Un fondo emiratí busca facerse con Naturgy e os seus recursos naturais na Galiza

A Comisión Nacional de Mercado de Valores (CNMV) suspendeu esta cuarta feira desde primeira hora da mañá a cotización en bolsa de Naturgy, na actualidade segunda produtora hidráulica da Galiza con 1.120 megawatts e 12 encoros (como os de Belesar, Portodemouros ou Castrelo de Miño) e tamén terceira xeradora eólica con 93,2 megawatts e 16 complexos no territorio galego (como os de Monte Peón, Meirama e Porto Vidros). O organismo estatal explicou esta decisión, cando as accións da enerxética subían 1,3%, até os 21,80 euros por título, ante o que consideraron “falta de información relevante” sobre a posíbel entrada no seu capital da eléctrica emiratí TAQA (antes Abu Dhabi National Energy Company) filial de renovábeis da petroleira pública Adnoc. Tal e como adiantou o xornal La Vanguardia esta segunda feira, o holding Criteria Caixa, máximo accionista con 26,7% do total da multinacional, confirmou esta negociación na que entrarían tamén os fondos CVC (20,7%) e GIP (20,6%) polo interese emiratí en facerse co 40%, un investimento que chegaría aos 10.000 millóns de euros. En outubro de 2023 xa soara en círculos económicos o interese de venda do fondo británico CVC da súa participación valorada en 5.100 millóns de euros. Confirmación de Taqa Esta curta feira mesmo, horas despois de que a CNMV tomara a súa decisión, o fondo emiratí confirmou a este organismo que mantén conversacións con Criteria Caixa respecto a "un posíbel pacto de cooperación relativo a Naturgy", así como cos fondos CVC e GIP sobre "a posíbel adquisición das súas accións" na enerxética, aínda que subliñou que "non se alcanzou ningún acordo" con eles. Os recursos naturais galegos fican cada vez máis perto dun fondo dos Emiratos Árabes: Naturgy é suspendida de cotización en bolsa Da mesma maneira, sinalou que se se producise a adquisición, "debería formularse unha oferta pública de adquisición pola totalidade do capital de Naturgy". Ademais, a compañía emiratí engadiu que "non hai garantía algunha de que se vaia a implementar ningunha operación nin certeza en canto aos termos en que, no seu caso, podería realizarse" e que "non houbo ningún achegamento a Naturgy por parte de Taqa", que subliñou que en caso, de alcanzarse un acordo, "publicaríao ao seu debido tempo". Beneficios en 2023 A multinacional obtivo en 2023 un beneficio neto de 1.986 millóns de euros, o que representa un incremento de 20,4% con respecto ás ganancias de 1.649 millóns do ano anterior, nun exercicio no que incrementou os investimentos até os 2.944 millóns de euros, 53% máis, segundo informou a compañía no seu momento. Naturgy segue a ser a segunda produtora hidráulica da Galiza, nun negocio que continúa en mans foráneas, con Iberdrola en primeiro lugar (1.558 megawatts e 13 encoros) e Endesa en terceiro (explota 375 megawatts e seis encoros). Entre as tres controlan 81,68% da potencia hidroeléctrica do país. Beneficios fóra da Galiza Desde o Colectivo de debate enerxético Bidán, Fernando Branco pon no foco con esta noticia o destino dos beneficios económicos da enerxía producida na Galiza. En declaracións a Nós Diario lembra a necesidade de “pór enriba da mesa a necesidade dunha empresa pública de electricidade no país”. Neste sentido, o futuro de Naturgy para Branco “evidencia que no mercado hoxe dependemos do fondo dun país e mañá doutro” coa consecuencia de que “Galiza nunca está no reparto de beneficios nunha actividade estratéxica como a eléctrica”. Recorda a importancia das infraestruturas que ten, non só hidráulicas senón de gas e renovábeis. “En calquera caso, seguimos sen capacidade de decisión e os recursos irán a parar a lugares afastados da Galiza”, conclúe. As compañías eólicas ingresaron na Galiza 793,2 millóns de euros no ano 2023 Unha empresa afastada Os problemas de comunicación e denuncias de irregularidades coa multinacional non foron menores nos últimos anos co seu afastamento da Galiza. O ano pasado, a CIG denunciaba a redución do horario da liña de atención telefónica en galego da Naturgy, servizo que presta a empresa Teleperformance, que se sumaba ás reducións que se viñan realizando desde 2012 froito "da deslocalización" cara outros países. En 2022, por exemplo, a Organización Galega de Montes en Man Común acusaba á multinacional de entrar en montes comunitarios de Teis (Vigo) sen permiso e abandonando restos da biomasa forestal, deixando unha gran cantidade de combustibel no monte. Un caso semellante xa acontecera en 2010 nos municipios de Coirós e Paderne (comarca das Mariñas). O contramestre retirado Francisco Maceira, relata a Nós Diario que ese ano varias persoas contratadas pola daquela denominada Gas Natural Fenosa entraron en propiedades dos montes do Ourovello e de Coirós para realizar instalacións eléctricas sen solicitar o correspondente permiso. Denunciando a situación tiveron que acudir á xustiza que rematou por darlle a razón á multinacional. “Xa era difícil falar cunha empresa con sede en Barcelona, agora se hai que tratar con Abu Dhabi aínda será peor”, asegura a Nós Diario. Lembra, ademais, o cambio que deu a compañía cando se trasladou e abandonou o trato directo que tiña. "A automatización das chamadas impediu que se realizaran moitas reclamacións cando tiñamos algún problema, non quero nin imaxinar como será agora se se leva a cabo a venda a un fondo dos Emiratos Árabes", considera. O proceso de afastamento directivo da Galiza da enerxética coruñesa A pegada en territorio galego de Naturgy non se explicaría sen a absorción en 2009 de Unión Fenosa. Esta nacera como Forzas Eléctricas do Noroeste, SA, na Coruña en 1943 polo empresario Pedro Barrié de la Maza tras facerse coa que tiña José Miñóns, empresario e deputado republicanoi fusilado poucos meses despois do golpe de Estado de 1936. A fidelidade de De la Maza ao réxime franquista foi premiada cun monopolio que lle permitiu un despregamento a nivel estatal nos anos 60 e 70 até que en 1983 rematou coa súa fusión coa Unión Eléctrica Madrileña. Pontón avanza un modelo enerxético "ao servizo da Galiza" e non ao de Endesa, Naturgy ou Iberdrola En abril de 2009, a través dunha Oferta Pública de Adquisición (OPA), realizada por Gas Natural sobre o capital social de Unión Fenosa, e empresa con sede en Barcelona pasou a ser titular de 95,22 % do capital social de Unión Fenosa. Tras asimilar todos os activos da compañía pasou a comercializalos baixo o nome unificado de Gas Natural Fenosa. O nome actual coa que se lle coñece, Naturgy (Naturgy Energy Group, S.A), acordouse o 27 de xuño de 2018 na Xunta Xeral de Accionistas. Con esta nova denominación figuran os negocios da compañía no Estado español e a nivel internacional e o seu consello de Administración está presidido polo empresario mallorquín Francisco Reynés. O fondo emiratí interesado en facerse con Naturgy, Taqa, está controlada en 90% polo emir de Abu Dhabi. Creouse en 2005 e conta na actualidade con 5.000 persoas empregadas. O seu ámbito de investimentos está xestión da auga e a electricidade, operando en varios países de todo o mundo.