A crise industrial agrávase na Galiza cun novo retroceso: a produción caeu outro 4,5% en setembro

A produción industrial descendeu 4,5% en setembro na Galiza en comparación co mesmo mes dun ano antes, un retroceso máis acusado que 4,1% de baixada no conxunto do Estado español, segundo os datos que achegou esta terza feira o Instituto Nacional de Estatística (INE). Este indicador conxuntural que mide a evolución mensual da actividade produtiva das ramas industriais -excluída a construción e eliminando a influencia dos prezos- encandea catro meses consecutivos de retroceso interanual, xa que o último dato positivo produciuse en maio. A produción da industria enerxética foi a que máis baixou no noveno mes do ano, cun descenso interanual de 10,4%, seguida dos bens de consumo duradeiro (-7,5%); os bens de consumo non duradeiro (-6,6%) e os bens intermedios (-1,7%), mentres que a dos bens de equipo aumentou 1,2%. Por ramas de actividade, as que máis recortaron a súa produción en taxa interanual foron a confección de pezas de vestir (-39,4%), a fabricación de bebidas (-19,9%) e a subministración de enerxía eléctrica, gas, vapor e aire acondicionado (-12,9%). Os maiores ascensos, por contra, déronse noutras industrias extractivas (+34,9%). A nivel estatal, a Galiza estaría no noveno lugar en produción industrial, cun incremento positivo en Canarias (2,6%) e Castela e León (0,2%) así como un peor dato nas Illas Balears (-13,5%) e A Rioxa (-11,3%). Macrosectores con problemas En opinión do profesor da UVigo, investigador de Ecobas e membro do Consello Científico de Attac, Albino Prada, a economía galega depende “dunha maneira crucial” de dous macrosectores: a automoción e a confección de pezas de vestir. Ademais, sinala a Nós Diario, "temos unha elevada apertura exterior, moi por riba da media do reino de España ou de Catalunya” até o punto de explicar “tres cuartas partes do noso saldo total”. Por este motivo, apunta este economista, “se unha parte das economías do mundo, sobre todo coas que temos máis relación, están bordeando a recesión” estes macrosectores “xa non seguen o camiño que seguían no pasado”. Folga en Inditex: "O acordo sindical permite fechar tendas non por perdas, senón para obter máis beneficios á conta das traballadoras" Prada por como exemplo próximo que á multinacional Inditex “non lle quedou outra que fechar bastantes tendas en determinados países polos conflitos que actuais”. Outro caso é o da loxística de Stellantis en Vigo, “que segue amontoando vehículos nun espazo que nunca necesitou antes”. Por esta circunstancia, o economista galego sinala que "habería que pensar en serio como facer que non depensamos tanto de dous xigantes desa dimensión, estamos "nunha situación moi fráxil". Continúan as comunicacións de ERE Neste panorama negativo para a industria galega, as propostas de expedientes de regulación de emprego (ERE) de grandes empresas e os conflitos laborais continúan. É o caso de Einsa Print, a compañía de artes gráficas que realiza catálogos e publicacións, con sede en Madrid e factoría nas Pontes. O pasado 30 de outubro a súa dirección comunicou a apertura dun ERE que afectará a un total de 162 traballadoras e traballadores da planta. A empresa alega causas “organizativas e produtivas” para xustificar a medida, algo que desde o comité de empresa rexeitan. Por este motivo, o persoal desta empresa concentrouse esta terza feira diante da sede territorial da Xunta da Galiza en Ferrol coa intención de implicar ao Goberno galego nunha solución a este conflito. O comité subliña que esta empresa, que recibiu máis de 50 millóns de euros en axudas públicas, non pode ter como primeira opción a destrución de 162 postos de traballo sen buscar nin negociar outro tipo de medidas alternativas. A empresa Einsa comunica un ERE que deixará na rúa perto de 160 traballadores nas Pontes Nas instalacións das Pontes traballan 227 persoas, mentres que nas oficinas de Madrid, hai 15 empregadas e empregados. O presidente do comité de empresa, Daniel Pena (CIG), explica a Nós Diario que desde a dirección da compañía argumentan “unha baixada moi grande da produción, sobre todo de cara ao ano vindeiro, que chegaría a ser de 20%”. "É un golpe enorme para a comarca", salienta o sindicalista e lembra que, nestes momentos, a compañía é unha das que maior número de persoal fixo ten na localidade. “Precisamente a empresa recibiu bastantes subvencións con motivo do feche da mina”, lembra Pena, “coa decisión que tomaron demóstrase que a transición xusta nas Pontes non existe”, engade. Desde o comité demandan que a Administración galega “actúe”. O seu presidente non entende que “despois de recibir tanto diñeiro público no seu momento a empresa decida despedir, unilateralmente, a 162 persoas sen dar ningunha alternativa”. A protesta desenvolveuse coincidindo coa folga parcial convocada na planta das Pontes desde as 10 até as 13 horas, que tivo un seguimento total. A repersentación sindical reitera a demanda de que as xuntanzas teñan lugar nas Pontes e non en Santiago de Compostela como impuxo a dirección, por ser o centro de traballo máis grande e o que sufrirá a maior afectación. Paro parcial na empresa Vertifil Dentro do ramo da confección, a conflitividade está presente na empresa Vertifil de Moraña (comarca de Caldas) polo anuncio de despedimentos e a situación laboral do persoal. Esta compañía leva a cabo todo o proceso produtivo destinado á fabricación de tecidos para a protección solar no sector de compañías téxtiles de confección de cortinas, toldos, tapicería, hamacas e mobiliario exterior. A empresa de Moraña realiza o proceso produtivo de fabricación que lle encarga a compañía do seu grupo empresarial Vertisol Internacional SA, con sede en Granollers (Barcelona), para a súa venda ao seu cliente final. As firmas galegas xóganse 200 millóns en exportacións a Rusia e Ucraína O comité de empresa anunciou a convocatoria dunha xornada de folga parcial para esta cuarta feira para reclamar unha serie de melloras laborais rexeitar os despidos e a redución do cadro de persoal. 69, entre traballadoras e traballadores, están chamados a protestar contra unha medida que chega tras os intentos de negociar coa dirección a paralización das rescisións de contrato, contra as que se realizaron xa varias mobilizacións e se presentaron demandas xudiciais.