O Estado tramita a autorización de oito encoros na Galiza cunha potencia de 3.095 MW

O Ministerio de Transición Ecolóxica (Miteco) tramita a autorización na Galiza de oito proxectos hidráulicos cuxa potencia total sitúase en 3.095 megawatts (MW). A falta de que o organismo da Consellaría de Medio Ambiente, Augas da Galiza, descarte un dos dous encoros solicitados para o río Tambre, á altura do Concello de Brión (comarca de Compostela), as previsións apuntan a un incremento na capacidade de xeración eléctrica de orixe hidráulica da Galiza de perto de 82,7%. A maior parte das iniciativas están promovidas por empresas con sede social fóra da Galiza. Iberdrola é o primeiro operador hidráulico na Galiza con 13 encoros e unha potencia instalada de 1.558 megawatts. Porén, aspira a facerse con outros 900 MW máis no concello de Vilariño de Conso, na comarca de Viana. O seu proxecto pasa por erguer unha central de bombeo entre os encoros de Cenza e O Bao, que suman actualmente 481 MW e fan deste municipio o segundo con máis potencia instalada da Galiza. Non por un casual, Vilariño de Conso perdeu 1.152 habitantes desde a edificación da primeira central hidráulica en 1975, sendo a súa poboación a segunda máis empobrecida da circunscrición de Ourense, cunha renda 7.423 euros inferior á media galega. Naturgy é multada con seis millóns de euros por manipular o prezo no mercado eléctrico A compañía andaluza Magtel busca os permisos para sacar adiante dúas centrais hidráulicas na Galiza cunha potencia conxunta de 410 MW. Unha delas, de 160 MW, está proxectada a carón dos encoros de Prada e Santa Eulalia, situados nos concellos da Veiga e do Bolo, na comarca de Valdeorras. A outra, con 250 MW, sitúase no lago das Pontes, emprazamento ao que tamén aspiraba un consorcio formado pola portuguesa de capital chinés EDP e a galega Reganosa para erguer unha planta de bombeo cunha potencia de 570 MW, que foi rexeitada por Augas da Galiza. As actuacións previstas pola eléctrica destacan polo seu impacto ambiental. Así, a Asociación para a Defensa Ecolóxica de Galiza (Adega) ten denunciado que as obras proxectadas pola empresa andaluza obrigan a "furar o Macizo Central" nun “territorio incluído na proposta de ampliación da Rede Natura que comezou a tramitar a Xunta da Galiza no ano 2008” e “a apertura de quilómetros de pistas, canteiras e vertedoiros, alén da correspondente liña de evacuación eléctrica”. Magtel e a xustiza Magtel, con sede fiscal en Córdoba, é unha vella coñecida da Xustiza. Apareceu ligada a diversos casos de corrupción, entre eles, a peza aberta polo presunto arranxo na adxudicación da mina sevillana de Aznalcóllar, que ten levado aos tribunais varios membros do Goberno andaluz de Susana Díaz. O xulgado número 3 de Sevilla solicita por estes feitos 17 anos de cárcere para os irmáns Mario e Isidro López Magdaleno, propietarios de Magtel, tendo xa fixada a data do seu xuízo para finais de 2024 ou comezos de 2025. A Eurocámara apoia unha reforma do mercado eléctrico que prohiba os cortes de luz Feroe Ventures &amp; Investments, sociedade vinculada ao fondo Sixth Street Partners e Ithaka, titular do complexo industrial de Xeal en Cee e Dumbría, na comarca da Costa da Morte, traballa para levantar un encoro cunha potencia instalada de 400 MW no concello de Mazaricos, na comarca do Xallas. Precisamente, este grupo xa explota diversas centrais hidráulicas no curso do Xallas en Dumbría, que suman 134 MW. O grupo propietario de Xeal proxecta emprazar esta instalación nas proximidades do encoro de Santa Uxía, situado perto do Ézaro, que no seu momento provocou que a fervenza ficara seca durante varios anos. Malia o seu evidente impacto ambiental, Augas da Galiza deulle a súa aprobación á proposta, que agarda agora pola autorización definitiva Ministerio de Transición Ecolóxica do Goberno do Estado español. San Isidro Solar 3, sociedade con sede fiscal en Granada e ligada a Navitas Energía, ten solicitado os permisos para construír unha central hidráulica reversíbel no río Miño, a carón do encoro de Castrelo de Miño (O Ribeiro). A planta prevé unha potencia instalada de 260 MW e a súa execución obrigaría a anegar 22 hectáreas de terra de cultivo, dedicadas na súa totalidade ao viñedo. Galiza exportou no primeiro trimestre do ano 51,9% da súa produción eléctrica Navitas Energía é propiedade do grupo Cuerva, un conglomerado empresarial andaluz, ligado ao negocio eléctrico desde 1939, que ten como conselleiro delegado Gerardo Cuerva, importante dirixente da Confederación Española de Organizacións Empresariais (CEOE) e presidente da Confederación Española da pequena e da mediana empresa (Cepyme). Neste sentido, pasa por ser un dirixente patronal moi próximo ao Partido Popular. Capital Energy pelexa por 339 MW nunha central a erguer sobre o río Tambre, na parroquia de Cornada, en Brión. A empresa, propiedade do pai dos netos de Florentino Pérez, Jesús Martín Buezas, ten a súa sede fiscal en Madrid e conta con 246 MW eólicos autorizados na Galiza, á espera de desenvolver. Neste caso, por este mesmo emprazamento compite o grupo Tasga, que presenta un proxecto para explotar 470 MW de orixe hidroeléctrico. A excepción de Tasga Tasga é o único grupo galego que entrou até o momento nesta nova febre hidroeléctrica. A compañía con sede en Compostela e ligada ao presidente da construtora Copasa, José Luís Suárez, tramita diante do Miteco a autorización para erguer unha central hidroeléctrica de 352 MW sobre o lago das Encobras, en Cerceda (comarca de Ordes), tras outorgar a concesión Augas da Galiza. As eléctricas obtiveron dos ríos galegos beneficios por 756 millóns no ano 2022 As centrais hidráulicas de bombeo ou reversíbeis son un tipo de instalación para a xeración eléctrica que conta con dous encoros a distinta altura que permiten almacenar a auga nos momentos de menor demanda e aproveitala para producir enerxía nas horas de maior consumo co obxectivo de satisfacer toda a demanda eléctrica. Así, nas horas "val" úsase a enerxía sobrante para elevar a contida no encoro situado a maior altura e nas horas "pico" funciona como unha planta hidroeléctrica convencional, enviando auga do encoro superior ao inferior. María Cadaval: "Temos que aproveitar como país os nosos recursos naturais" Os proxectos en marcha con esta tecnoloxía, no caso de saír adiante, implicarían un incremento da potencia hidráulica galega de 3.095 megawatts, o que significaría 82,7% máis que na actualidade. Precisamente, a Galiza é unha gran produtora de electricidade de orixe hidráulica, con 166 encoros, 45 de grande hidráulica e 121 de pequena hidráulica, cunha potencia instalada de 3.738 megawatts, que representa aproximadamente 24% da electricidade desta orixe xerada no Estado e 18% da potencia total en funcionamento. Os beneficios obtidos polas compañías enerxéticas dos ríos galegos en 2022 situáronse en 755,6 millóns de euros. As ganancias desa anualidade foron inferiores en 66,2 millóns de euros ás de 2021 pero situáronse por riba dos resultados dos pasados exercicios. Neste sentido, os encoros galegos achegaron ás empresas eléctricas beneficios de 310,4.