O crecemento do PIB galego será o segundo menor do Estado en 2023 segundo o BBVA

O Produto Interior Bruto (PIB) da Galiza experimentará un crecemento de 1,9% en 2023, segundo as previsións publicadas esta cuarta feira por BBVA Research. Trátase do segundo peor resultado entre as autonomías do Estado, segundo vaticina o estudo, que tan só sitúa a Galiza por riba do medre da economía da Rexión de Murcia (1,8%), e igualada a Castela-A Mancha. A Galiza non logra recortar a fenda con Europa no que vai de século Na comparativa co conxunto do Estado, a previsión de crecemento da Galiza en 2023 é medio punto porcentual máis baixa que a media estatal (2,4%). Por outra parte, tan só catro autonomías teñen unha expectativa de medre superior á media, trátase de Illes Balears (3,6%), Canarias (3%), a Comunidade de Madrid (3%) e Catalunya (2,6%). Con respecto aos últimos datos ofrecidos pola entidade, de marzo de 2023, todas as autonomías do Estado español experimentan unha revisión á alza da súa expectativa de medre do PIB. As maiores alzas nas previsións apóianse na evolución das exportacións de servizos non turísticos (Comunidade de Madrid) e das de bens (a Galiza, Asturias, Castela e León e Catalunya). Porén, o aumento da previsión da Galiza non lle serve para remontar posicións e abandonar o vagón de cola do Estado en canto ás expectativas de crecemento económico, senón que incluso perde unha posición na clasificación entre as autonomías. Adicionalmente, estímase que o mercado laboral galego aumentará os postos de traballo 1,5% este ano e 1,6% o que vén. Non obstante, ambos os datos sitúanse por baixo da expectativa de medre do emprego no Estado, que se prevé que alcance 2,4% en 2023 e 2% en 2024. Derrubamento do turismo O turismo sufrirá unha importante perda de peso no PIB en 2024, segundo BBVA Segundo as previsións de BBVA Research, espérase que o turismo experimente unha desaceleración "significativa" en 2024, afectado pola caída do consumo no conxunto da Unión Europea (UE). Este fenómeno estará motivado polo mantemento duns tipos de xuro e duns custos da enerxía aínda elevados que provocarán unha menor capacidade de aforro da cidadanía. Unha taxa ao turismo: necesaria ou aínda non é o momento? Como consecuencia, o avance do PIB das autonomías máis turísticas revisarase máis á baixa que a media do Estado, ocasionándose un verdadeiro derrubamento nas expectativas de crecemento de Canarias (1,4%) e Illes Balears (1,5%) en 2024, o que provoca a caída do dato do Estado até unha taxa de 2,1%. Neste contexto, segundo as previsións de BBVA Research, a economía galega tamén sufrirá as consecuencias da crise do sector turístico, aínda que en menor medida, cunha revisión á baixa do crecemento económico en 2024 até a taxa de 2,5%, catro décimas porcentuais por riba do medre esperado no Estado. Comercio polo miúdo O comercio polo miúdo rexistrou en maio na Galiza un avance das súas vendas de 5,2% en relación ao mesmo mes de 2022, case un punto porcentual e medio inferior á suba rexistrada a nivel estatal (6,6%), segundo publicou esta cuarta feira o Instituto Nacional de Estatística (INE). O sector servizos aumenta a súa dependencia do comercio e da hostalaría O menor incremento das vendas do comercio polo miúdo na Galiza tamén tivo impacto na creación de emprego no sector, que aumentou 0,9% en maio con respecto ao mesmo mes de 2022, mentres que a nivel estatal a suba interanual na xeración de postos de traballo foi de 1,6%. Por outra parte, o español foi o segundo Estado de Europa Occidental onde máis aumentou o gasto no cesto da compra no primeiro trimestre de 2023, tan só por detrás de Portugal, segundo os datos do informe Quarter by numbers da consultora NIQ. En concreto, o valor das vendas no Estado español durante o primeiro trimestre rexistraron un crecemento de 11,2%, tan só superado por Portugal (14,2%), mentres que por detrás situáronse Italia (10,2%), Austria (7,9%) Suecia (7,5%), Alemaña (7,4%), Países Baixos (7,2%), Bélxica e Francia (ambos cunha taxa de 7,1%) ou Dinamarca (4,4%). Unha tendencia de incremento do gasto no contexto da crise inflacionista que tivo especial relevancia na Galiza, desta vez con datos do INE para o ano 2022. Desta forma, o gasto xeral medio por persoa situouse a nivel galego o pasado ano en 13.008 euros (+10,2% con respecto a 2022), máis de 200 euros por riba da media estatal, onde a cifra alcanzou os 12.780 euros (+8,5%). Abanca prevé que os tipos de xuro avancen até 2025 Neste contexto de crise inflacionista e de aumento do gasto que ten que asumir a cidadanía e que está a ter especial impacto na Galiza, a entidade financeira con maior implantación no país, Abanca, vén de sinalar que prevé que os tipos de xuro se manterán "elevados" polo menos até 2025, cando poderá darse unha corrección á baixa se a inflación comeza a estabilizarse na contorna dunha taxa de 2%. Así o afirmou esta cuarta feira o presidente da entidade, Juan Carlos Escotet, durante a súa intervención na segunda xornada do Vigo Global Summit 2023, organizado polo Consorcio da Zona Franca de Vigo no marco do seu 75 aniversario. Escotet tamén explicou que aínda que Abanca "sempre tivo en mente" saír a bolsa, na actualidade "non hai ningún incentivo" para facelo. O crédito dos bancos aos fogares fréase na zona euro Os préstamos dos bancos aos fogares da zona euro, axustados por vendas e titulacións, creceron durante o pasado mes de maio 2,1% con respecto ao mesmo mes de 2022, freando así catro décimas respecto do dato de abril e rexistrando o seu menor incremento desde decembro de 2016, segundo os datos publicados polo Banco Central Europeo (BCE). Pola súa parte, os préstamos a empresas aumentaron no quinto mes de ano 4% interanual, fronte á taxa de 4,6% de abril, o seu menor incremento desde novembro de 2021. Deste modo, o crecemento interanual dos préstamos ao sector privado axustados diminuíu até 2,8% en maio desde a taxa de 3,3% de abril, o menor incremento interanual dos préstamos ao sector privado na rexión desde outubro de 2017. Medran as comisións das contas correntes As comisións das contas correntes eleváronse 3,2% no último ano A Asociación de Usuarios Financeiros (Asufin) publicou esta cuarta feira o IV Barómetro Comisións Bancarias, no que a organización alertou que as comisións da banca do Estado español por manter contas correntes non bonificadas, no contexto da suba actual dos tipos de xuro, eleváronse 3,2%, ao alcanzar estas taxas bancarias un custo medio de 145,82 euros, fronte aos 141,30 euros de hai un ano.