Entran en vigor os novos aranceis fixados por Trump: 20% para a UE e 104% para a China

Os aranceis de 20% impostos polos Estados Unidos aos produtos da Unión Europea entraron en vigor esta cuarta feira, despois de que a Casa Branca aplicase un arancel universal de 10% a semana pasada e anunciase un incremento específico para algúns países e rexións a partir deste 9 de abril.

O presidente de Estados Unidos, Donald Trump, que denominou estas medidas como "aranceis recíprocos", defende que esta estratexia proteccionista é a "única maneira de curar" os déficit financeiros "masivos" coa China ou a Unión Europea, e di que con eles busca protexer sectores chave da economía estadounidense.

Os Estados Unidos tamén aplican desde esta cuarta unha nova rolda de aranceis de 50% a China, o que incrementa os gravames totais ao país asiático até 104%, tras a decisión do Goberno chinés de non retirar as súas tarifas de represalia de 34% sobre os EUA. Como resposta á política arancelaria de Trump, a Comisión Europea proporá unha nova quenda de aranceis de 25% a produtos estadounidenses, cuxa recadación se activará de maneira progresiva en tres datas –15 abril, 16 de maio e 1 de decembro, esta última só para a soia e améndoas–.

Aceiro, aluminio e automóbiles

Ademais do arancel xeral de 20% que aplican xa os EUA á UE, algúns produtos xa contaban cunha tarifa especial, como é o caso do aceiro e o aluminio, vehículos, viños, produtos agrícolas, semicondutores, produtos enerxéticos e farmacéuticos.

En concreto, os Estados Unidos impoñen desde o pasado 12 de marzo un arancel de 25% ao aceiro e aluminio, cuxo impacto Bruxelas estima en 28.000 millóns de dólares. A Casa Branca anunciou tamén un arancel de 25% aos países que compren petróleo ou gas de Venezuela, que en principio entrou en vigor o 2 de abril.

Ademais, desde a medianoite do pasado 3 de abril, os EUA puxo en marcha un arancel de 25% ás importacións de automóbiles. Canadá, que sorteou os aranceis de polo menos 10% que Trump impuxo practicamente todo o mundo o pasado 3 de abril, si que se viu afectada por esta taxa de 25% á importación de vehículos.

Como resposta, o primeiro ministro canadense, Mark Carney, puxo en marcha esta medianoite un arancel de 25% aos vehículos fabricados nos Estados Unidos que non cumpran coas especificacións do T-MEC, o tratado que ambos manteñen con México.

"Haberá aranceis de 25% sobre todos os vehículos non conformes co T-MEC procedentes dos Estados Unidos, así como gravames de 25% sobre o contido dos vehículos conformes co T-MEC que non procedan de Canadá ou México. O presidente Trump provocou esta crise comercial e Canadá está a responder con propósito e con forza", asegurou Carney nun post en X.

Outros aranceis sen data de aplicación

Entre os aranceis anunciados polos Estados Unidos con data de aplicación pendente, atópanse as tarifas de 25% ou máis para produtos enerxéticos, semicondutores e farmacéuticos, cuxa taxa se anunciou o 18 de febreiro. Neste sentido, Trump explicou que os aranceis aos semicondutores e aos produtos farmacéuticos poderán subir "substancialmente máis" no transcurso dun ano e que estas taxas non entrarán en vigor de inmediato para dar tempo ás empresas a trasladar as súas fábricas aos Estados Unidos.

A Administración de Trump avisou, así mesmo, o pasado 3 de marzo, da súa intención de aplicar aranceis especiais a produtos agrícolas, cuxa tarifa non se especificou. Ademais, ameazou á UE o xoves 13 de marzo con poñer un arancel de 200% a todos os viños e produtos alcohólicos procedentes da Unión Europea se Bruxelas aplicaba un gravame de 50% para o whisky estadounidense.

Ante esta ameaza, a Comisión Europea sacou finalmente o bourbon e o viño da lista de produtos estadounidenses aos que aplicará até un 25% de aranceis, de acordo con a gama de produtos que os 27 votarán esta cuarta feira.