precisamente a data escollida pola compañía para anunciar a decisión de adiar a súa posta en marcha. A súa construción require dun prazo mínimo de dous anos, polo que a súa entrada en funcionamento situaríase, no mellor dos casos, para finais de 2026, o que implica que non estaría operativo para o retorno á actividade do complexo, previsto para o vindeiro exercicio. Alcoa non retomará a fundición de aluminio até mediados de novembro A decisión de paralizar esta actuación non é o primeiro incumprimento por parte de Alcoa do acordo asinado cos seus traballadores e traballadoras. Nesta liña, en xaneiro deste ano, a empresa decidiu atrasar até o 1 de abril de 2025 o arranque do groso das cubas de electrólise, deixando para o 31 de outubro de 2025 a entrada en funcionamento das 512 cubas coas que conta a planta.Esta mudanza de postura chegou tras pactar en 2021 cos sindicatos, no marco da paralización da actividade no departamento de fundición da factoría de Aluminio, retornar á actividade en 2024, ano no que agora só está previsto pór en funcionamento o 6,2% das cubas. Un pacto incumprido O acordo de xaneiro de 2023 entre a empresa e a maioría da representación sindical, coa oposición da CIG, deixou nunha posición moi delicada o persoal da planta de alumina.Neste caso, a compañía négase a manter o emprego para este colectivo de traballadores e traballadoras, conformado por 510 persoas, para máis alá de 2023, polo que se abre a porta a despedimentos a partir do próximo exercicio. Pola contra, a multinacional estadounidense comprométese a non executar ningún Expediente de Regulación de Emprego (ERE) ou Expediente de Regulación Temporal de Emprego (ERTE) até 2026 na súa factoría xemelga de aluminio, onde se ocupan un número aproximado de 540 operarios e operarias. A preocupación entre o cadro de persoal do complexo alumineiro é evidente. Segundo sinalan a Nós Diario fontes da representación sindical, desde que Alcoa procedeu a paralizar a actividade do departamento de fundición de aluminio en 2022, a factoría mariñá destruíu máis de 100 empregos directos. Persoal de Alcoa sostén que a empresa "non cumpre" os acordos Ao tempo, a carga de traballo minguou de modo considerábel nas empresas auxiliares, polo que existe un temor evidente a unha redución de emprego nunhas compañías que agrupan perto de 500 persoas. O atraso na posta en funcionamento do groso das cubas de electrólise para 2025 e a freo de investimentos como o forno de ánodos pode deixar sen actividade algunha destas empresas para 2024. O cadro de persoal da fábrica de Alcoa reduciuse en perto de 10% desde 2020 As sensacións non son boas entre os empregados do complexo de Alcoa e a poboación da Mariña, unha comarca altamente dependente desta fábrica. Neste sentido, a pasada semana o presidente do comité de empresa e dirixente de Comisións Obreiras, Jose Antonio Zan, sinalaba tras coñecerse a decisión de Alcoa de paralizar o proxecto do forno de cocción de ánodos que “parece que nos caeu unha praga bíblica con esta compañía e non somos capaces de solucionalo”. Nese contexto, acusaba a dirección da multinacional de xogar como “trileiros” e apuntaba que a compañía “ten que cumprir os acordos que asinou. Se non os quere cumprir, o que ten que facer é vender a empresa, cos fondos consignados”. Por outra parte, o voceiro da UXT no órgano de representación sindical de Alcoa, Diego Ballesteros, apunta a Nós Diario que “a execución do forno de cocción de ánodos é indispensábel, polo que non consideramos asumíbel a súa paralización”. Nesta liña, cualifica de "preocupante" a situación e agarda que a empresa forneza máis información ás organizacións sindicais. Por outra parte, o delegado sindical da CIG, Óscar Lara, non agocha a súa preocupación polo momento que atravesa o complexo. En declaracións a Nós Diario, explica a decisión de paralizar o proxecto do forno de cocción de ánodos como “un paso máis de cara ao abandono da planta” e enténdeo como “unha maneira de dicir que non se vai facer”. A este respecto, considérao “un incumprimento máis do acordo e denuncia a destrucción de emprego nos últimos catro anos.