Iker Gil, Xabi Campos... as estrelas da nova xeración dourada do Deportivo xuvenil

O conxunto xuvenil do Deportivo da Coruña está gozando dunha gran tempada na División de Honor do fútbol galego. O conxunto dirixido por Miguel Figueira está líder do grupo galego con catro puntos de vantaxe co Celta de Vigo, segundo clasificado, e con tan só unha derrota en 19 partidos de liga. A cifra de vitorias elévase até as 14, e tan só catro empates. Na outra competición da categoría sub-19, a Copa do Rei, o equipo galego logrou entrar na Final Four tras eliminar o Tenerife. Agora terá por diante as semifinais contra o Barcelona, e en caso de pasar esperaría na final o gañador entre Betis e Celta de Vigo. O obxectivo: alzarse campión tras cinco anos de espera. O Fabril peta na porta do primeiro equipo tras o seu gran rendemento No caso de rematar primeiros no seu grupo da División de Honor, o Deportivo pasaría á Copa de Campións; no caso de non conseguir o primeiro posto do seu grupo, tamén podería clasificarse como mellor segundo dos sete grupos totais que conforman a categoría. A última vez que o conxunto branquiazul logrou este fito foi na tempada 2020/2021, nunha xeración con nomes como David Mella e Yeremay Hernández. O equipo coruñés chega nun gran momento grazas á combinación de dous factores: un gran deseño táctico de Miguel Figueira, cun sistema que alterna o 4-3-3 co 3-5-2 que permite ao conxunto coruñés ser moi distinto entre partido e partido; e unha gran base de xogadores con moito talento. Manuel Pablo confía no xuvenil O técnico do filial está demostrando esta tempada que confía nos rapaces do xuvenil, tanto nos rapaces que xa xogaron a tempada pasada como algúns que entraron na categoría este ano. Algúns deles abandonaron o club neste mercado, como foi o caso de Rubén Fernández, que foi traspasado ao Valencia Mestalla. O dianteiro debutou en Terceira Federación co Fabril e incluso logrou marcar un gol. Hai até sete xogadores do xuvenil que lograron estrearse co Fabril esta tempada. Excluíndo o caso de Rubén Fernández, o primeiro en vestir a indumentaria do segundo equipo do Deportivo foi Pablo Cortés. O xogador fichado do Real Zaragoza este verán empezou a tempada con ficha do xuvenil, pero xa debutou co Fabril fronte ao Coruxo e inscribírono co equipo de Terceira Federación tras o seu gran rendemento. O seguinte na lista foi Areosa, que debutou na goleada do Fabril contra o Atlético Astorga por catro goles a cero, e que xa suma doce partidos co filial nesta campaña. Os xuvenís do Deportivo que se proclamaron campións estatais na tempada 2020-21. (Foto: RC Deportivo) Na novena xornada de liga foi o momento do debut de Malick Ndiaye. O central foi co conxunto de Manuel Pablo tras as numerosas baixas do Fabril en defensa, mais o senegalés non puido desfrutar cunha vitoria no seu primeiro partido e o conxunto coruñés caeu por dous goles a un ante a UD Ourense. Só puido sumar minutos nun encontro máis, até o momento. Outro dos que se estrearon nese partido foi Iker Gil, que saíu desde o banco no minuto 64 para tratar de axudar o equipo a remontar o partido. Ao igual que Xabi Campos que tamén fixo o seu debut entrando desde o banco de suplentes fronte ao Langreo, nun partido onde Manuel Pablo só lle deu seis minutos e non gozou de máis minutos, aínda que foi convocado para un partido máis. O último dos xogadores que debutou co Fabril foi Hugo Torres. O lateral do conxunto branquiazul entrou por primeira vez nun partido do filial na xornada 11, no partido fronte ao Sámano. O deportivista aproveitou a oportunidade e deu unha asistencia para o quinto gol do conxunto de Manuel Pablo. As grandes promesas do Deportivo xuvenil No equipo que xoga na División de Honor do fútbol galego hai grandes talentos que aínda non gozaron de minutos co filial, malia demostrar estar nun estado de forma moi bo. Un é o caso dos dous porteiros, Leiva e Regueiro. Anxo Regueiro xogou 11 partidos esta tempada co equipo de Miguel Figueira e conseguiu deixar a portaría a cero até en sete ocasións. Por outra banda, Rodrigo Leiva tan só xogou oito partidos, pero a media de partidos sen conceder ningún gol é máis alta. Neses oito partidos, ao Deportivo tan só lle marcaron gol en dúas ocasións. Polo tanto, iso fai unha media de 0,25 de portarías imbatidas, é dicir, tres portarías a cero de cada catro encontros, fronte á media de 0,36 de Anxo Regueiro. Na liña defensiva, dous dos grandes talentos do equipo xuvenil son Guillermo Pastoriza e Iker Fernández. Pastoriza conta con 17 partidos totais dos 18 disputados, é dicir, unha peza inamovíbel para Miguel Figueira. No caso de Iker Fernández, entre sancións e algún partido que perdeu por molestias, o xogador disputou 15 partidos. Entre os dous conforman a base da defensa cando o equipo xoga con catro na última liña e os dous xogadores laterais cando xoga con liña de tres. No centro do campo o xuvenil do conxunto coruñés ten unha calidade por enriba do normal na categoría. Xogadores como Lucas Castro con 12 goles que o converten no máximo anotador do equipo ou Alvaro Mesía con 7 tantos, marcan a diferenza ofensiva do equipo no aspecto goleador malia non xogar na dianteira. Na liña ofensiva, Figueira conta con bos goleadores como Miguel De Labra, con 7 tantos. Unha xeración que recorda á de Yeremay, Mella e Noel López Esta xeración de grandes futbolistas ten características similares coa xeración de Yeremay Hernández, David Mella e Noel López, entre outros. A xeración deses xogadores estivo no Xuvenil A do Deportivo na campaña 2020/2021, cando logrou gañar a Copa de Campións. Este cadro de xogadores contaba na portaría con Adrián Pereda e Brais Suárez. Pereda disputou 10 partidos, conseguindo en todos portarías a cero. Marchou do Dépor ao ano seguinte, fichando polo Vilarreal xuvenil. Esta tempada está xogando no Zamora CF de Primeira Federación. Pola súa banda, Brais Suárez disputou nesa tempada 11 partidos logrando non encaixar gol en oito deles. Ao ano seguinte sube ao Fabril e na actualidade aínda está nas filas do Deportivo e xoga no filial de Terceira Federación baixo o mando de Manuel Pablo, tras estar hai dous anos unha tempada cedido no Calahorra, club rioxano de Terceira Federación. A gran figura da defensa naquela tempada foi Dani Barcia, que disputou 23 partidos e conseguiu incluso tres goles. O central subiu ao filial na seguinte tempada, e agora xoga no primeiro equipo da Liga Hypermotion, sendo bastante protagonista na defensa coruñesa. No centro do campo o nome propio daquel equipo era Mario Nájera, que xogou 23 partidos e marcou 17 goles. Tamén subiu ao Fabril na seguinte tempada, pero na 24/25 foise cedido ao Logroñés de Segunda Federación. Os nomes que máis destacan a día de hoxe dese equipo son Yeremay Hernández e David Mella, que son dúas das estrelas do primeiro equipo esta tempada en Segunda.