O Estado perdoou en 10 anos ás grandes empresas impostos por 787.190 millóns

O Goberno español perdoou ás empresas domiciliadas no Estado 1,15 billóns de euros en tributos, mediante diversas bonificacións no Imposto sobre Sociedades (IS) aplicadas no período de 2012 a 2021.Precisamente, o Imposto sobre Sociedades é un tributo de carácter periódico, proporcional, directo e persoal que grava a renda das sociedades e demais entidades xurídicas cuxa sede fiscal está emprazada no Estado. O tipo impositivo xeral do Imposto sobre Sociedades está fixado en 25% para pequenas e grandes empresas. Porén, este varía entre 30% e 1% en función do tipo de mercantil que se trate. Neste sentido, os datos achegados pola Facenda española indican que a carga fiscal é maior para as pequenas e medianas empresas (Pemes) que para as grandes corporacións, agrupadas fiscalmente como grupos consolidados. Madrid recadou 49% dos impostos totais do Estado malia representar 19,4% do PIB español O tipo efectivo real do Imposto sobre Sociedades está moi por baixo do fixado na normativa. Segundo se recolle no Informe de recadación impositiva da Axencia Estatal da Administración Tributaria (AEAT) de 2022, o tipo efectivo real sobre o Resultado Contábel Positivo do Imposto sobre Sociedades de 2021, último ano con cifras, sitúase de media para o total das compañías en 9,6%, é dicir, 0,6 puntos menos que en 2012.A situación é aínda máis notábel no caso das grandes corporacións empresariais, denominadas pola AEAT como grupos consolidados. Neste caso, o tipo efectivo real sobre o Resultado Contábel Positivo do Imposto sobre Sociedades de 2021 fica de media en 5,9%, se ben unha parte destas mercantís tributan a un tipo de 1%. Os grupos consolidados son o grandes favorecidos das bonificacións ao Imposto sobre Sociedades impulsados polo Estado. Así, en 2021, o Estado perdooulles tributos por unha contía de 98.799 millóns, que representan 63,3% do total das exencións aplicadas polo Executivo español. Na mesma dirección, nos últimos 10 anos o Goberno condonou ás grandes corporacións impostos por un valor de 787.190 millóns de euros, que significan 68,4% do conxunto das bonificacións polo Imposto de Sociedades aprobadas polo Executivo. O Estado transferiu en 2021 a Galiza 5.082 millóns menos dos recadados en impostos Beneficios fiscais A contía total dos beneficios fiscais outorgados polo Goberno español ás empresas entre 2012 e 2001 sitúase moi próximo ao Produto Interior Bruto (PIB) do Estado de 2022. Concretamente, na pasada anualidade o PIB alcanzou un total de 1,32 billóns de euros, isto é 0,17 puntos máis dos tributos perdoados ás mercantís. Asemade, as bonificacións fiscais polo Imposto sobre Sociedades nos 10 anos referidos representan un valor semellante a 73,2% do total da débeda pública española, cuxo volume marcou no primeiro trimestre de 2023 até 1,57 billóns de euros. A tributación das empresas contrasta coa dos particulares. Neste último caso, o imposto que grava a renda obtida nun ano natural polas persoas físicas residentes no Estado español denomínase Imposto sobre a Renda das Persoas Físicas (IRPF). O IRPF, regulado pola Lei 35/2006, de 28 de novembro, do Imposto sobre a Renda das Persoas Físicas, é un tributo persoal, progresivo e directo, considerado por moitos facendistas como o piar máis significativo do sistema fiscal estatal. O Goberno galego recada por impostos ao xogo 160 millóns menos do que debería O tipo impositivo do IRPF varía en seis tramos en función dos niveis de renda. Así, para os tramos de renda de menos de 12.450 euros os tipos son de 19%, para os tramos de 12.450 a 20.199 euros os tipos son de 24%, mentres que para os tramos de renda de 20.200 a 35.199 euros os tipos son de 30%. Para os tramos comprendidos entre os 35.200 e os 59.999 euros os tipos son de 37%, para os de 60.000 a 299.000 os tipos son de 45% e para os tramos de renda de máis de 300.000 euros os tipos son de 47%. O tipo efectivo do IRPF é máis elevado que o do Imposto sobre Sociedades. Neste sentido, o Informe de recadación impositiva da Axencia Estatal da Administración Tributaria (AEAT) de 2022 sinala que en 2021 situouse en 13,2%, 3,6 puntos por riba do tipo efectivo do Imposto de Sociedades para as empresas e 7,3 puntos por encima do tipo efectivo do Imposto de Sociedades para as grandes corporacións. O Imposto sobre Sociedades representa cada día menos no conxunto da recadación tributaria do Estado. Se por volta de 2007 achegaba 44.823 millóns de euros e significaba 25,8% da recadación total, en 2021 aportaba 32.176 millóns de euros e supoñía 13,7% da recadación total. Precisamente, a caída da contribución do Imposto de Sociedades á Facenda española comeza a acentuarse a partir de 2015, após a entrada en vigor da reforma do tributo aprobada polo Goberno de Mariano Raxoi en 2014, coa intención de alixeirar a carga fiscal das grandes empresas. Os impostos xestionados pola Administración galega xa poden ser pagos por Bizum O IRPF rexistra un comportamento diverxente ao Imposto sobre Sociedades. Mentres este último non deixa de perder peso no cesto fiscal, o primeiro aumenta a súa importancia, pasando de significar en 2007 41,9% de toda a recadación tributaria con 72.614 millóns de euros a marcar en 2021 até 48,2%, isto é 94.546 millóns de euros. A este respecto, o economista Xosé Díaz sinala a Nós Diario que "non hai un comportamento homoxéneo na evolución do IRPF, IVE e Imposto de Sociedades, desligándose este tributo nos últimos anos da lóxica dos dous primeiros". As chaves dunha reforma fiscal que avance nun modelo progresivo Os grandes grupos empresariais son os principais beneficiados das políticas fiscais do Estado. Neste sentido, cobra unha capital importancia a Lei 27/2014, do 27 de novembro do Imposto sobre Sociedades, aprobada polo Goberno de María Raxoi e vixente desde 2015, que estabelece toda unha serie de novas bonificacións para as mercantís. A este respecto, a economista Erika González, autora de A onde vai o capitalismo español, indica que "un piar central do incremento dos beneficios das empresas após 2014 son as grandes bonificacións fiscais do Imposto de Sociedades, coherente coa política de loita de clases desde arriba imposta por Raxoi". O economista e antigo presidente da Comisión de Economía do Parlamento da Galiza, Xosé Díaz, sinala a Nós Diario "a necesidade da reivindicación dunha reforma integral do sistema fiscal de maneira que aos ricos e ás grandes corporacións e a todos os beneficios fiscais legais e ilegais, ás sociedades de investimento de capital variábel (Sicav) e demais, se lles fixe un tipo de gravame arredor de 25% efectivo e se eleven os topes máximos vixentes do IRPF e Patrimonio, dotándoos dunha progresividade a través do incremento do número de tramos, de tal maneira que en función da capacidade económica, quen teña máis pague máis". As contribuíntes da Galiza son as que menos asignacións fan á Igrexa no IRPF Díaz aposta por "revisar moitos dos impostos existentes, como o IVE ou Patrimonio, para que deixe de descansar o groso da recadación tributaria na súa meirande parte sobre as clases populares. Isto sen considerar as cotizacións sociais, de facto, un imposto sobre os traballadores".