Vinte atletas da Galiza, catorce mulleres e seis homes, viaxarán esta fin de semana até a localidade catalá de Sabadell para participar no Campionato de España Sub-20. Do total de participantes destaca a presenza da actual campioa de España desta categoría, a internacional Xiana Lago.
A deportista do Ría Ferrol tentará revalidar o título que conseguiu en 2022 en Antequera (Andalucía) cando conseguira unha marca de 12.05 metros no concurso de peso.
Outras atletas que poderían subir ao podio son Lucía Sánchez, da Escola Atlética Lucense, actual subcampioa de España de Péntatlon; a atleta do Celta Carlota Salgado, no mesmo concurso; e a pontevedresa da Ximnástica Isabel Caiero, na proba dos 3.000 metros.
Tamén estarán a internacional Diaou Diallo, do Ría Ferrol, e a lucense Enma Sihuang. Ademais, haberá que prestar atención á actuación da plusmarquista galega absoluta dos 100 metros, Ainhoa Reparaz, do Val Miñor, que sobre o dobre hectómetro, o ano pasado, lograba o bronce no Sub-18.
Por último, tamén competirán en Catalunya Mario Rodríguez, do Celta, nos 3.000 metros; Fernando Vallines, do Maderas Barcia Lourenzá, en peso, e Xoel Noguerol, do Mazí.
Campionato de España Máster
Outra das citas importantes desta fin de semana será o Campionato de España Máster de pista cuberta, que decorrerá en Antequera, Málaga (Andalucía) desde hoxe e até o domingo.
A delegación galega estará presente en oitenta e dúas probas co pensamento posto en superar as trinta e cinco medallas que trouxo o ano pasado.
Entre as principais apostas figuran o campión mundial dos 3.000 marcha, Juan Manuel Morales, do Marineda; o corredor en 60 e 200 metros Miguel Gómez do Celta; e nos valos, altura e péntatlon Juan Luis Paz, do Atletismo Narón.
Especial seguimento merecen tamén os plusmarquistas mundiais de relevos 4×800, Domingo Álvarez e Pablo Fervenza, do Samertolameu, e Nemesio Gutiérrez, do Friol, que competirán en medio fondo e fondo.
Por último, na categoría feminina, será a multiplusmarquista mundial, Esther Pedrosa, quen lidere as representantes galegas participando nas probas dos 800 metros, 1.500 metros e 3.000 metros na categoría F-60.
