43 colectivos alertan das perdas de 25,7 millóns no sector marisqueiro en 2022

Até 43 colectivos ecoloxistas, sociais, sindicais e do mar asinaron esta quinta feira unha declaración conxunta na que denuncian o "devalo produtivo" das rías galegas e culpan directamente a Xunta da Galiza da situación que se traduce "nunha considerábel redución da produción e rendibilidade". 43 colectivos culpan a Xunta do "devalo produtivo" da ría de Arousa, que perdeu en 2022 dous terzos da produción de ameixa Tomando como referencia a media de capturas anual entre 2002 e 2021, sinalan que o pasado ano experimentouse unha caída de até dous terzos nas vendas de ameixa babosa, fina e rubia, e que no berberecho, pola súa parte, perdeuse un cuarto. "Se tomamos como referencia a media de euros ao ano dos pasados vinte anos e tendo en conta a diminución do valor do euro derivada da inflación, as perdas en lonxa do conxunto da Galiza en 2022 elévanse a 25,7 millóns de euros, e a 14,1 millóns na ría de Arousa", precisan os asinantes. Os permisos de marisqueo pasaron de 6.551 en 2001 a 3.614 en 2022, denuncian as organizacións Esta situación repercute, salientan, "nos ingresos das miles de familias" que dependen do sector marisqueiro. "Este devalo produtivo afecta directamente aos postos de traballo: en 2001 tiñamos na Galiza 6.551 permisos de marisqueo (Permex), e no ano 2022, temos 3.614", alertan. Sobre os motivos da perda de produtividade dos bancos marisqueiros, o biólogo e investigador Xaquín Rubido, en declaracións a Nós Diario, explica que "precisamente unha das cousas que estamos exixindo á Xunta desde hai moitos anos é a necesidade de facer un estudo en profundidade e multidisciplinar que analice esas causas". Segundo Rubido, "o devalo produtivo dos bivalvos é provocado por unha mestura de factores". Porén, di, "hai dous problemas clave ao tratarse de augas interiores, a contaminación e tamén a temperatura das augas, mais principalmente o primeiro". "Precísase abordar o problema desde a raíz para ter un diagnóstico. Para poder implementar medidas a medio prazo hai que ter un estudo. O plan de rexeneración que pedimos é pola urxencia de salvar os postos de traballo e as campañas, sobre todo as dúas vindeiras", afirma. Situación na ría de Arousa Os colectivos asinantes da declaración alertan concretamente, alén do problema en todo o país, da situación que se está experimentando na ría de Arousa, onde a especie máis afectada é a ameixa babosa, pois en 2022 o seu volume de vendas minguou até as 176 toneladas, por valor de 3,2 millóns de euros. Son apenas un terzo das capturas anuais das dúas últimas décadas (574 toneladas de media) e supoñen unha perda de 6,6 millóns de euros. Tan só na ría de Arousa as vendas caeron en 14,1 millóns de euros, din os asinantes A situación repítese coa ameixa fina, que pasou de representar 342 toneladas e 9,6 millóns de euros de media a 134 toneladas e 4 millóns. No caso da ameixa rubia, a produción pasou de 342 toneladas e 9,6 millóns de euros a 134 toneladas e 4 millóns. A respecto do berberecho (sen ter en conta a confraría de Carril), advirten dunha caída da produción desde unha media de 724 toneladas e 3,7 millóns de euros a 553 toneladas e 3,5 millóns. Xaquín Rubido: "Moitos dos buques con mercadorías perigosas teñen bandeiras de conveniencia e non cumpren a normativa europea" "O banco marisqueiro dos lombos do Ulla [na ría de Arousa], un indicador fundamental, non ten nada, a semente do marisco ao chegar a certo tamaño morre, ese é o problema, e téñense que investigar cales son as causas", afirma o biólogo Xaquín Rubido. Xaquín Rubido: "A Xunta aposta por outro modelo sen dar un debate público" O biólogo e investigador Xaquín Rubido afirma que a Xunta "en todos estes anos de devalo produtivo nos que vimos pedindo medidas e non se toman, ao mesmo tempo que abandona as súas competencias, está impulsando, incluso con apoio económico e mediático, iniciativas que son contrarias aos intereses do mar, posto que por exemplo, as minas non van traer nada bo para as rías galegas, nin a de San Finx nin a de Touro". Rubido sinala a acuicultura industrial como unha ameaza para o sector do mar. "Estarán esperando a que as concesións marisqueiras vaian a menos e a que a xente abandone porque non lle dá para vivir, e nese momento, introducirán a acuicultura industrial", alerta. "Están apostando por outro modelo sen nin sequera sacalo ao debate público", denuncia. Simposio de técnicos Por outra parte, nesta quinta feira tivo lugar o Simposio de Técnicos de Marisqueo, decorrido en Santiago de Compostela e que tivo como obxectivo intercambiar coñecementos relacionados coa xestión e o estudo dos recursos marisqueiros ao amparo da rede entre o sector e os organismos científicos da Galiza, Redemar. No simposio abordáronse cuestións relacionadas coa rexeneración de bancos marisqueiros, coa dinámica e avaliación das poboacións de distintos recursos e co seguimento de variábeis ambientais, así como metodoloxías e procedementos no campo. Ría do Burgo Os concellos afectados pola dragaxe da ría do Burgo exixen que se cumpran os prazos de execución Ademais, tamén nesta quinta feira, o deputado do BNG no Congreso español, Néstor Rego, mantivo unha reunión no porto de Oza co patrón maior da confraría da Coruña, Javier Mariñas, na que instou o Goberno estatal a facerse cargo do mantemento das axudas ao sector marisqueiro "mentres duren as tarefas de sementeira e até a recuperación da capacidade produtiva". O quilo de sardiña chegou a cotizar esta quinta feira a oito euros A sardiña tamén foi protagonista esta quinta feira, ao alcanzar os oito euros o quilo nas peixarías da Praza de Lugo, na Coruña, no día antes de San Xoán. O responsábel de Mariscos Abad, Gonzalo Abad, explicou que os prezos foron máis ou menos similares a hai un ano, mais que se prevé que hoxe o quilo suba a entre 10 e 15 euros. Tamén na Coruña, Teri Ceán sinalou que na súa peixaría a sardiña atopábase a entre sete e oito euros, mentres que a de tamaño pequeno, a que "é case 'parrocha'" estaba a seis euros.