A débeda galega sobe e supera xa os 12.880 millóns, mais Rueda rexeita que se condone 32%

A Galiza aumentou a súa débeda pública no primeiro semestre do ano. Pasou de entrar en 2025 con 11.935 millóns a rexistrar ao final do primeiro semestre un débito de 12.885 millóns. Son de media 5,5 millóns diarios de incremento da débeda pública. Os datos que esta terza publicou o Banco de España apuntan a que ese aumento vai sendo gradual a medida que vai avanzando 2025: eran 11.935 millóns ao principiar o ano, subiu a 12.137 millóns en marzo —primeiro trimestre— e abeiran os 12.900 millóns cando se fecha o segundo trimestre —xuño–. Esa suba ten a súa réplica na parte do PIB da Galiza que representa a débeda pública. No inicio de 2025 era 14,5%, elevouse a 14,6% en marzo e ao fechar o primeiro semestre situábase por riba de 15%: 15,3%. Mais malia este incremento do débito público durante estes seis meses, o Goberno galego mantén unha persistente e notábel belixerancia contra a ferramenta que permitiría condonar parte desa avultada débeda: até 4.010 millóns, polo que sería condonada 32% do total da débeda actual, un de cada tres euros. Rueda insiste en rexeitar a condonación da débeda pública tras triplicala desde 2009 No primeiro pleno do Parlamento galego de setembro, a 'quita' da débeda voltou a ser tema de debate, a través dunha proposición non de lei do BNG instando o Goberno galego a "rectificar e negociar" co Executivo estatal esta condonación da débeda. O PP evitou que a iniciativa se aprobase, nunha nova mostra de que o partido que goberna na Xunta non vai admitir a condonación, postura que no seu día foi ditada desde Xénova [sede do PP español] a todas as direccións autonómicas do partido. Datos: Banco de España / Gráfico: Nós Diario Oposición frontal Tanto o propio presidente da Xunta da Galiza, Alfonso Rueda, como o conselleiro de Facenda, Miguel Corgos, empregáronse a fondo durante estes meses en criticar a condonación de 4.010 millóns de euros da débeda ofrecida polo Goberno estatal —medida pactada no seu día polo BNG e o PSOE no acordo para investir Pedro Sánchez como presidente do Goberno do Estado—. Non resolve os problemas de endebedamento da Galiza, considera Rueda. Porén, o débito público da Galiza aumentou nos primeiros seis meses do ano en máis de 950 millóns de euros. "Non necesitamos que se nos perdoe a débeda", chegou a afirmar o titular do Goberno galego fronte ás reiteradas peticións do BNG e PSdeG de que acepte a condonación. A oposición culpa Rueda de "prexudicar" Galiza ao rexeitar a 'quita' da débeda Mais a cifra da débeda pública que se rexistra en 2025 é moi superior á que había en 2009, ano no que o Partido Popular voltou ao Goberno galego após os catro anos de Executivo de coalición entre nacionalistas e socialistas. Daquela, a débeda pública da Galiza situábase nos 4.000 millóns de euros e equivalía a 7,5% do PIB da Galiza. Aqueles 4.000 millóns multiplicáronse por tres durante estes 16 anos de gobernos do PP. A débeda ten, entre as súas consecuencias, pegada nos Orzamentos da Xunta, da Galiza que ano tras ano teñen que destinar unha parte non pequena dos seus fondos a facer fronte a este débito. A Xunta da Galiza dedicou 9.222 millóns de euros desde 2020 a pagar a súa débeda Nesta anualidade serán 1.763 millóns de euros. Segundo se recolle na Lei de orzamentos aprobada polo Parlamento da Galiza para este exercicio, 214 millóns de euros están dirixidos a sufragar os tipos de xuros derivados da débeda formalizada pola Xunta da Galiza, fundamentalmente, coas entidades bancarias e 1.549 millóns a amortizar parte desa débeda pública. Eses 1.763 millóns configuran unha das partidas máis importante dos Orzamentos de 2025, aumentando en máis de 16% a respecto do que se destinaba ao seu pagamento na Conta Xeral para 2024. As achegas do Goberno galego para facer fronte aos seus compromisos de débeda en 2024 eran de 1.511 millóns de euros, destinando 188 millóns a sufragar o seu custo, concretado nos tipos de xuro, e 1.323 millóns á súa amortización. O Goberno galego destinou 9.222 millóns desde 2020 ao pagamento da súa débeda. Nese período, as maiores achegas de fondos para sufragar tipos de xuros e amortizacións correspondéronse coas anualidades de 2025 e 2021 e as menores coas de 2023 e 2022. Precisamente, a Xunta viuse beneficiada durante parte desta década por unha caída inédita do prezo do diñeiro no espazo comunitario, cuxo valor chegou a ser negativo, resultado das medidas expansivas implementadas polo Banco Central Europeo tras a crise derivada da Covid-19, co obxectivo de fornecer liquidez aos mercados e evitar un contexto económico recesivo. A Xunta dedica este ano a afrontar a débeda pública 230% máis que en 2009, aplicando a inflación. Ningunha outra partida aumentou tanto porcentualmente neste período, agás a que se engloba no termo "sociedade da información" e cuxo aumento foi de máis de 250% desde 2009. Así, a débeda galega aumenta, como corrobora o último informe do Banco de España, no que vai de 2025 e volve situarse nus parámetros onde equivale a máis de 15%