Abanca é unha das entidades bancarias da Unión Europea con menores ratios de solvencia

A Autoridade Bancaria Europea (EBA, polas súas siglas en inglés) sitúa Abanca entre as entidades de crédito con menos solvencia dos 26 Estados da Unión Europea (UE). O organismo regulador EBA recolle nos resultados do seu exercicio anual de transparencia, onde analiza os riscos do sistema financeiro europeo, que a entidade presidida por Juan Carlos Escotet rexistra unha ratio de capital CET1 fully leaded de 12,29%. As cifras refírense á anualidade de 2023 e elabóranse a partir dos propios datos ofrecidas polos bancos supervisados, que achegan ao regulador as súas contas do último semestre de 2022 e do primeiro semestre de 2023. A ratio de capital CET1 é o indicador de referencia para medir a fortaleza financeira dunha entidade de crédito. O mesmo fíxase marcando uns niveis mínimos de capital en función dos riscos de cada entidade, sendo maior a solvencia dun banco canta máis elevada sexa a ratio de capital CET1. Así, aquelas entidades que presentan mellores rexistros ofrecen máis garantías aos seus clientes e teñen máis posibilidades de non verse afectadas por circunstancias adversas. A este respecto, os datos de Abanca nese indicador están 0,35 puntos por baixo da media das entidades de crédito do Estado e 3,62 puntos por baixo da media da UE. Abanca só supera en solvencia no Estado a Bankiter e a Santander. A primeira das entidades presenta unha ratio de capital CET1 de 12,25% e a segunda de 12,24%, estabelecéndose a diferenza entre estes tres grupos nunha faixa de cinco centésimas. Precisamente, os referidos bancos son xunto a Caixabank, cunha ratio de capital CET1 de 12,42%, os únicos cuxo nivel de solvencia están por baixo da media estatal, manténdose nos postos de cola que xa ocupaban na anualidade de 2022. Porén, as ratios de capital CET1 destas catro entidades téñense incrementado levemente en relación ao anterior exercicio, marcando no caso de Abanca unha alza de 0,29% puntos. 33 empresas e 30% de participación pública: a sociedade mixta para proxectos enerxéticos da Xunta con Abanca ou Finsa A primeira entidade do Estado en solvencia é a vasca Kutxabank, cunha ratio de capital CET1 de 17,61%, un punto máis que en 2022. A continuación colócase a andaluza Unicaja con 13,78% e 0,9 puntos por encima da pasada anualidade, seguida da cooperativa de crédito Cajamar con 13,29%, BBVA con 12,99%, Sabadell con 12,75% e a aragonesa Ibercaja con 12,71%. A Autoridade Bancaria Europea non agocha a súa preocupación polos baixos niveis de solvencia do sistema financeiro estatal, cuxa media se atopa en 12,64%. Tanto é así que o regulador reclama maiores dotacións variábeis para facer fronte á situación do mercado. As ratios de solvencia da UE O sistema financeiro español rexistra os peores niveis de solvencia de toda a Unión Europea. Nesta liña, o regulador sinala que a ratio media de capital CET1 nos 26 Estados da UE é de 15,91%, presentando os mellores resultados Malta con 21,32%, seguido de Islandia con 20,63% e Estonia con 19,82%. Unhas cifras moito máis modestas pero por encima da media comunitaria tenas a banca de Alemaña cun nivel de solvencia de 16,40%, dos Países Baixos con 16,11% e de Francia con 16,02%. A este respecto, a saúde do sistema financeiro alemán é outros dos grades problemas da economías da zona euro, como exemplifica a situación do Deutsche Bank, un dos primeiros bancos do país e da UE, que moitos analistas consideran en quebra técnica. A banca grega, austríaca, húngara, italiana e portuguesa aparece tamén cuns niveis de solvencia por baixo da media comunitaria. Así, a ratio media de capital do sistema financeiro de Grecia é de 14,22%, de Austria de 15.07%, de Hungría de 15,43%, de Italia de 15,79% e de Portugal de 15,84%. Neste sentido, as entidades italianas e portuguesas levan arrastrando problemas durante as dúas última décadas, preocupando especialmente a Autoridade Bancaria Europea o caso de Italia. Neste punto, o regulador leva alertando desde 2014 do estado contábel de varios grupos financeiros, como a Banca Monte dei Paschi di Siena, a entidade máis antiga do mundo fundada en 1472. Abanca compra a entidade portuguesa EuroBic Os focos de risco O informe presentado pola Autoridade Bancaria Europea advirte de focos de risco para a banca como consecuencia das continúas subas dos xuros no último ano e medio, que levou a incrementar as taxas dos tipos de 0% a 4,5%. A este respecto, o supervisor apunta a que “a rendibilidade podería desacelerarse no medio dunha baixa demanda de préstamos e un crecemento moderado dos activos, e a medida que o financiamento se encarece, afectará negativamente os ingresos. Os xa elevados gastos administrativos tamén crecerán no medio da presión sobre os salarios e as deterioracións poderían aumentar potencialmente”. O regulador bancario considera que as entidades de crédito do espazo comunitario beneficiáronse nos pasados exercicios da política monetaria expansiva impulsada desde o Banco Central Europeo (BCE) logrando resultados históricos, pero alerta de que o prezo máis alto do diñeiro freará esa dinámica. Así, asegura que “os bancos retardaron notabelmente a súa actividade crediticia. Este efecto foi máis pronunciado nos préstamos hipotecarios, xa que a demanda de compra de vivendas diminuíu e os bancos endureceron os seus estándares crediticios. A desaceleración do crédito podería crear un círculo vicioso negativo sobre as dinámicas de crecemento”. Abanca e Santander controlan máis de 70% do negocio bancario galego O sistema financeiro galego presenta un elevado nivel de concentración. Só seis entidades bancarias controlan 95% do negocio no país, unas cifras que o sitúan á cabeza da Unión Europea (UE). Tanto é así que os números rexistrados na Galiza só son superados no espazo comunitario por Grecia, cunha concentración de 97%. Neste panorama, destaca o papel de dominio de Abanca, seguida a unha importante distancia por Santander, a entidade con menor ratio de solvencia de todo o Estado español. Abanca triplica os beneficios e gaña 428,6 millóns de euros até setembro Abanca é o primeiro operador financeiro da Galiza. A entidade, propiedade do grupo venezolano Banesco, conta con 43% das oficinas bancarias do país, dous puntos máis que a suma de Santander, Caixabank e BBVA, os seus máis directos competidores no negocio bancario galego. Asemade, presenta unha cota de mercado de arredor de 40%, atendendo a porcentaxe de depósitos e créditos, e participa do capital de empresas como Pescanova ou Monbus. Santander é a segunda entidade do país en taxa de depósitos e oficinas. O grupo, xestionado pola familia Botín, posúe 15% das sucursais bancarias, a mesma cifra que Caixabank, e unha cota de mercado de perto de 28%. A súa posición explícase pola absorción en 2018 do Banco Popular, que en 2012 tiña adquirido o Banco Pastor, a histórica entidade da familia Barrié con sede na Coruña, que controlaba entre 18% e 20% do crédito galego. Abanca e Santander, que custodian máis de 71% dos aforros das galegas e dos galegos, rexistran algunhas das perores cifras de solvencia da banca na Unión Europea.