A Fruga denuncia que a estabulación obrigada prexudica as gandarías e "premia" a industria

A recente aprobación dunha modificación regulamentaria do Consello Regulador de Tenreira Galega, que afecta de forma directa a todas as explotacións que producen baixo a categoría de Tenreira Galega Suprema, está a recibir numerosas críticas. En concreto, o apartado máis polémico é o que obriga, por unha resolución da Axencia Galega de Calidade Alimentaria (Agacal) publicada no Diario Oficial da Galiza (DOG), a encortellar os xatos cebados acollidos a esta categoría especial. En opinión da Federación Rural Galega (Fruga), este cambio normativo vai afectar dunha maneira particular todas as explotacións que optaran por un manexo extensivo da súa cabana. Segundo explica a Nós Diario o gandeiro e coordinador de sectores gandeiros da Fruga, Elías Somoza, “as explotacións, con esta medida, terán que acometer investimentos para dar cumprimento á mudanza do regulamento”, neste caso pola obriga de estabular os animais de máis de oito meses durante dous meses ou agrupalos en recintos fechados. “A execución desta medida é unha operación máis de fondo que procura darlle unha promoción máis grande a todo o que, de maneira indirecta, é o cebo industrial”, asegura. A iniciativa parte, para Somoza, de como evolucionou nos últimos anos o sector. “Antes para cebar facían falta xatos de cruce que procedían das explotacións de leite e destas cada vez quedan menos e son intensivas polo que precisan máis recría”, apunta, “con estas dificultades para a Suprema, unha boa parte dela venderase con pouca idade e gasto menor”, engade. A Fruga di que Medio Rural beneficia as gandarías industriais de Suprema coa nova normativa de estabulación A Fruga considera que o futuro da produción de carne de Suprema na Galiza non pasa "por poñer dificultades ás gandeiras e aos gandeiras que utilizan sistemas de manexo en extensivo, senón por darlles facilidades, e favorecer a través das campañas de promoción a súa diferenciación con respecto ás producións de carácter agroindustrial". Esta organización cre que "a Consellaría de Medio Rural ten que rectificar a pesar do peso que teñen determinadas portas xiratorias que a día de hoxe están en certas industrias galegas". Interese da industria Para a Fruga, o efecto negativo que esta obriga pode ter sobre as explotacións extensivas beneficia os cebadoiros industriais, de tal maneira que as explotacións extensivas ao verse obrigadas a acometer estes investimento “decidan vender antes os seus becerros que, loxicamente, iran engordar as explotacións de cebo industrial”. Por este motivo, Somoza sinala que, dalgunha forma, “con esta mudanza imposta pola Consellaría de Medio Rural a través da Agacal, estase a cumprir o acordo do sector cárnico asinado no ano 2022, amparado polo Goberno galego”. A Fruga e o Sindicato Labrego Galego foron, neste caso, as organizacións que rexeitaron dar o seu visto e prace a este pacto. Coincide con esta valoración outro gandeiro, Manuel López Louxedo, que conta cunha explotación de gando vacún na Fonsagrada. "O discurso oficial que se traslada desde a Xunta é que fai falta calidade e un animal rematado, algo que lle interesa á industria", indica en declaracións a Nós Diario, "sobre todo ás grandes que, na Galiza, contan con cebadeiros propios ademais de fábricas de penso e grandes matadoiros", agrega. Outra eiva que lle observa este gandeiro á medida é que non ten en consideración as diferentes circunstancias que ten o territorio galego. "Non é o mesmo cebar na Mariña que na Chaira, o que se fixo foi adoptar unha decisión inxusta para moita xente", aclara López Louxedo. As gandarías de Tenreira Galega de venda directa excluídas das liñas de subvención A Suprema en ecolóxico Outra crítica á liña que está a seguir o Consello Regulador procede doutras categorías, como é o caso das explotacións que traballan con anello, con animais de máis de doce meses. É o caso de Isabelle Gómez, de Friol (comarca de Lugo). "Tenreira Galega Suprema é a categoría que máis interesaba para as grandes superficies", asegura a Nós Diario. O feito de que se empregue un sistema de alimentación tan diferente coa produción ecolóxica pode chegar, coa medida agora aprobada, "a entrar en conflito". A razón sería, para Isabelle Gómez, "a contradición que implicaría que obriguen a ter os animais en cortellos cando o que se procura co ecolóxico é que estean no pasto canto máis tempo mellor". Isto non impide o acceso a concentrados, mais "sempre co animal en liberdade". En relación ás características que desde a Xunta da Galiza se procura conseguir, Gómez entende que é "a estandarización do sistema produtivo que demanda a industria" e desafacerse "das canles diferentes". Como remate, esta gandeira dubida que as medidas sexan beneficiosas para as explotacións. "O consumidor pagará por esa mal chamada calidade que a industria considera, mais suporá un maior consumo de concentrados e o beneficio non quedará na explotación", advirte Gómez. Fruga ve na modificación da IXP ‘Tenreira Galega’ un "serio prexuízo para moitas gandarías galegas Unhas medidas incompatíbeis coa liña da Unión Europea Entre as queixas que se escoitan no sector, en relación á medida de obrigar a estabular os animais, unha das máis repetidas é a que ten que ver coa compatibilidade coa liña que segue a Unión Europea (UE). "En realidade a demanda en Europa é que teñamos 25% de superficie agraria en ecolóxico para 2030, tender a ter os animais nos prados, e agora búscase construír máis cortellos e pasar a depender da fábrica do penso", pon en evidencia Manuel López Louxedo. Esta "obriga" de dar cereal aos animais non é doada de realizar con medios propios. "Neste país é unha utopía, ten que vir de Castela ou en Ucraína, e os produtores non temos culpa desta situación", conclúe. Control nos matadoiros Fronte a esta medida que agora será obrigatoria, López Louxedo propón outros tipo de actuacións que, entende, darían un mellor resultado. "É tan fácil como que os matadoiros controlen os animais que había que marcar", asegura a Nós Diario, "e que os que producimos teñamos a confianza do Consello Regulador para controlalo", entende. Neste sentido, cre que desde as explotacións galegas queren saber con certeza "que non se está a tratar de diferente maneira a industria, que se faga ben o traballo para que o produto chegue en condicións ao consumidor".