As 44 primeiras compañías eólicas con sede social na Galiza empregan 40 persoas

As corenta e catro primeiras empresas eólicas con sede social na Galiza ocupan 40 persoas no país. Segundo os datos recollidos no Ardán, o informe de referencia sobre o sistema empresarial galego que elabora o Consorcio da Zona Franca de Vigo e que ofrece información de todas as compañías con enderezo no país cuxa facturación superou os 250.000 euros, en 2021 -último ano con cifras-, as principais sociedades enerxéticas galegas empregaron un total de 40 persoas. A sede social A información achegada polo relatorio do Consorcio da Zona Franca de Vigo non incorpora datos daquelas sociedades dedicadas á xeración eólica con actividade na Galiza, pero con sede social en Madrid. Neste sentido, non achega cifras de emprego de moitas das compañías dos principais operadores enerxéticos con presenza no país, como pode ser o caso de Iberdrola ou o de Acciona. Porén, nestes casos, os traballos de mantemento son realizados a maioría das veces por empresas subcontratadas asentadas no país. As compañías eólicas aumentaron o pasado ano os seus ingresos na Galiza en 75%, até os 1.989,6 millóns de euros As empresas eólicas xeran moi pouco emprego. De feito, o primeiro grupo galego de produción de electricidade de orixe renovábel, o coruñés Ecoener, declarou en 2021 un total de 53 traballadoras e traballadores e uns ingresos totais de 51,2 millóns para 82 sociedades que conforman a compañía, con actividade na enerxía eólica, na hidráulica e na solar. Neste caso, a corporación ten carácter multinacional, está presente en 10 Estados de Europa e América e cotiza no Ibex 35. O primeiro accionista e presidente da mesma é Luis de Valdivia, investigado en relación coa trama eólica do Goberno de Manuel Fraga. Beneficios máximos As baixas cifras de ocupación do sector eólico contrastan cos elevados beneficios. A este respecto, o informe Ardán, analizando as contas presentadas polas primeiras 44 empresas eólicas galegas no rexistro mercantil, sinala que os ingresos por traballador en 2021 situáronse en 1,2 millóns de euros, ficando o valor engadido bruto (VEB) por empregado en 719.363 euros. Tamén apunta que a rendibilidade económica desas compañías na referida anualidade atopábase en 16,6% e a rendibilidade financeira, en 28,6%, o que significa que por 100.000 euros investidos o beneficio era de 28.600 euros, unha contía moi superior ás diferentes áreas de negocio. Emprego local Os datos achegados polas propias empresas veñen confirmar o avanzado por diferentes estudos. A este respecto, un informe publicado polo Banco de España, titulado Do renewables create local jobs?, sinala que os parques eólicos non crean emprego naqueles concellos onde se instalan. Nesta dirección, apunta que "non atopamos incrementos de emprego nos meses próximos á apertura de parques eólicos nos municipios onde se sitúan as instalacións". Os concellos galegos con eólicos cuadriplican a media estatal O relatorio, obra da catedrática da Universidade Carlos III Natalia Fabra e dos investigadores do Banco de España Eduardo Gutiérrez, Aitor Lacuesta e Roberto Ramos, estuda o impacto das instalacións renovábeis sobre o emprego en 3.200 concellos e conclúe que as plantas eólicas "non crean emprego nos municipios onde se instalan". Engade que as instalacións solares "aumentan o emprego pero non das persoas residentes nos concellos" onde se localizan. A economista da Universidade de Santiago de Compostela (USC) Rosa Regueiro comenta a Nós Diario que “as actividades enerxéticas son intensivas en capital mais non en emprego. Nunca o foron”. Nesta dirección, afirma que “na fase de construción dos parques, precísase máis man de obra, unha man de obra rotativa e inestábel, e nos traballos de mantemento, menos emprego, que, pola contra, é máis estábel e sostido no tempo”. Regueiro esixe máis rigor á hora de fixar as persoas ocupadas neste sector. Así, destaca que “desde a patronal eólica achegan cifras de emprego indirecto no sector que só se manteñen co obxectivo de engordar as cifras de ocupados para darlle máis relevancia á eólica en termos de emprego”. Unha estratexia industrial O profesor de Historia e Institucións Económicas da USC Adrián Dios explica a Nós Diario que “o sector eólico non xera emprego”. Nesta liña, indica que “o importante non é máis produción eólica hoxe, senón máis desenvolvemento industrial, polo que precisamos unha estratexia industrial, dentro da cal debemos incorporar a planificación eólica cunha visión estratéxica, para que esta contribúa ao proceso de desenvolvemento industrial do país”. A Xunta tomba o parque eólico Soesto, entre Laxe e Vimianzo, polo seu impacto na fauna A economista da USC María Cadaval entende que “no sector atopamos moitas empresas que teñen a súa sede social fóra da Galiza e que xeran moi pouco emprego no país. O importante é saber quen xera emprego, cando se produce e onde radican os postos de traballo creados”. A industria auxiliar eólica atópase en crise permanente AGaliza contou a comezos do presente século con máis de 5.500 traballadoras e traballadores nas empresas auxiliares do sector eólico. Firmas galegas como LM Composites, Emesa, ou Norvento e, tamén, foráneas como Vestas ou Gamesa, protagonizaron este proceso. Porén, a existencia destas compañías non significou a existencia dun sector empresarial ligado á enerxía eólica terrestre. O canon eólico recada 4% menos que hai cinco anos malia haber 31 parques máis O gran desenvolvemento da eólica nos últimos anos estivo acompañado do desmantelamento da industria de compoñentes asociada a esta actividade. Precisamente, neste contexto situouse o fechamento nos dous últimos anos de LM Composites nas Pontes (Eume), de Vestas en Viveiro (A Mariña) ou de Siemens-Gamesa nas Somozas (Ferrolterra). De feito, o cese de actividade de Vestas implicou a perda de 133 empregos e o de Siemens-Gamesa, de 200. GRI Towers A última compañía en sumarse a este proceso foi GRI Towers. A empresa con sede no Carballiño presentou na semana pasada un Expediente de Regulación Temporal de Emprego para a totalidade do seu cadro de persoal, conformado por 330 persoas. A sociedade fundada en 2004 é propiedade do grupo vasco Gonvarri.