A economía vai "arrefriar" a partir de finais de ano, alerta o Foro Económico

O director do Foro Económico de Galicia, Santiago Lago, prevé que no segundo semestre de 2023 e durante 2024 vai "arrefriar" a economía polo impacto de medidas como o mantemento da suba dos tipos de xuro, a través dunha política monetaria do Banco Central Europeo (BCE) "máis contractiva" en busca de atallar a inflación. Lago fai un balance do primeiro trimestre de 2023 no que valora positivamente o "crecemento" das economías da Galiza e do Estado español fronte a outros Estados da Unión Europea (UE). Con todo, avisa de que coa política monetaria, o BCE "está a tentar arrefriar a economía" nos próximos trimestres. Porén, o economista identifica o actual crecemento cun mundo pospandemia no que a "xente quere gozar", o que explica as taxas de suba "espectaculares" nos sectores turístico e hostaleiro no arranque de 2023, un período no que a cidadanía aínda fai uso do aforro "embalsamado" durante a crise da Covid. Este factor, di o director do Foro Económico, produce que non se free a economía a pesar "dos elementos de incerteza". En contraposición, advirte dun cambio de paradigma a finais deste ano, cando "as cousas non estean tan ben". Non obstante, esta quinta feira coñeceuse que a inflación no Estado español moderouse este mes a unha taxa de 1,9%, o nivel máis baixo desde 2021, cumprindo o obxectivo de 2% fixado polo BCE. Lago sinala que "é verdade" que a inflación está máis controlada no español que noutros Estados da UE, mais lembra que a política monetaria na zona euro é común e aplicarase de forma "máis contractiva" a pesar do que lle "tocaría" á Galiza e ao Estado español. Ao respecto, cre que é necesario reflexionar sobre a "gran discusión aberta" arredor de se a dureza da política monetaria se pode "pasar de freada" co obxectivo do arrefriar o consumo e que esta solución poida xerar novos problemas. Así mesmo, Lago razoa que, para 2024, haberá que "empezar a axustar o déficit máis do que se está facendo nestes momentos". Pon o exemplo de que o Estado español está crecendo máis que Alemaña -entrou en recesión técnica no primeiro trimestre-, mais lembra que a economía xermana conta cun menor déficit, o que lle permitiu afrontar nunha posición máis favorábel na crise do coronavirus. Neste sentido, opina que "ter o déficit controlado" permíteche "ter mais soberanía en política económica cando tes que usala". Lonxe do medre estatal O Foro Económico destacou que o crecemento no primeiro trimestre da economía galega, aínda cunha alza de 2,8%, está case punto porcentual e medio por baixo da taxa de 4,2% á que medrou o PIB a nivel estatal. A institución non cre en "escenarios catastróficos" no curto prazo para a Galiza e o Estado español. Neste sentido, explica, as exportacións do primeiro trimestre funcionaron "moi ben", mais con puntos negros estruturais como a produtividade. Falta de diversificación A recuperación da industria galega foi dependente de sectores como o enerxético e o extractivo, sinala González Laxe O economista Fernando González Laxe resalta que a economía galega "gañou tracción" nos primeiros tres meses de 2023, unido á recuperación do comercio e da hostalaría. Neste sentido, explica que a recuperación da industria galega foi dependente do tirón de sectores como o enerxético e o extractivo. Por outra parte, di, aparece un fenómeno como é "a nova loxística de proximidade", un pequeno cambio na estrutura produtiva galega na procura de dotar de insumos a outras compañías do país. Con todo, Laxe bota en falta maior diversificación na exportacións ao acaparar 50% só tres sectores -automoción, téxtil e conserva de peixes-, do mesmo modo que 40% das vendas ao exterior vanse a Francia, Portugal e Italia -aínda que observa brotes cara a África e América-. Tamén pon o foco Laxe en que tanto a Administración estatal como a galega "deixaron de investir, consumir e crecer" nos últimos meses, cuestión que lle sorprende ao relacionarse o período electoral con "grandes consumos", mais "esta vez non". Caída do emprego na industria manufactureira En materia de emprego, José Francisco Armesto valora o "bo comportamento en termos agregados", cunha caída do desemprego e da temporalidade. Aínda así, avisa de que o dinamismo de creación de emprego é "menor" que na economía estatal. O emprego na Galiza créase sobre todo no sector servizos, principalmente en educación, algo que contrasta cunha caída da industria manufactureira, un emprego, "en xeral, de maior calidade". Por iso, Armesto ve necesarias políticas que aumenten a ocupación neste sector. Máis emprego a tempo parcial Con respecto ao emprego asalariado na Galiza, sinala o Foro Económico, os datos da Enquisa de Poboación Activa (EPA) reflicten o maior dinamismo do traballo a tempo parcial, que medra 17,4% respecto ao ano anterior (14.400 persoas asalariadas) fronte á taxa de 7,1% no caso do emprego a tempo completo (43.400 persoas). A análise da desagregación por xénero reflicte a desigualdade xa que 80,7% das asalariadas con contrato indefinido a tempo parcial na Galiza son mulleres, aínda que se trata dunha taxa case catro puntos porcentuais inferior á do primeiro trimestre do ano anterior (84,4%), explica a institución. Asemade, 21,8% das mulleres asalariadas con contrato indefinido teñen un emprego a tempo parcial, o que contrasta coa taxa de 4,8% estimada entre os homes (21,6% e 3,5% no ano 2022, respectivamente). Recesión en Occidente O banco británico HSBC, nun informe analítico do que informou a CNBC, prognostica que os Estados Unidos de América (EUA) entrarán en recesión no cuarto trimestre deste ano, mentres que os Estados europeos seguirán o mesmo camiño de contracción económica en 2024. A pesar de que algúns sectores económicos se manteñen estábeis, o analista xefe global de HSBC, Joseph Little, declarou que o balance de riscos "apunta agora a un alto perigo de recesión" nos EUA e en Europa. O analista sinalou que Europa está atrasada con respecto aos EUA, mais agregou que a traxectoria a nivel macro en xeral atópase "aliñada" nos dous casos. Os avisos de recesión son "un sinal de alerta" para moitas economías mundiais, mentres que as políticas fiscais e monetarias non están sincronizadas cos mercados de accións e bonos, advertiu o banco británico, engadindo que o mundo xa se atopa "nunha leve recesión de ganancias", cun aumento dos incumprimentos corporativos. O analista afirmou que, cunha caída do PIB de entre 1% e 2%, o escenario de recesión que se aveciña "parecerase máis á recesión de principios da década de 1990". Ademais, segundo a entidade, a contracción das economías occidentais pode resultar nunha "perspectiva difícil e axitada para os mercados". "En primeiro lugar, temos o rápido endurecemento das condicións financeiras que provocou unha caída do ciclo crediticio. En segundo lugar, os mercados non parecen estar a valorar unha visión especialmente pesimista do mundo", explicou Little sobre as razóns dunha futura crise.