Xosé Mosquera, presidente da Federación Galega de Tenis: "Nos estamos dispostos a permitir dúas afiliacións na nosa Federación"
—Está na presentación dun torneo internacional que prestixia o tenis galego. Que lle parece?
Cando cheguei á Presidencia da Federación propúxenme a internacionalización do tenis galego. Que houbese na Galiza torneos internacionais de distintas categorías. É dicir, de mocidade nova como é a de Sub-14, de júniors -que xa había-, de absolutos ou sénior, que se foron incorporando.
Tamén os femininos, aínda que tiñan menos demanda inicialmente, e outros impulsados polos clubs, como é neste caso o que realiza o Club de Tenis Pontevedra..
Hoxe xa temos unha oferta internacional que abre un pouco todos os espectros da competición. Para que? Pois para, por un lado, darlle a oportunidade aos xogadores e ás xogadoras galegas de competir aquí sen moverse e sen ter que asumir gastos de desprazamento.
Polo outro, que observen esta competición, que é a anterior á do circuíto internacional e previa á categoría profesional. Foi o percorrido que realizou no seu momento, por exemplo, Jessica Bouzas.
—O éxito de Jessica Bouzas e de Martín de la Puente incrementou as licenzas neste deporte?s licenzas nos últimos anos foron crecendo. Por unha parte polas referencias e pola outra polos programas que propuxemos desde a Federación. Un exemplo foi o denominado 'Corresponsábeis de igualdade', que o que pretendía era estender este deporte entre aquelas persoas que non participaban del.
Na actualidade xa non hai ese programa, pero este ano, o próximo especialmente, temos unha modalidade deportiva recentemente incorporada que é o pickleball, que vai axudar tamén a crecer en licenzas.
—Hai uns días criticou a “captación de licenzas” por parte da RFET. Solucionouse ese tema?
Aínda non tivemos unha reunión a nivel estatal. Hai que ter en conta que, evidentemente, as licenzas son unha parte importante dos nosos recursos para facer actividades, axudar aos xogadores e ás xogadoras e mesmo dar algunha axuda directa a aqueles que teñen gastos en desprazamentos para participar en eventos internacionais.
Como é unha competencia autonómica da Xunta da Galiza non entendemos que desde a Federación Española se propuxese unha afiliación á parte sen contar con nós. Non estamos dispostos a que un xogador faga dúas afiliacións. Ademais, sabemos que na plataforma creada para a Federación Española achegan datos moi persoais... algo pouco acertado, penso eu. Por exemplo, demandan o número de DNI e mesmo o número de conta.
—Que motivos tivo a Federación Española para crear esa plataforma virtual?
Creouse, en principio, para substituír unha plataforma anterior onde se xestionaban todos os torneos. A empresa que o levaba deixouno e agora a actual non recolle os datos das federacións e solicita incorporalos de novo. Nestas empresas, ao final, está sempre o interese económico de conseguir beneficios.