Ence: 6 millóns de Imposto de Sociedades en Madrid e 157.000 euros na Galiza

O informe de sustentabilidade de Ence referido a 2021, último ano con datos, sinala que nese exercicio a compañía tributou polo Imposto de Sociedades no conxunto do Estado 8,7 millóns de euros. A contía máis elevada -6,01 millóns- foi abonado en Madrid, comunidade onde non conta con ningún centro produtivo, sufragándose as cantidades restantes noutros territorios onde desenvolve as súas actividades industriais, sexa no ámbito da xeración de enerxía sexa no da fabricación de pasta de papel. Ence paga na Galiza polo Imposto de Sociedades 157.000 euros. En Asturias, onde explota unha pasteira e unha factoría de produción eléctrica por coxeración, non tributa por este concepto. Porén, naquelas comunidades onde conta con centrais de produción eléctrica por biomasa, achega 2,49 millóns, a razón de 1,42 millóns en Andalucía, 953.000 euros en Castela-A Mancha e 111.000 euros en Estremadura. Rueda aprobará na primavera a lei que autorizará 300 hoteis na costa galega Madrid acolle as oficinas centrais da compañía, así como a súa sede fiscal e social. Nesta comunidade, a compañía non desenvolve ningunha actividade de produción de electricidade ou pasta de papel, porén concentra os seus principais directivos. A maiores, acolle unha parte importante da central de compras, o que explica que o groso dos seus provedores e empresas contratistas estean emprazados, tamén, na capital do Estado. As liñas de negocio de Ence en Pontevedra céntranse na fabricación de celulosa e na xeración de electricidade. Segundo a memoria da compañía para 2021, “ten unha capacidade de produción de 515.000 toneladas ano de pasta de celulosa” e ocupa “409 empregados”. Ao tempo, nese exercicio “xerou máis de 256.000 megawatts de enerxía a través de dúas turbinas que aproveitan a biomasa derivada da árbore no proceso de produción de celulosa. A potencia instalada de xeración de enerxía renovábel procedente da biomasa na nosa fábrica galega é de 35 megawatts”. Arregui, o home de Ence na foto da investidura de Feixoo Os beneficios fiscais da compañía en Pontevedra son moi reducidos. Así, a empresa ingresa ao Estado en concepto de Imposto de Valor Engadido (IVE) derivado da súa actividade en Lourizán 601.000 euros, mentres que en Asturias achega 2,9 millóns, en Andalucía 2,08 millóns, en Estremadura 2,9 millóns e en Castela- A Mancha 4,8 millóns. Os custos sociais Os custos sociais e ambientais da pasteira son elevados para a poboación da comarca pontevedresa. A este respecto, o catedrático de Bioloxía e antigo presidente da Asociación para a Defensa Ecolóxica da Galiza (Adega), Ramón Varela, sinala a Nós Diario que “Ence é unha das industrias máis contaminantes da Galiza, especialmente polas súas verteduras á auga, das que consome máis auga e ten moitas máis verteduras que a cidade de Pontevedra”. O alcalde de Pontevedra comprométese a seguir loitando para sacar Ence da ría A propia empresa recoñece no seu informe de sustentabilidade de 2021 que consome anualmente 12,4 millóns de metros cúbicos de auga e que verte á ría de Pontevedra a través do emisario submarino da Estación Depuradora de Augas Residuais (EDAR) dos Praceres 10,7 millóns de metros cúbicos. As verteduras totais no citado exercicio recollen 93 toneladas de nitróxeno total, 596 quilogramos de zinc e unha suma de carbono orgánico total (COT) de 952 toneladas. Varela apunta que se descoñecen “outras verteduras de cadmio, cromo, cobre, níquel ou chumbo porque non dan o limiar de declaración PRTR”. A PRTR, cuxas siglas se corresponden con European Pollutants Release and Transfer Register, en galego Rexistro Europeo de Emisións e Transferencias de Contaminantes, recolle información sobre a emisión de sustancias contaminantes á auga, ao aire e á terra a partir duns determinados niveis. A situación non é mellor no referido aos residuos e emisións á atmosfera. Así, en relación co primeiro, Ence destaca que 143,5 toneladas dos residuos xerados son perigosos e 40 toneladas non. A respecto do segundo aspecto, Varela indica que “as emisións segundo o rexistro PRTR e o informe de sustentabilidade de Ence para 2021 non coinciden exactamente”. Neste sentido, os datos oficiais procedentes de PTRT rexistran emisións de 67.000 toneladas de dióxido de carbono, 742 toneladas de nitróxeno e 73 toneladas de dióxido de xofre. Formoso asegura que Ence "non debería estar" na ría mais que "hai que convivir con esa realidade" A acción contaminante de Ence fica demostrada. Nesta dirección, pronunciouse en 2002 a Audiencia Nacional, condenando a Celulosas de Pontevedra por delito ecolóxico, após acreditar contaminación atmosférica e verteduras contaminantes entre 1984 e 1997. A sentenza foi resultado dun acordo entre o xuíz e seis ex directivos da compañía para os que a Fiscalía solicitaba tres anos de cárcere. O impacto da pasteira na saúde da veciñanza da comarca de Pontevedra continúa a ser obxecto de discusión. Neste sentido, Varela lembra que “en estudos comparativos de varias cidades levados a cabo nos anos 80, a cidade de Pontevedra superaba a media de enfermidades doutras". Así, lembra que tiña "1,67 máis casos de enfermidades respiratorias que nas restantes seis cidades galegas". Pontón considera "inexplicábel" a sentenza de Ence e acusa o Supremo de "trato de favor" "A comarca de Pontevedra tiña 1,83 máis casos de procesos respiratorios que na media das seis cidades, 1,37 máis casos de gripe, co risco de ter gripe para os seus habitantes de 1,85 veces maior, e tiña 1,29 máis casos de pneumonías”. O Estado subvencionou a pasteira de Pontevedra en 2021 con 699.869 euros A pasteira de Ence en Pontevedra vén recibindo desde hai anos axudas públicas de diferentes institucións. En 2021, o Ministerio de Industria, Comercio e Turismo do Goberno do Estado subvencionou a factoría con 699.869 euros procedentes da liña de apoio ás empresas electrointensivas. Porén, non foi a única axuda percibida pola compañía dentro deste programa, recollendo o seu informe de sustentabilidade de 2021 que a súa planta de Navia (Asturias) percibiu polo mesmo concepto 628.798 euros. A compañía inclúe no seu informe financeiro de 2021 que as subvencións recibidas en 2021 suman un total de 1,68 millóns de euros, “destinadas principalmente a apoiar proxectos de investimento cun elevado compoñente de aforro enerxético, que están condicionadas á execución e xustificación de determinados proxectos de investimento”. A maiores, conseguiu nesa mesma anualidade axudas en concepto de compensación por dereitos de emisión por unha contía de 3,07 millóns de euros. Diferenzas no seo do PSdeG sobre Ence As axudas públicas a Ence non rematan aquí. Neste sentido, a empresa afirma que obtivo "créditos a tipos de xuro favorábeis por baixo dos tipos de mercado e vixencia de até 10 anos, que financian proxectos desenvolvidos polo grupo para a ampliación e mellora da capacidade produtiva das fábricas de produción de celulosa, así como ao desenvolvemento da actividades de investigación e desenvolvemento”. A contía das mesmas alcanza neste caso 105.000 euros.