Os xogos de azar vinculados ao deporte volven con forza ás rúas galegas

Numerosos estudos nacionais e internacionais, e mesmo a propia Organización Mundial da Saúde (OMS), recoñecen a mocidade como un dos colectivos máis castigados emocionalmente pola pandemia da Covid-19. Sensación de perpetua soidade nunha etapa vital onde resulta crucial a socialización, ansiedade, depresión, consumo de alcohol e drogas, prácticas compulsivas vinculadas a actividades como o xogo e mesmo suicidios son algúns dos devastadores efectos que o primeiro ano do coronavirus deixou entre unha xuventude que non poucas veces se viu demonizada publicamente pola sociedade e polos medios de comunicación. Neste escenario, o fútbol representa para a meirande parte dos mozos e mozas unha vía de escape que, ante a imposibilidade de practicalo nas tradicionais pachangas ou de asistir a partidos ao vivo, trae como consecuencia que as casas de apostas deportivas, "configuradas xa como un vehículo de socialización" previo á pandemia da Covid-19 entre a mocidade, especialmente a masculina, "aumenten a súa relevancia", segundo explica Juan Lamas, director terapéutico da Asociación Galega de Xogadores Anónimos (Agaxa) e director técnico da Federación Española de Xogadores de Azar Rehabilitados (Fexar). "Non é o mesmo estar só diante da pantalla do ordenador que aquí", di Juan, un rapaz coruñés de 19 anos ataviado cunha elástica branquiazul ás portas dun deses locais de xogo mentres apura as últimas caladas a un pitillo segundos antes de que dese comezo o Celta B-Deportivo do pasado domingo 14 de marzo, e no que o conxunto dos seus amores xogaba as súas últimas esperanzas de clasificarse para o play-off de ascenso á Segunda División. Cando o chifre do colexiado sinala o inicio do que -facendo alarde de retranca galega- parte da afección celeste denominou como 'O noBo derbi', bulimos á mesma velocidade coa que propulsou a cabicha do cigarro ao chan cos seus dedos cara ao interior do local de apostas deportivas. Pertencente a unha casa de xogo que exerce como patrocinadora oficial do Dépor -até o punto de lucir o seu logo na manga das camisetas ou en diferentes publicacións nas redes sociais do club-, no mesmo mestúranse organicamente a zona das apostas co concepto dun local de hostalaría convencional no que chama a atención tanto que non se poidan pagar as consumicións con tarxeta de crédito como que os prezos sexan moito máis que competitivos, o que supón outro incentivo para a rapazada dunha terra como a galega na que o paro xuvenil se aproxima perigosamente á cifra de 30%, segundo datos da última Enquisa de Poboación Activa (EPA). Unha nova 'heroína' para os barrios obreiros do país O derbi remata cun 0-3 favorábel ao conxunto branquiazul e o local baléirase case na súa totalidade rapidamente. Tanto Juan -nome cambiado a petición expresa do protagonista- como os seus tres amigos abandonan o local cun sorriso na boca tanto polo resultado do Deportivo como polos cartos extra que gañaron apostando a favor dos seus. Non resulta difícil imaxinar que en Vigo, onde as casas de xogo non proliferaron con menos forza que na cidade herculina, o cadro para os apostadores resultaría moito máis escuro. Por todas estas razóns, o director terapéutico de Agaxa considera que o xogo é unha sorte de "heroína" do século XXI que se estende especialmente "nos barrios obreiros, onde a xente ten menos cartos, e, por tanto, máis necesidade de conseguir diñeiro". "O sector sabe a quen dirixirse, pois o dono de Inditex non ten necesidade de recibir ningún premio, pero os sectores menos favorecidos non atopan outra saída, así que véndenlle esa mensaxe de que poden saír dunha situación económica máis ou menos desagradábel a través dun golpe de sorte", apunta Lamas. Na mesma liña se expresa Antonio Rial, doutor en Psicoloxía Social da USC, quen denuncia a "anestesia social xeneralizada" que parece existir ante a cuestión do xogo. "61% dos pais e nais saben que os seus fillos e fillas xogan. Iso significa que hai unha normalización e unha aceptación neste tema, que se ve tamén nos constantes anuncios de apostas durante a retransmisión dos partidos, que logo maquillan dicindo 'xoga con responsabilidade', que é como dicir 'métete unha raia de coca, pero con responsabilidade'", conclúe.