O aumento de 29% da produción de enerxía agocha a caída do resto da industria galega

O índice de produción industrial (IPI) da Galiza rexistrou en febreiro de 2023 un incremento de 1,5% con respecto ao mesmo mes de 2022, mentres que no conxunto do Estado español decreceu 0,8%. Non obstante, o aumento produtivo interanual da industria no país está fortemente influenciado polo ascenso da xeración de enerxía, que medra en 28,9%, mentres que este sector tivo un modesto avance de 0,6% a nivel estatal. A industria galega ofrece 30% postos de traballo menos que a media estatal Excluíndo a influencia da enerxía, o balance da produción industrial galega non é positivo. De feito, de eliminar a achega da enerxía á taxa de variación interanual do IPI, que foi de cinco puntos porcentuais, o avance interanual da produción industrial galega ficaría nunha taxa negativa de 3,5%. Pola contra, a nivel do Estado español, onde a enerxía só tivo unha influencia de 0,1 puntos porcentuais, o resultado da variación do IPI tería unha taxa negativa de 0,9%. Alén do avance interanual da produción enerxética na Galiza no mes de febreiro, os bens de equipo (bens destinados a producir outros bens) rexistraron un avance de 7,2%, o que sumou 1,7 puntos porcentuais á taxa definitiva. Porén, os outros sectores da produción industrial tiveron un resultado interanual negativo. Desta forma, os bens intermedios (recursos materiais, bens e servizos que se utilizan para desenvolver o proceso produtivo) baixaron 14,8%, cunha repercusión negativa de 4,5 puntos porcentuais sobre a taxa final. Ademais, os bens de consumo (produto final para a venda) presentaron un decrecemento de 2,5%, e restaron 0,7 puntos porcentuais á taxa interanual. Dentro das diferentes producións enerxéticas, a eléctrica foi claramente a que sostivo o resultado interanual positivo da produción industrial galega no mes de febreiro de 2023. Así, segundo apunta o informe do Instituto Galego de Estatística (IGE) publicado esta cuarta feira sobre o IPI, "atendendo ás distintas ramas industriais o crecemento interanual en febreiro de 1,5% débese principalmente á achega positiva (9,4 puntos porcentuais) de dez ramas; as principais foron: o fornecemento de enerxía eléctrica, gas, vapor e aire acondicionado (34,1%), que achegou 4,3 puntos porcentuais á taxa interanual definitiva, e a fabricación de vehículos de motor e remolques (24,9%) que sumou un total de 2,9 puntos porcentuais ao resultado final". A industria extractiva medra 83,1% nun ano A industria extractiva foi a que máis incrementou en febreiro a súa produción na Galiza en termos interanuais, cunha alza de 83,1% con respecto ao mesmo mes do ano anterior, e unha influencia de 0,7 puntos porcentuais sobre o resultado final da taxa interanual do IPI, a terceira máis alta entre as diversas ramas industriais. Entre as subas de produción tamén destacan os apartados da fabricación de mobles (15,3%) e de bebidas (4,9%). Até 16 ramas industriais tiveron un mal resultado A produción da industria da madeira e da cortiza caeu 35% "No que respecta ás repercusións negativas de dezaseis ramas (-7,9 puntos porcentuais), as principais foron: a industria da madeira e da cortiza (-34,9%), que restou dous puntos porcentuais, e a metalurxia (-30,3%), cunha repercusión negativa de 1,2 puntos na taxa interanual", sinala o informe do IGE. A industria galega recupérase a un ritmo catro puntos inferior á media estatal De forma paradoxal, a pesar da achega da enerxía ao resultado interanual da produción industrial galega, a fabricación de material e equipamento eléctrico (-34,7%) foi a segunda rama cun peor resultado en febreiro. Entre as diversas caídas de produción destacan a fabricación de maquinaria e equipamento (-26,2%), o apartado doutras industrias manufactureiras (-23,5%), a fabricación doutro material de transporte (-17,7%), a industria química (-7,9%), a confección de roupa de vestir (-7,9%), a fabricación de produtos metálicos agás maquinaria e equipamento (-7,7%) e a reparación e instalación de maquinaria e equipamento (-6,4%). A produción industrial estatal avanzou o dobre que a galega desde o ano 2015 Por outra parte, o índice de produción industrial na Galiza situouse en febreiro en 101,7, tomando como base 100 o ano 2015. Mentres tanto, no conxunto do Estado española o IPI alcanzou 103,4, é dicir, o resultado produtivo industrial estatal avanzou o dobre do que o fixo o galego nos últimos sete anos. Repercusións no emprego As caídas na produción industrial teñen repercusións directas sobre o emprego na Galiza. Así, por exemplo, a Finsa, unha das principais empresas do sector madeireiro (o que experimenta a maior caída do IPI), acordou o pasado mes de setembro de 2022 coa representación do persoal a aplicación dun expediente de regulación de emprego temporal (ERTE) nas súas plantas galegas (as de Santiago, Padrón, Rábade e Ourense). Ademais, nos últimos 12 meses, pequenas e medianas empresas do sector sinalaron estar experimentando problemas pola fuga de madeira galega a outros territorios. Finsa presenta un ERTE que afecta 1.600 traballadores e traballadoras en Galiza Un problema que tamén se deixou ver na metalurxia (a segunda rama industrial coa peor achega á taxa interanual do IPI), onde o grupo Ganomagoga é noticia pola súa intención de despedir o seu cadro de persoal de 200 persoas traballadoras. O debate sobre a nacionalización da electricidade Mentres o avance da produción industrial da Galiza se sustenta na enerxía (a que máis achegou á taxa interanual) e na extracción de recursos (a que máis creceu en 12 meses), outros Estados dan pasos de cara á nacionalización destes sectores estratéxicos. Esta mesma semana, a sociedade estatal México Infrastructure Partners (MIP) subscribiu un acordo con Iberdrola, a través do cal o Goberno mexicano conseguiu un compromiso para que a multinacional lle venda 8.539 megawatts (MW) de capacidade instalada, que inclúen 8.436 MW en ciclos combinados de gas e 103 MW eólicos, por un importe duns 6.000 millóns de dólares (5.478 millóns de euros). 13 plantas de xeración de enerxía eléctrica, "formarán parte do patrimonio público e serán operadas pola CFE (Comisión Federal de Electricidade)", informou esta terza feira o presidente de México, Andrés Manuel López Obrador. Empresas enerxéticas públicas no seo da UE A aposta de México non é un caso illado, pois moitos Estados optan polo control de empresas nun sector estratéxico como o enerxético, mesmo no ámbito da Unión Europea (UE). Aínda que hai varios casos na UE de participación estatal na enerxía, Suecia salienta cun sector eléctrico que é practicamente 100% público.