Uxía Romero, de ser a última escollida nos xogos do colexio a campioa estatal de halterofilia

Esta fin de semana, Uxía Romero —a moza barbadesa que xa se alzara como subcampioa de Europa júnior en 2023— proclamouse campioa absoluta de España na categoría de 63 kg durante o Campionato estatal decorrido en Zaragoza, levantando 183 kg. Fíxoo grazas ao ouro en dous tempos e ao ouro no total olímpico, aos que sumou o bronce en arrancada. Con 20 anos, esta atleta do CH Ourense consolídase como unha promesa que xa é realidade. "Non me esperaba poder gañar o campionato máis grande a nivel estatal, e moito menos no estado no que chegaba", explica. A vitoria foi unha recompensa inesperada: “As que chegan cando menos o esperas son as máis bonitas'". A galega Uxía Romero, subcampioa de Europa júnior de halterofilia A pesar do dobre ouro e tamén do bronce, a halterófila asegura que non foi a súa mellor competición en termos de marcas. Porén, afirma con rotundidade: "Dei o cen por cen do que podía dar". Esta preparación, di, non foi doada, especialmente no plano mental: sentía que precisaba “volver empezar de cero e reconectar coa miña halterofilia". Un dos momentos máis difíciles da competición, segundo relata, foi xusto antes de subir á tarima. “Custoume visualizar o que quería facer”. A nivel emocional, o seu maior reto era volver desfrutar do proceso, recuperar a alegría do escenario, "volver gozar na tarima", asegura. No plano persoal, Romero destaca unha evolución importante respecto a anteriores competicións. Comezou a introducir traballo de meditación e visualización nos adestramentos, o que a axudou a mellorar a confianza en si mesma. “Penso que foi un punto moi positivo e que me axudou moito”, explica. A preparación do campionato estivo condicionada tamén pola coincidencia co período de exames universitarios. Cursando Enfermaría, reduciu as sesións de nove a seis e fixo unha baixada de peso “máis agresiva do que me gustaría”, sinala. O eco do subcampionato europeo logrado en outubro pasado segue presente na súa traxectoria O eco do subcampionato europeo logrado en outubro pasado segue presente na súa traxectoria. Romero confesa que, tras aquela medalla, tivo dificultades para xestionar a presión e as expectativas, tanto externas como propias: "Desde ese momento o meu rendemento baixou bastante. Nunca agardei que os títulos internacionais chegasen tan rápido, e non estaba preparada para xestionalo”, admite. Forza e talento galego no Europeo júnior e sub-23 de halterofilia da man de Uxía Romero e Irene Blanco Tamén pesa o feito de ser considerada unha das grandes promesas da halterofilia galega e estatal. “Estou intentando aprender, pouco a pouco, a converter e transformar esa presión en motivación e en algo positivo”, reflexiona. No tocante ao panorama actual da halterofilia feminina, Romero destaca o crecemento do nivel e da participación de mulleres, sobre todo na Galiza. "Hai máis nivel en mulleres que en homes", apunta, e cada vez “hai máis nenas que nenos iniciándose no deporte. Preferiría unha distribución equitativa sempre”. Con todo, reclama un maior recoñecemento da halterofilia como disciplina para todos os xéneros. Malia que a rutina se viu condicionada polos estudos, intentaba manter mañás de estudo, tardes de adestramento e camiñatas finais para desconectar. Porén, ademais do innegábel esforzo físico e mental de Uxía, no seu éxito hai outra parte fundamental: os seus adestradores. “Quero agradecerlles todo o tempo, esforzo, enerxía, recursos e gañas que poñen en min. Non deixan que me afunda, nin nos momentos máis difíciles”, di agradecida. Así mesmo, o seu círculo familiar e de amizades tamén foi esencial. “Ultimamente paseino bastante mal e ter xente ao meu carón, sempre dispostos a escoitar e a apoiarme en todas as decisións, en cada paso, en todos os sacrificios… foi esencial para non derrubarme”, explica. Nese senso, o agradecemento máis fondo de Uxía Romero é para a súa nai. “Encantaríame poderlle agradecer todo o especialmente empática, comprensiva e compasiva que sempre se amosa, esforzándose ao máximo para que eu estivese tranquila”. En canto ás fontes de inspiración, Romero regresa á súa infancia. Confesa que nunca destacou en deportes e que era a última en ser escollida para os xogos no colexio. "Cando atopei este deporte, souben que tiña que aproveitar a oportunidade", explica. A súa motivación vén, precisamente, desa nena que quería demostrar que tamén podía gozar dun deporte e destacar nel. Conciliar a vida académica co deporte de alto nivel tampouco está a ser doado. Tivo que tomar decisións complicadas e renunciar a tempo de lecer, mais sente que, por agora, mantén un equilibrio que lle permite seguir vivindo na súa cidade, coa súa familia, algo que valora moito. No curto prazo, o seu obxectivo é tan claro como humilde: "Volver facer halterofilia como se non vise nunca unha barra", di. Está nun proceso de descanso e reconexión, pero xa pensa no Europeo Júnior de Albania, previsto para finais de outubro. Quere competir sen presións, centrada no proceso. E si, tamén soña cos Xogos Olímpicos: "Creo que todos os deportistas que chegan a certo nivel o soñan. Se non o fan, non son o suficientemente ambiciosos", sentencia Romero. "A técnica corríxese, o importante é a actitude", afirma Romero Antes de rematar, lanza un consello para as rapazas que queiran iniciarse na halterofilia: "Que desfruten, que lle boten ganas e rabia. A técnica corríxese, o importante é a actitude". Galiza, unha potencia halterófila O Campionato Estatal Abstoluto decorrido a pasada fin de semana en Zaragoza chegaba cunha novidade. A Federación estatal decidirá elevar as marcas mínimas de clasificación polo que o número de participación descendera, “mais o nivel aumentou, sen dúbida”, expresan desde a Federación Galega de Halterofilia. Cada comunidade autónoma participante tiña un límite de 20 deportistas (10 mulleres e 10 homes). A Federación Galega conseguira clasificar a 10 homes e 9 mulleres mais, finalmente, só puideron acudir 8 representantes de cada sexo. Así, na categoría masculina participaron Tiago Larramendi (65), Víctor Castro (65), Alejandro Méndez (71), Iván Ramírez (71), Diego Vera (79), Jacobo Montero (88), Martín Liste (88) e Javier Rodríguez (+110). A halterofilia galega perde o seu principal evento O equipo feminino conformárono Ruth Fuentefría (48), Irene Martínez (63), Uxía Romero (63), Noelia Bacariza (69), Amy Abelleira (77), Paula Canedo (77), Digna Silo (86) e Irene Blanco (86). Ademais de Romero, ao podio tamén subiron Ruth Fuentefría (bronce nos 48), Irene Martínez (prata nos 63), Irene Blanco (ouro nos 86), Digna Silo (prata nos 86), Víctor Castro (ouro nos 65), Tiago Larramendi (bronce nos 65) e Javier Rodríguez (ouro nos +110).