Eólica: algo máis que lobby entolecido

Igual que os temporais de outono que vimos padecendo, Aline, Bernard, Celine, Ciaran, agora Domingos, e así até que remate este escuro novembro, retumban os tronos da presión mediática do lobby empresarial, con pretensións na eólica, para se instalar na Galiza. Neste momento, a polémica (digamos construción de opinión) montada é para crear ambiente favorábel á novos parques en terra e novos investimentos na eólica mariña. Para montar ben o estaribel polémico, hai que anular, aniquilar, deostar, derrubar os que defenden a posición favorábel a non máis eólicas no país. Os servizos de propaganda do lobby eólico víronse atinxidos por unha complicación legal non esperada: o TSXG emitiu sentenzas anulando varias concesións da Xunta (algunhas confirmadas polo Tribunal Supremo). Ou estaban mal concedidas ou a lei é mellorábel: ningunha das dúas cuestións é responsabilidade do alto tribunal nin dos ecoloxistas. Entolecido anda un xornal coruñés subvencionado polos catro costados pola Xunta. O nome do tal, non citado, reproducímolo con burla nun cómic da Asemblea Nacional-Popular Galega denunciando o papel que xogaba cara ao país e, de paso, zurrando no nacionalismo: 'A Coz de Galicia'. Foi moi boa descrición a asociación dese nome co do seu papel mediático sempre servindo a dous amos: o capital español/estranxeiro e os gobernantes orgánicos a esa función outorgada a Galiza: ser boa serva, dócil, apoucada, aberta, receptora do que veña, exportadora de persoas, de capital (en forma de aforro) e de beneficios para outras economías, outros países, outros intereses. Naquela época había un colaborador diario encargado do subeditorial –en derradeira páxina– que arremetía contra os nacionalistas. Os insultos eran do calibre de "terroristas" e calquera cualificativo que lle cadrase ben para acompañalo. Nunha ocasión, supoño que de puro despiste, tamén nos chamou 'ciclistas', que para el debía ser algo ben duro e de significado rotundo de menoscabo da dignidade humana. Negocios novos A respecto da produción de enerxía eléctrica, os galegos que miramos polo país observamos que enerxía eléctrica xa se produce, xa temos. En Galiza, prodúcese para as empresas dedicadas a iso, con cartos propios, máis subvencións directas: cartos de todos. Prodúcese para que as empresas donas do capital vendan esa enerxía ao prezo que decidan e aquí págase igual que onde non cargan cos custos medioambientais, e, finalmente, cando exportan son as produtoras as que se benefician, nun comercio intra-industria, non de exportación galega. Do emprego xa non falamos porque é de mantemento: unha cifra ridícula como para poder citar. Cal é o miolo da construción de opinión? Que se albiscan novos negocios para investimentos en enerxía e os novos inversores ávidos de participaren neses gaños precisan "posicionarse". Non é tanto o presente como o futuro en forma de posición ou de ocupación garantida. Non imos ter industria por máis parques. O producido hoxe xa se exporta, fano as empresas Neste momento 'A Coz' realiza ese papel de construción de opinión con amplo abano de colaboradores de todo tipo (mesmo hai plumas non pagadas), para falar a favor da instalación de novos parques eólicos e subsidiariamente deostando as accións preventivas en contra da localización de comenencia da nova enerxía eólica mariña. Se simplemente se tratase dunha campaña creada para favorecer o lobby eólico, semellaría algo máis, do mesmo de sempre. Mais, nesta ocasión, é de tal calibre amarelo que o menos importante son os contidos dos libelos, artigos ou excrecencias publicadas; é o cariz que ten tomado de fomento do odio enfocado fronte ás decisións do TSXG que en uso –exclusivamente– da interpretación da lei existente, resolve en contra das concesións da Xunta para novos parques. E tamén, ou de paso, facer fronte aos que desexando unha industrialización do país, non necesitamos máis produción de enerxía. Sobra. Sempre sobrou, xa que as empresas exportaron, moito antes de ter cubertas as necesidades de servizo eléctrico no país, e por moita que producísenos NUNCA se derivou industria no país por dispor de electricidade. Están quedando espidos os lobbistas cos seus medios, nesa especie de desesperación por anular un pensamento e uns argumentos críticos contrarios á necesidade de que Galiza afonde na súa entrega como país, como posuidora de recursos naturais propios e da súa capacidade decisoria de novos usos do capital, veña este de onde viñer. Xa hai produción hidroeléctrica e eólica en terra. Calquera modificación re-potenciadora na xa instalada crea un múltiplo aceptábel de novas producións. Non imos ter industria por máis parques. O producido hoxe xa se exporta, fano as empresas, e mentres o tendido ex Fenosa siga estando prendido con chinchetas e cada día de temporal queden usuarios sen servizo, ou non estea electrificada a liña ferroviaria, ou non haxa tren urbano e periurbano electrificado, vai ser moi difícil que 'A Coz' e a súa opinión construída logre o seu fin.