A exclusom social

A exclusom social Trás a crise de 2008, o crescimento económico dos anos prévios à Covid, e a recuperaçom do mesmo após a epidemia, deu lugar a umha importante reduçom da taxa de desemprego no conjunto do Estado e também na Galiza. Desta forma a taxa de desemprego situa-se na atualidade por baixo da metade dos níveis alcançados entre 2012 e 2015. Menos de 10% frente a mais de 20%. Porém a taxa de desemprego, ainda se situa ligeiramente por riba dos valores prévios à crise de 2008. Tampouco se alcançou o volume de emprego prévio e mesmo o número de pessoas ativas se reduziu. No conjunto do Estado o número de pessoas ocupadas si é claramente superior ao dos anos prévios à crise de 2008, embora a taxa de desemprego se mantenha em níveis mais elevados fruto do incremento das pessoas ativas. Emprego Porém, esta melhora do mercado laboral nom deu lugar a umha melhora das condiçons de vida do conjunto da populaçom da mesma magnitude. A publicaçom do último informe de Foesssa referido ao conjunto do Estado vem lembrar-nos que a recuperaçom está deixando atrás parte da populaçom. Desta forma em 2024 a percentagem de pessoas em situaçom de exclusom severa segue sendo claramente superior à de 2007. Em 2024 há 1,7 milhons de pessoas mais em situaçom de exclusom social severa que em 2007, quase 40% mais. A taxa de exclusom social aumentou 3 pontos, afetando a mais de 9 milhons de pessoas. O conceito de exclusom social de Foessa nom se refere exclusivamente à pobreza económica (monetária) senom que tem em conta outros âmbitos da vida social: emprego, consumo, participaçom política, educaçom, saúde, vivenda, conflito social e isolamento social. A exclusom está associada na maior parte dos casos ao desemprego. Estám em situaçom de exclusom social 8 de cada 10 fogares nos que a sustentadora principal nom tem emprego, em mais da metade destes casos trata-se de exclusom social severa. Agora bem, ter um emprego nom garante a integraçom, 10% das pessoas empregadas estám em situaçom de exclusom. As características do mercado emprego criado, a precarizaçom do mercado laboral, tem muito a ver com este fenómeno que se vem cobrando cada vez mais relevância nos Estados centrais nas últimas décadas: ter emprego já nom é garantia de sair da pobreza. Vivenda O informe de Foessa pom de manifesto que um dos âmbitos nos que a exclusom se está deixando sentir em maior medida é o da vivenda, tanto polo aumento do número de pessoas sem morada como polo crescente sobreesforço que supom fazer frente aos custos do aluguer ou da hipoteca. A percentagem dos ingressos familiares dedicados ao aluguer nom deixou de crescer. Na atualidade supera 70% nas famílias em situaçom de probreza severa. Ademais nom deixou de medrar o número de pessoas que para ter vivendas recorrem a soluçons que suponhem umha deterioraçom da qualidade de vida: vivendas com falta de equipamentos básicos, sobrelotaçom de pessoas, situaçons de insalubridade… Também no caso da saúde é assinalável a existência dum alto nível de pessoas com dificuldades para fazer frente a compra de medicamentos ou as despesas derivadas de dietas. Ter um emprego nom garante a integraçom, 10% das pessoas empregadas estám em situaçom de exclusom Desde 2007 produziu-se um incremento da desigualdade intergeracional. A exclusom social severa aumentou de jeito significativo nos segmento mais novos da populaçom, enquanto se reduzia nos de maior idade. Em 2024 a taxa de exclusom social severa duplicou-se na infância em comparaçom com 2007. Nas pessoas entre 18 e 29 anos essa taxa cresceu 70%. Também pode observar-se um incremento das diferenças entre os lares encabeçados por mulheres, mais afetados pola crise da Covid, e aqueles que tenhem um home como sustentador principal. Por outra parte a exclusom afeta em muito maior medida à populaçom nom comunitária, concretamente a exclusom social afeta-os quatro vezes mais que à populaçom comunitária. Ademais desde 2007 a taxa de exclusom severa sofreu um forte crescimento. O informe de Foessa pom de manifesto que a pesar do crescimento económico, da reduçom do desemprego, a pobreza e a exclusom social som fenómenos estruturais, consubstanciais ao nosso modelo de sociedade. Esse modelo de sociedade, diriamos nós, fruto do processo de mundializaçom do capitalismo e da extensom e radicalizaçom das políticas neoliberais, abraçadas tanto polos partidos conservadores como polos socialdemocratas, no espaço comunitário.