Batería de propostas do nacionalismo galego no Congreso para pór couto aos desafiuzamentos

A deputada do BNG no Congreso, Olaia Fernández Davila, rexistrou unha proposición non de lei no Congreso na que avoga pola reforma urxente da Lei Hipotecaria e a creación un Fondo Económico Especial para atender os casos máis dramáticos para procurar solucións ao grave problema dos desafiuzamentos.

A deputada do BNG aporta unha serie de medidas  que abranguen desde a dación en pago ou extinción do crédito coa entrega da vivenda; estabelecer un réxime especial no caso da execución de préstamos cando se refire a vivenda habitual ou negocios; contemplar moratorias para deixar o pago das cotas hipotecarias temporalmente en suspenso cando haxa circunstancias económicas adversas; estabelecer a posibilidade de poder convertir a hipoteca nun aluguer; estudar un procedemento concursal específico para permitir a paralización de certas execucións ou modificar o réxime de tasación e aumentar a porcentaxe de adxudicación ao acreedor, actualmente no 60% do valor de tasación.

A estas, engade outra achega de carácter social: habilitar un Fondo Económico Especial para atender os casos máis dramáticos, evitar o desamparo das persoas e as familias que están en situacións económicas estremas.

Davila alerta da existencia de casos verdadeiramente dramáticos, con familias e persoas que pagaron unha porcentaxe moi alta da hipoteca pero aínda así son desahuciadas”. Davila alude aos dados: os desfiuzamentos de familias aumentaron un 15% entre xaneiro e xuño, a xustiza autorizou 37.092 inmóbeis e se iniciaron 48.213 procesos de execución. Desde o ano 2007, houbo 395.000 desfiuzamentos.