A Administración dos EUA perdeu 20.000 millóns de dólares ao intervir Silicon Valley Bank

First-Citizens Bank &amp; Trust Company chegou a un acordo na últimas horas para a adquisición de todos os depósitos e préstamos de Silicon Valley Bridge Bank, a entidade creada pola Corporación Federal de Garantía de Depósitos (FDIC) dos Estados Unidos de América (EUA) despois da intervención do Silicon Valley Bank (SVB) o pasado 10 de marzo. Deste modo, as 17 sucursais de Silicon Valley Bridge Bank abriron esta segunda feira como oficinas do First-Citizens Bank &amp; Trust Company. A creba de dous grandes bancos dos EUA causa "pánico" nos mercados globais A FDIC estima que o custo da quebra de SVB para o seu Fondo de Seguro de Depósitos (DIF) ascende a uns 20.000 millóns de dólares (18.583 millóns de euros), aínda que a cifra definitiva determinarase cando finalice a actual administración xudicial. O acordo con First-Citizens Bank supón a compra de activos por importe de aproximadamente 72.000 millóns de dólares (66.724 millóns de euros) do Silicon Valley Bridge Bank, cun desconto de 16.500 millóns de dólares (15.291 millóns de euros), mentres que ao redor de 90.000 millóns de dólares (83.405 millóns de euros) en valores e outros activos permanecerán baixo administración xudicial a disposición por parte da FDIC. Así mesmo, a entidade administrativa recibiu dereitos sobre accións ordinarias de First Citizens BancShares, cun valor potencial de até 500 millóns de dólares (463 millóns de euros). "Sistema económico fráxil" A actual crise bancaria nos EUA ratifica que o seu sistema económico é fráxil e pode seguir sendo azoutado por tormentas económicas cada vez máis grandes e frecuentes, asegurou o premio Nobel de Economía, Joseph Stiglitz. "Creamos un sistema económico que é máis fráxil e, por tanto, máis propenso a ser bombardeado por shocks. E os impactos que experimentamos teñen efectos máis grandes", afirmou a The Washington Post. "O sistema económico por si só non se corrixe a si mesmo", afirmou Stiglitz Até 50 entidades bancarias máis dos Estados Unidos están en risco de colapso financeiro Grandes pánicos financeiros e recesións azoutaron periodicamente os EUA e, en opinión de Stiglitz, as turbulencias resultantes non son fáciles de eliminar da economía. "O sistema económico por si só non se corrixe a si mesmo cando é bombardeado por todo tipo de conmocións", remarcou o economista gañador do Nobel e que foi economista xefe do Banco Mundial entre 1997 e o 2000. Enrique Vidal, licenciado en Ciencias Empresariais e ex traballador no sector da banca durante máis de tres décadas, sinala en conversa con Nós Diario que concorda coa análise de Stiglitz. "A regulamentación bancaria é moito máis flexíbel nos EUA que na UE", afirma. "Despois da crise de 2008 estabelecéronse restricións na banca dos EUA, mais iso cambiou co anterior presidente, Donald Trump", explica. "É moito máis laxa a regulamentación na pequena e na mediana banca", di. Porén, o licenciado entende que a banca da UE non está libre das consecuencias dunha eventual crise financeira nos EUA. "Nun sistema global todo inflúe. Calquera posíbel quebra pode ter consecuencias importantes. Alguén que ten cartos nun fondo de investimento pode non saber que ten participación en accións ou en débeda subordinada dun banco e que o que lle pase inflúe sobre as súas finanzas", asevera. "A nivel financeiro o máis importante é a Confianza", explica Vidal "A nivel financeiro o máis importante é a confianza, o que a xente pensa", sinala Vidal. "Por moi forte que sexa un banco, ningún pode soportar unha retirada de fondos durante varias xornadas continuadas", engade. "Se a xente empeza a ter medo e quere retirar os depósitos non hai que o deteña", explica o ex traballador do sector da banca sobre o efecto do pánico sobre as entidades. Preocupación en Suíza pola dimensión do banco UBS Por outra parte, o Goberno suízo parece decidido a promover que se complete a compra do Credit Suisse por 3.000 millóns de francos suízos (3.035 millóns de dólares) por parte de UBS antes de fin de ano, a pesar de que se espera unha intensa oposición. Axencias financeiras baixan a "negativa" a cualificación do principal banco suízo A compra da que era a segunda maior entidade financeira suíza, o Credit Suisse, por parte do seu principal competidor e maior banco deste Estado, o UBS, non xera confianza en moitas forzas políticas deste Estado. "Suíza é demasiado pequena para ter bancos tan grandes. Debemos atopar a forma de reducir este risco", dixo Cédric Wermuth, presidente do Partido Social Demócrata, á cadea pública SRF. "Resúltame estraño que as persoas a cargo da fusión non se deran conta de que a solución que estaban a elixir era politicamente inaceptábel en Suíza", expresou ao medio suízo SWI Klaus Wellershoff, quen fora economista xefe no banco UBS. "Non é aconsellábel en ningún caso que unha transacción de relevancia sistémica sexa confrontada por 80% dos partidos políticos", detallou Wellershoff. Entre as persoas expertas en economía, unha corrente sostén que os riscos se terían diversificado dividindo o Credit Suisse en partes para vendelas a diferentes empresas financeiras do mundo, explica SWI, que tamén sinala que a pesar de existir outras opcións, o Executivo suízo priorizou manter os activos da entidade quebrada dentro do sistema bancario deste Estado. O Executivo español confía nas decisións da Unión Europea A vicepresidenta primeira e ministra española de Asuntos Económicos e Transformación Dixital, Nadia Calviño, destacou esta segunda feira que as autoridades da Unión Europea (UE) están a tomar "as decisións adecuadas, con rapidez e determinación", para evitar que as turbulencias financeiras teñan un impacto máis significativo. "O Banco Central Europeo (BCE) terá que tomar as decisións correctas conxugando adecuadamente a súa dobre responsabilidade de garantir a estabilidade dos prezos e de garantir a estabilidade financeira", afirmou. Calviño recoñece a "enorme incerteza" A vicepresidenta dixo estar "nun diálogo constante" cos supervisores e os reguladores tanto estatais como comunitarios, así como cos principais organismos internacionais, para evitar que estes episodios e estas turbulencias financeiras teñan un maior impacto. Calviño lembrou que o gobernador do Banco de España xa confirmou a fortaleza das entidades financeiras estatais. Con todo, a ministra española de Asuntos Económicos recoñeceu "o momento de enorme incerteza financeira que levou a dúbidas e especulación contra algúns bancos e mesmo tamén nesta parte do Atlántico".