A crise cronifícase na automoción galega, un sector enfrontado a un futuro crítico

As cifras coñecidas sobre o sector da automoción galego dan conta da súa complicada situación. Segundo os datos achegados polo Clúster de Empresas de Automoción de Galicia (Ceaga) para 2024, último ano con cifras completas, a facturación total do complexo automobilístico alcanzou os 12.800 millóns de euros, o que representa 1,5% menos que na anualidade anterior. Na mesma dirección, o índice de produción industrial (IPI) do sector da automoción rexistrou un retroceso en relación ao exercicio pasado de 4,5%, malia significar 15,7% do produto interior bruto (PIB) galego. Os datos da factoría de Stellantis en Vigo (comarca homónima) son unha boa proba disto. A este respecto, as cifras do Instituto Galego de Estatística (IGE) desvelan que en 2024 a produción anual de vehículos montados na factoría viguesa situouse en 512.503 unidades, o que significa unha caída de 1,6% en relación á anualidade anterior. Nesta dirección, fabricáronse 313.330 furgonetas, 3,8% máis que no exercicio anterior, reducíndose a produción de vehículos a 199.173, o que implica 20.000 unidade menos e un descenso porcentual de 10% en relación coa anualidade de 2023, cando xa se rexistrara unha caída de 7%. A crise industrial cronifícase tras caer a actividade un 31,9% desde o ano 2008 A baixada de actividade da fábrica viguesa de Stellantis, primeira planta de fabricación de automóbiles do Estado con 21,7% do total, atendeu á decisión da empresa de axustar a produción no marco dun escenario adverso para o sector comunitario do automóbil no que as vendas a nivel global da multinacional con centro de traballo na Galiza descenderon 17% e os beneficios, 70%. A falta de coñecer as cifras ao remate de 2025, a produción da factoría de Stellantis en Vigo no primeiro semestre do ano foi superada pola planta de Seat en Martorell (Catalunya), alcanzando uns números moi semellantes a fábrica de Stellantis en Figueruelas (Aragón). As vendas no exterior do sector galego da automoción caeron en 2024. A este respecto, o Clúster de Empresas de Automoción de Galicia apuntou que as exportacións no conxunto do complexo do automóbil baixaron en 4,5%, caendo até os 8.970 millóns. Nunha dirección diverxente, a industria dos compoñentes de automoción logrou aumentar as súas exportacións en 10%, chegando até 2.170 millóns de euros, con Portugal, Francia, Alxeria, Polonia, Arxentina, Reino Unido, Alemaña, Estados Unidos, Italia e Marrocos como principais mercados. Porén, parte destas operacións son movementos dentro dunha mesma unidade de produción, Stellantis, con actividade en diversos Estados. O emprego O emprego é un bo termómetro para analizar a situación do sector. Así, en 2024 a automoción ocupaba de forma directa 23.600 persoas, rexistrando unha caída de 5% en relación co exercicio anterior e consolidando a tendencia descendente iniciada no ano da pandemia. O peor comportamento deuse nas empresas auxiliares de Stellantis, que acumularon a práctica totalidade dos postos de traballo destruídos durante o período na Galiza. Nesta dirección, o sector da automoción representa 14,1% do emprego industrial do país, concentrándose o groso da actividade na comarca de Vigo. O profesor da Universidade de Santiago de Compostela (USC) Juan José Ares apunta no seu traballo sobre a industria publicado no informe anual sobre a economía galega elaborado polo Instituto de Estudos para o Desenvolvemento de Galicia (Idega) que "resulta obvio que a industria da automoción mundial se enfronta a uns retos que cambiarán a súa estrutura nos próximos anos e que afectarán o sector galego". "A complexidade da situación actual debida, entre outras causas, á crecente competencia, á velocidade na implantación dos coches eléctricos, ás políticas arancelarias –en especial as dos Estados Unidos– e ás transformacións na loxística e na industria de compoñentes, incrementan a incerteza nun sector clave que afronta novas oportunidades pero tamén ameazas", engade. A produción da automoción galega baixou 1,5% en 2024 As perspectivas do sector da automoción non son boas. A este respecto, a Asociación Española de Proveedores de Automoción, a patronal que agrupa toda industria dos compoñentes automobilísticos, vén alertando desde hai meses da difícil situación que teñen por diante as compañías do sector. Neste sentido, o pasado mes de outubro avanzaba unha caída dos ingresos de perto de 5% para 2025 e un recorte de emprego para 2026 de máis de 1% do seu cadro de persoal total, o que significa unha actualización á baixa das previsións presentadas no mes de xullo. A patronal da industria auxiliar do automóbil advertía no mes de novembro de que "os provedores de automoción realizaron durante os últimos anos grandes investimentos destinados á electrificación e estes non se están a rendibilizar ao ritmo desexado, e a demanda desta tecnoloxía no mercado europeo non está a responder tal e como se esperaba". Porén, recoñecían "as dificultades para adaptarse ao novo escenario aberto coa irrupción do coche eléctrico". Novas incertezas no sector coa irrupción do coche eléctrico O futuro do sector do automóbil pasa polo coche eléctrico. Neste sentido, o Goberno do Estado presentou esta semana o Plan Auto 2030 co obxectivo de "impulsar a oferta e a demanda cun coche eléctrico español e económico". O proxecto destina 400 millóns de euros ao apoio, con axudas directas, da compra do coche eléctrico, 300 millóns de euros para despregar puntos de recarga e 580 millóns para o Perte do vehículo eléctrico. A implantación do coche eléctrico non está exenta de problemas. A este respecto, un informe elaborado a instancias da patronal europea do automóbil apunta á destrución de 500.000 empregos no sector para o conxunto da Unión Europea até o ano 2040. No mesmo relatorio, prevese a perda de 63.000 postos de traballo no Estado español e de 4.400 na Galiza. A CIG mobilízase ante a crise do sector do automóbil: o persoal da automoción galega perdeu 22% do poder adquisitivo desde 2008 O relatorio da patronal europea do automóbil afirma que a fabricación do vehículo eléctrico require moita menos man de obra que o coche de combustión. Así, sinala que só serán precisos seis de cada dez empregos actuais. Asemade, recolle que esta reestruturación impactará no conxunto da cadea de valor do sector, polo que á marxe dos postos de traballo directos perderanse