Economistas chaman a "coidar" o comercio da Galiza coa China ante a guerra comercial

Ao anuncio da Comisión Europea dunha suba de aranceis aos coches eléctricos chineses de até 38% a aplicar esta quinta feira, 4 de xullo -secundando así a guerra comercial dos Estados Unidos de América (EUA) contra o xigante asiático-, seguiuno o anuncio de Beijing de levar a cabo inspeccións ás importacións de porcos procedentes da UE por competencia desleal. A resposta da China deu paso a unha tregua e ás negociacións que aínda continúan. No marco das conversas, a UE desbotou subir esta quinta feira os aranceis, mais puxo xullo como mes límite para incrementalos. Para o presidente do Instituto Galego de Análise e Documentación Internacional (Igadi) e asesor do Observatorio da Política China, Xulio Ríos, o asunto “é máis de xeopolítica que de economía”, cunha “situación inédita porque normalmente os países cando adoptan aranceis fano para protexer unha industria ou a resultas da presión da propia industria local. Neste caso é bastante curioso que a maior parte do sector automobilístico está en contra dos aranceis, di que non é o camiño". Tensións comerciais entre a UE e China en clave galega Ríos circunscribe esta posíbel guerra comercial da UE coa China a un “seguidismo e presións dos EUA, non é casualidade que en maio eles anuncien aranceis de 100% e agora a UE vaia detrás, e veremos en que acaba, pero é un dato sorprendente que os grandes fabricantes de automóbiles non secunden esta política”. María do Carme García Negro, doutora en Ciencias Económicas e Empresariais e profesora do departamento de Economía Aplicada da Universidade de Santiago de Compostela (USC), explica a Nós Diario que “o molde para o que foi creada a Organización Mundial do Comercio (OMC) é moi estreito para a China e iso ten provocado conflitos, problemas, discusións e ameazas”. Explica García Negro que “o molde da OMC está feito á medida de Europa e dos Estados Unidos de América, pero non do caso chinés”, e apela á calma, “neste momento aínda a China e a UE están discutindo” no seo da OMC, e lembra tamén que a China “ten acordos con empresas distribuidoras de coches na Galiza, van seguir vendendo coches aquí, teñen un gran mercado”. Empresas galegas facturaron máis de 234 millóns en exportacións coa China Dolores Riveiro, profesora e doutora do Departamento de Fundamentos da Análise Económica da USC, explica a Nós Diario que “a China é un país exportador, non ten interese algún en entrar nunha guerra comercial”. Sinala Riveiro que “de imporse o arancel, a UE vai ter que xustificar por que o pon, para Europa o automóbil é importante, para Galiza tamén. O principal sector de exportación é o automóbil, non é Inditex”. Sector primario 2% das exportacións do Estado español van á China, no caso da Galiza 0,8% das exportación galegas van cara ao xigante asiático. Segundo os datos oficiais do Instituto de Estudos e Desenvolvemento de Galiza (Idega), 16% das exportacións do Estado á China son carnes, fundamentalmente porco, e hai un capítulo nestes produtos que vende Galiza á China (tamén o resto do Estado), que alcanza a metade dos produtos cárnicos que nos mercan os chineses, e que se corresponde cos “despoxos”. A UE únese á guerra comercial dos Estados Unidos coa suba de aranceis aos coches eléctricos da China Aínda que as vendas de porcino galego á China medraron nos últimos dous anos, o anuncio de Beijing de inspeccionar as importacións de porco por competencia desleal -en resposta ao anuncio da UE de subir aranceis aos seus coches eléctricos-, non ten moito que ver co mercado galego, segundo os expertos Xulio Ríos e Dolores Riveiro, xa que estas exportacións son fundamentalmente de macrogranxas de porcino do centro da península Ibérica. Para Riveiro esta ameaza da China na OMC non afectaría directamente ao mercado do porcino galego, “Galiza exporta á China automoción e téxtil, fundamentalmente”. No caso do sector primario o comercio galego na China ten que ver con peixe conxelado e lácteos, “a suma das dúas é 70% de todo o que vai da Galiza para a China”. Riveiro contextualiza este mercado no global da economía internacional galega, explica que “as exportacións da Galiza en 2023 superaron os 30.000 millóns de euros, e coa China foron 234 millóns”. No caso do peixe, “é o sector máis importante das exportación galegas á China, representa 6% do total”, e os lácteos representan “menos de 1%”. Son cantidades pequenas, recoñece, pero “poden ser importantes para algunhas empresas do sector”. As exportacións de peixe coa China medraron entre 2022 e 2023 até 10%. E as de lácteos “case se duplican”, de 35 millóns de euros a 70 millóns. Un mercado de futuro A pesar da incerteza xerada diante dunha posíbel guerra comercial entre a UE e a China a partir do 4 de xullo, Ríos asegura que “o sector primario galego na China ten moitas posibilidades de expansión”. Explican os economistas consultados por Nós Diario que “a China está mellorando de maneira importante o nivel e calidade dos alimentos, produce e importa moitos alimentos”. Diante deste escenario aseguran que “a industria agroalimentaria galega ten boa marca e moito prestixio, o que faltan son estratexias”. Ríos vai máis aló e sinala que “o que precisa Galiza é un plan China, unha estratexia”. Polo de agora a China ten postos os seus ollos no porto de Ferrol, como alternativa ao portugués de Sines para “achegar os seus produtos a Europa”. O futuro comercial da Galiza e a China A UE e a China dirimirán as súa diferenzas no seo da Organización Mundial do Comercio (OMC). María do Carme García Negro explica que foron os Estados Unidos os que comenzaron estes procesos no seo da OMC xa en 2018 e augura que co panorama actual “pode desembocar nunha guerra comercial ou quedar en táboas”. Xulio Ríos comparte a visión da situación actual, e pensa que a Galiza ten que definir a súa “propia estratexia” mirando cara ao potencial mercado chinés. Xa hai investimentos da China na Galiza, no sector lácteo e nas conserveiras, tamén na automoción, pero Ríos debuxa “unha potencialidade dos produtos de calidade galegos” no mercado chinés, iso si, “sempre cunha estratexia detrás”.