O acordo UE-Mercosur, non pero si

A Xunta de Galicia acaba de facer valer ata en dúas ocasións a maioría do Partido Popular para amosar a súa postura favorable ao acordo comercial entre os países da Unión Europea e Mercosur. Por un lado, no Consello Agrario Galego, a Consellería do Medio Rural, Unións Agrarias e Asaga mostraron o seu apoio ao tratado cos países de Mercosur, mentres que o Sindicato Labrego Galego expresaba un non rotundo ao acordo, á mesma hora aproximadamente que no Parlamento galego o PP e o PSOE votaban en contra dunha proposta do BNG para rexeitar o acordo. Este apoio claro ao acordo, que permitirá unha redución ata dun 86% dos aranceis de toneladas de produtos agrícolas que entren en Galicia e en Europa, producidos con estándares moito máis baixos tanto en materia de dereitos laborais, como de seguridade alimentaria, benestar animal ou protección do medio ambiente, non semellaba para algúns coherente coa presenza de diferentes dirixentes do PP nas manifestacións de persoas gandeiras esa mesma semana. Algunha xente sorprendíase de coñecer os votos favorables ao acordo, por exemplo, das deputadas Cristina Campero Dorado ou Nicole Grueira Fernández, despois de apoiar e participar nas tractoradas xunto á presidenta do PP en Lugo, Elena Candia; o delegado da Xunta en Lugo, Javier Arias, e varios alcaldes, concelleiros e persoas moi coñecidas do PP. Nas redes sociais proliferaron as mensaxes de incredulidade pola aparente contradición da postura dos membros do PP, en resposta por exemplo aos vídeos nos que a conselleira do Medio Rural manifestaba apoiar o acordo á vez que manifestaba "dúbidas" sobre os impactos do acordo comercial, "esixindo" unhas supostas cláusulas de salvagarda que non vai haber para demandar as mesmas condicións que se piden aquí ás 99.000 toneladas adicionais de carne de vacún que se prevén importar cada ano, ás máis de 45.000 toneladas de mel, ás máis de 180.000 toneladas de carne de polo, toneladas de carne de porco, de legumes, de froitas frescas, de produtos lácteos, de fariña de soia, produtos da pesca ou despoxos comestibles e subprodutos de orixe animal, por poñer algúns exemplos. Aranceis de 0% Se lemos estes días, por exemplo, o xornal La Nación, de Arxentina, di textualmente que a UE é o bloque que máis eliminará aranceis para o ingreso de produtos e que o Mercosur excluíu do acordo 9% das súas importacións desde a UE por consideralas "produtos sensibles", como os laminados de aceiro, compoñentes do automóbil, vestido, calzado, papel, cartón, manufacturados plásticos, certos medicamentos, azucre, conservas de peixe, cremas lácteas…; e mantén aranceis altos a produtos como o leite en po, queixos específicos, algunhas bebidas alcohólicas, produtos alimenticios procesados ou os vehículos de pasaxeiros, nos que os aranceis se irán eliminando nun prazo de 15 anos, ou de 18 a 30 anos para os vehículos eléctricos, híbridos ou impulsados por hidróxeno e novas tecnoloxías. A única salvagarda bilateral (para os dous bloques) que recoñecen os países de Mercosur sería en caso de aumento imprevisto e perxudicial de importacións (a maiores do acordado) e unha diminución indebida (?) dos prezos para as persoas produtoras en Europa. Desde que o mal estea feito e con unha complexidade enorme para que se desencadeen actuacións efectivas para corrixir isto. Sinalan que iniciarán unha "investigación" se os prezos do Mercosur son polo menos un 10% inferiores aos prezos des mesmos produtos da UE, coa posibilidade de retirar temporalmente as preferencias arancelarias. Arxentina pasaría de pagar aranceis de entre 20% e 60% na carne a tributar 0%; o mel pasaría de pagar 17,3% a 0%, e a pescada, de 15% a 0% Arxentina prevé un incremento de 76% das exportacións á UE nos primeiros cinco anos de vixencia do acordo e de 122% nun horizonte de 10 anos. Na carne, por exemplo, pasarían de pagar aranceis entre 20 e 60% a tributar a partir do acordo 0%, o que entra na cota Hilton xa, e 7,5% a nova cota de 99.000 toneladas acordadas. O mel pasaría de pagar 17,3% a 0% e a pescada pasaría de tributar un 15% a 0%. As persoas produtoras enfrontarémonos a unha competencia totalmente desleal e a uns prezos ruinosos, que nos van obrigar a pechar en moitos casos, e para as persoas consumidoras incrementarase a presenza de produtos perigosos na súa alimentación e o prezo seguirá sendo o que marquen as grandes distribuidoras de alimentos. Galicia a todas luces vai ser unha das grandes prexudicadas, máxime cando o presidente Rueda xa foi ofrecer os portos galegos para que todo isto entre en Europa. "A inconsciencia das masas é unha característica fundamental aos fins dos intereses dunha clase minoritaria e propietaria, o que permitirá a instrumentalización no seu favor da forza revolucionaria do conxunto das clases explotadas e oprimidas". Con ler a Karl Marx, que viviu no século XIX, xa poderiamos entender por que se intenta instrumentalizar e manipular á xente que se mobiliza e por que se intenta debilitar a illar as organizacións de persoas traballadoras e labregas que temos unha postura clara na defensa dos nosos intereses de clase, do rural, e que neste momento estamos a dicir un non claro á venda do país e ao Acordo UE-Mercosur. Non hai contradición ningunha no PP e para falar da nova traizón do PSOE á xente traballadora fáltanme caracteres. O proceso do acordo non está finalizado dado que debería haber unha votación no Parlamento Europeo e todas as iniciativas que poidamos realizar en contra son importantes.