Cuito, OTAN, guerras e patacas

Achégase o verán coa vertixe de irmos a toda velocidade e levarmos ao volante unha banda de dexenerados, groupies da guerra, ionquis do diñeiro e puteiros varios. Resulta enternecedor cando escoitamos as declamacións de responsables de partidos, con acusacións nalgúns casos e condenas firmes noutros –ao estilo "Luís (Bárcenas) sé fuerte"– por apropiación indebida ou branqueo, cometidos por algúns dos seus máximos dirixentes. Que dicir do sentimento e emoción coa que baten no peito e piden responsabilidades nas adxudicacións de contratos a "amiguetes" e obras públicas a cambio de beneficios económicos? Estes días tamén puidemos ver como se alimentaba a sospeita sobre unha fraude electoral, o cal non deixa de ser curioso nunha terra na que cada vez que hai eleccións tamén temos denuncias de carretaxe de votos, mesmo de persoas coas facultades mentais minguadas, da falta de garantías no voto por correo e do voto exterior, e mesmo algo tan noso como os titulares de que participan activamente na festa da democracia algúns defuntiños. Certo é que, respecto ao dereito do sufraxio pasivo, algunha pluma avezada chegou a dicir que ao mellor non habería moita diferenza entre termos algún representante da "Santa Compaña" ou algún dos que temos na actualidade. Alberto Núñez Feijóo acusa Sánchez de enganar e de romper a unidade europea argumentando que o gasto militar xera empregos A existencia de recoñecidos puteiros nesas esferas de poder dos grandes partidos acaba motivando outra das tirapuxas do "e ti máis". Mulleres prostituídas, empresarios e señores ministros e conselleiros nunha especie de feira das vaidades, do poder e de noxentas corruptelas. Na nosa versión patria aínda lembramos a detención no 2019 do chamado pola prensa "agricultor favorito do PP", o líder en Galicia da desaparecida organización agraria Jóvenes Agricultores, acusado de liderar unha rede de trata de mulleres, a maioría de Paraguai. As estreitas relacións co poder permitíranlle ao chamado "señor dos agrocursos" acceder entre o 2005 e o 2009 a 2,5 millóns de diñeiro público e foran tamén moi soadas as súas fotos nun iate con Mariano Rajoy e Ana Pastor. Aumento do gasto militar O fastío de moita poboación neste momento comeza a ser insoportable, e no medio de todo isto xorde o debate sobre a proposta de dedicar un 5% do Produto Interior Bruto (PIB) a gasto militar. Do 1,24% do PIB, que supón no 2024 uns 19.736 millóns de euros, o presidente Pedro Sánchez comprometeuse a pasar a un 2,1% do PIB, uns 33.424 millóns de euros. A esixencia do presidente Trump, sobre a que hai un suposto acordo cos líderes europeos pertencentes a OTAN, sería dun 5% do PIB, o que suporía no caso español 79.581 millóns de euros. O presidente do Estado español di que se adhire á declaración da OTAN para gastar un 5% en defensa pero que o Estado español vai gastar un 2,1%, e o líder do PP Alberto Nuñez Feijóo acúsao de enganar e ao mesmo tempo de romper a unidade europea neste tema, argumentando que o gasto militar xera empregos. Numerosos economistas alertan de que para destinar a armas e gasto militar 5% –para educación o Estado español destina un 4,5%– vai ser necesario acudir a préstamos e incrementar a débeda pública, subir os impostos ou recortar o gasto social, ou unha combinación de todas estas medidas. De momento unha das primeiras tesoiradas semella que vai ser no orzamento do vindeiro período plurianual da Política Agraria Común, que vai facerse público neste mes de xullo e que para o que xa se está falando de recortes dun 20%, o que vai afectar de xeito claro a moitas persoas agricultoras e gandeiras, e tamén ao propio prezo e dispoñibilidade alimentos da poboación. A diferenza entre o gasto militar realizado no 2024 e o que se propón co 5% suporía un incremento de gasto de 59.845 millóns de euros cada ano. Por poñer unha comparación, a Xunta de Galicia presentou uns orzamentos para este 2025 de 10.267 millóns de euros para Sanidade, 2.972 millóns de euros para Educación, 1.415 millóns para Política Social ou 490 millóns de euros para Emprego. O Instituto Internacional de Estudos para a Paz de Estocolmo sinalaba que no ano 2024, países como Alemaña gastaron 1,9% do seu PIB en defensa, Francia 2,1%, Reino Unido 2,3%, Italia 1,6% ou os propios Estados Unidos 3,5%, moi lonxe dese 5%. Non hai que esquecer que a Organización do Tratado do Atlántico Norte (OTAN) é unha alianza militar creada en abril de 1949 e que, dos 195 países recoñecidos, actualmente aglutina a 32 estados membro capitaneados polos Estados Unidos. con acordos de asociación como o do propio estado de Israel, responsable do asasinato de máis de 56.000 persoas en Gaza e do xenocidio do pobo palestino.