A comercialización de vehículos de combustión ficará prohibida na UE a partir do ano 2035

O pleno do Parlamento Europeo deu esta terza feira o seu visto e prace ao acordo entre institucións alcanzado o pasado outono para que a partir de 2035 todos os turismos e furgonetas novos que se comercialicen na Unión Europea (UE) sexan de "cero emisións", o que supón vetar a comercialización de vehículos de combustión, incluídos os de gasolina, diésel e híbridos. Despois da adopción do acordo na sesión plenaria de Estrasburgo (Francia) por 340 votos a favor, 279 en contra e 21 abstencións, só queda o visto e prace formal por parte dos 27 Estados que forman a UE para que estas regras poidan entrar en vigor. O prezo dos vehículos eléctricos de segunda man encareceu até 40% A nova norma forma parte do paquete climático que a UE quere impulsar esta lexislatura para reducir polo menos en 55% as emisións contaminantes do bloque no horizonte de 2030 (respecto a 1990) e é a primeira medida concreta do conxunto de iniciativas que saíu adiante. Entre as claves da reforma figura o encargo dunha nova metodoloxía para solicitar e avaliar datos das emisións de dióxido de carbono (CO2) do parque automobilístico lixeiro durante todo o ciclo de vida dos vehículos vendidos no mercado da UE. A Comisión Europea deberá presentar esta metodoloxía como moi tarde en 2025, incluída coas reformas lexislativas se fosen necesarias para o seu desenvolvemento. Así mesmo, Bruxelas tamén recibe o encargo con esta nova normativa de realizar un informe bianual a partir de 2025 para avaliar se se está avanzando a un ritmo adecuado no conxunto da UE cara ao obxectivo vinculante de cero emisións, unha análise que deberá tamén valorar o impacto da reforma nas persoas usuarias e no emprego así como a evolución do mercado comunitario de vehículos de ocasión. O sector da automoción da Galiza está en mans de capital estranxeiro No control das emisións dos novos vehículos, os expertos da Comisión Europea vixiarán a diferenza entre os valores límites de emisións e os datos de consumo real de carburante e enerxía para ir axustando as emisións específicas medias de CO2 dos fabricantes a partir de 2030. Posturas enfrontadas "Se queremos reducir as emisións de CO2, ter unha mobilidade accesíbel, sostíbel e limpa e transformar a nosa industria, temos que votar a favor deste regulamento", defendeu o eurodeputado do PSOE e vicepresidente da comisión de Medio Ambiente da Eurocámara, César Luena, nun comunicado no que os socialistas reprochan ao Partido Popular Europeo (PPE) o voto en contra do acordo. A ollos do PPE, segundo explicou a súa voceira na negociación da norma, Jens Gieseke, a prohibición dos motores de combustión suporá novos coches "máis caros", a perda de "miles de postos de traballo" e levará á industria europea ao "declive". A UE "está a conducir a súa industria automobilística cara a unha rúa sen saída", remachou Gieseke. O Partido popular votou en contra da norma da UE para promover o vehículo eléctrico A deputada do BNG na Eurocámara, Ana Miranda, votou a favor desta medida. En declaracións a Nós Diario, a nacionalista cualifica a norma como "positiva na urxente loita contra o cambio climático". Porén, Miranda destacou a necesidade de acompañala de "medidas de transición social e económica para as persoas que teñen coches de combustión, así como para asegurar que os lugares nos que hai fábricas de automóbiles non se vexan prexudicados". A compra de vehículos chineses no Estado multiplicouse por 13 "Desde o BNG estamos traballando en informes para afondar neste cambio de paradigma que implica necesariamente unha mudanza de mentalidade, mais que tamén precisa de apoio económico para avanzar na accesibilidade aos vehículos eléctricos por parte das persoas con menos poder adquisitivo", resaltou a representante do BNG. O eurodeputado de Unidas Podemos, Ernest Urtasun, saudou, pola súa parte, o liderado da UE na mobilidade eléctrica, a favor "dun transporte máis limpo, a neutralidade climática e unha maior competitividade". Ademais, defendeu que a nova norma garante "seguridade de planificación para o cambio á mobilidade eléctrica, reforza á UE como emprazamento automobilístico e protexe a saúde da cidadanía". Por outra parte, Urtasun pediu impulsar agora a produción de baterías e da infraestrutura de recarga. O norte de Portugal ten o dobre de puntos de carga A eurorrexión Galiza-Norte de Portugal avanza a dúas velocidades na implantación dunha rede de puntos de recarga de vehículos eléctricos. A pesar de que -a falta do visto e prace dos 27 Estados da UE- os coches de combustión non poderán ser comercializados a partir de 2035 e de que até ese momento se espera un continuo aumento do parque de vehículos eléctricos, a Galiza conta con pouco máis de 600 puntos de recarga. Por contra, tan só as rexións do norte de Portugal por riba do río Douro contan con máis do dobre de localizacións para a carga dos coche eléctricos, chegando practicamente a 1.300, segundo os datos de Electromaps, considerado o portal con maior información ao respecto na península Ibérica e empregado como referencia para polo Instituto Enerxético da Galiza (Inega). A exportación de coches fica paralizada polo colapso dos portos da Unión Europea Para cumprir coas previsións do plan estatal integrado de enerxía e clima elaborado polo Ministerio español para a Transición Ecolóxica e o Reto Demográfico (Miteco), os puntos de recarga necesarios para 2030 na Galiza serían un total de 16.400. Tendo en conta estas previsións e o número de puntos actuais, o territorio galego ten apenas 3,7% dos puntos de recarga eléctrica de vehículos cos que debería de contar en menos de sete anos. A Galiza ten 3,7% dos puntos de recarga eléctrica precisos en 2030 Na Galiza, a maioría dos puntos de recarga para os coches eléctricos atópanse en aparcamentos, estacións de servizo, concesionarios, polígonos empresariais, centros comerciais, hoteis e balnearios. Ademais, tamén hai puntos de recarga en universidades e puntos de especial interese turístico. Así mesmo, contan con este servizo os portos de titularidade da Administración galega repartidos pola costa galega en localidades como Ribadeo, Burela, Sada, Corme, Muros, Noia, Ribeira, Rianxo, Vilagarcía, Cambados, O Grove, Sanxenxo, Pontevedra, Bueu, Cangas, Moaña, Panxón ou Baiona. Unha das eivas da rede de puntos de recarga de vehículos eléctricos da Galiza é a pouca dispoñibilidade de instalacións ultra rápidas, que rematan o proceso de carga en pouco máis de 20 minutos.