O Consello de Goberno do Banco Central Europeo (BCE) decidiu esta quinta feira elevar 0,25% os tipos de xuro, tal e como daba por descontado o consenso do mercado, de forma que a taxa de referencia para as súas operacións de refinanciamento situouse en 4,25%, mentres que a de depósito alcanzou 3,75% e a de facilidade de préstamo 4,5%.
"A inflación continúa diminuíndo, mais aínda se espera que siga sendo demasiado alta durante demasiado tempo", afirmou o BCE nun comunicado, onde expresou a súa determinación de asegurar que a inflación volva situarse no seu obxectivo de 2% a medio prazo.
Coa novena suba consecutiva do prezo do diñeiro, que se situou no seu nivel máis alto en 16 anos (4,25%), pasou xa un ano completo desde o comezo do actual ciclo de endurecemento da política monetaria.
"Aínda que algúns indicadores mostran signos de moderación, a inflación subxacente [a que non ten en conta os custos da enerxía e dos alimentos frescos] mantense en niveis, en xeral, elevados", afirmou o BCE.
