Tres camiños, un mesmo obxectivo: así chegan os equipos galegos aos oitavos da Copa

Esta terza e cuarta feira añá continúan a súa andaina na competición copeira os equipos galegos. O Club Ourense Baloncesto será o primeiro en facelo ante o Sant Antoni, da Segunda FEB, e despois será a quenda do Obradoiro e do Básquet A Coruña, que xogan o mesmo día contra o Peñas Huesca da Segunda FEB e o Tizona Burgos de Primeira FEB, respectivamente. Cómpre sinalar que os tres conxuntos galegos militan na Primeira FEB, tamén coñecida como LEB Ouro, a segunda categoría do baloncesto español, mais estes chegan en situacións ben distintas entre eles. Por unha banda, temos o Ourense: os de Moncho López figuran en novena posición na liga –última praza que permite o acceso aos playoffs– e tras seis partidos, dous menos que os outros dous galegos, suman catro vitorias e dúas derrotas, cunha racheira positiva de dúas vitorias seguidas. Na fase anterior venceron o Cartaxena da súa mesma categoría por 90 a 77. O Ensino chega ao paro de seleccións logo dun comezo de tempada espectacular Despois, temos o Obradoiro. Os santiagueses, dirixidos por Diego Epifanio, atópanse en terceira posición na competición ligueira, na que tras oito partidos suman un total de seis vitorias e dúas derrotas contra Grupo Alega Cantabria e Hestia Menorca nas primeiras xornadas. Non obstante, a boa nova disto é que o equipo suma xa unha racheira de seis vitorias de modo consecutivo. Na Copa estatal gañaron na fase anterior ao Oviedo Club Baloncesto, equipo co que comparten categoría, por 76 a 82. Xa en último lugar, temos o Básquet A Coruña, que se postula como o equipo do baloncesto galego máis en forma do momento. Os dirixidos por Carles Marco atópanse primeiros na táboa da liga e aínda non coñecen a derrota na presente tempada: oito vitorias en oito partidos xogados. Na fase anterior da competición copeira impuxéronse por 68 a 77 aos seus rivais de categoría, Hestia Menorca. "Estamos con boa mentalidade, adestrando ben, intentando ter os pés no chan para cada día mellorar un pouquiño", dicía o técnico de Badalona na rolda de prensa previa á súa última vitoria ante o Melilla Baloncesto, 101 a 89. O estado dos rivais Como vimos sinalando, Ourense, Obradoiro e A Coruña enfróntanse a Sant Antoni, Peñas Huesca e Tizona Burgos, respectivamente. Polo tanto, é fundamental a análise destes equipos de cara aos enfrontamentos que veñen. Así, en primeiro lugar temos o Sant Antoni; o equipo ibicenco atópase como sexto clasificado da categoría de bronce do baloncesto estatal. Nela suman en sete partidos un total de catro vitorias e tres derrotas. O equipo vén dunha racheira negativa con dúas caídas de modo consecutivo. Non obstante, na fase previa obtiveron unha pelexada vitoria por 94 a 92 ante o Cantabria, da Primeira FEB, sentando así un precedente claro: aquí pode gañar calquera. O seguinte dos equipos é o Peñas Huesca. Os aragoneses atópanse nunha situación similar ao Sant Antoni, que figuran sétimos na competición ligueira, un posto por debaixo dos de Ibiza. Aliás, suman en sete partidos tamén catro vitorias e tres derrotas, sendo dúas delas nos dous últimos partidos. Na fase dos dezaseisavos obterían a vitoria por 95 a 82 ante o Albacete Basket, actualmente segundo clasificado da súa mesma categoría. Alba Sánchez-Ramos: "A Malata é a nosa sexta xogadora, moitos equipos xa saben o difícil que é vir a Ferrol" O terceiro e último dos rivais é o Tizona Burgos, compañeiro de categoría dos tres equipos galegos. Estes son o único dos seis equipos analizados que presenta unha racheira negativa: en oito partidos suman tres vitorias e cinco derrotas, cuns resultados marcados pola irregularidade e catro partidos sen coñecer a vitoria. Na Copa estatal pasaron de fase tras derrotar o CB Zaragoza, penúltimo clasificado do seu grupo da Segunda FEB, por 78 a 92. A dificultade do formato Se algo caracteriza a Copa estatal é o atractivo formato que a competición presenta. A competición foi creada a tempada pasada coa finalidade de fusionar as competicións Copa Princesa e Copa LEB Prata. Tras o primeiro ano, a competición sufriría unha modificación no formato que leva a participación dun total de 45 equipos, os 28 que conforman os grupos este e oeste da Segunda FEB e os 17 equipos que compoñen a Primeira FEB. Na fase previa do formato, xa disputada, víronse as caras os 28 equipos de Segunda FEB, de todos eles, só a metade (14), pasarían a seguinte fase dos dezaseisavos de final nas que estes equipos se mesturaron cos 17 equipos de Primeira FEB, dando lugar aos actuais oitavos de final. Tras estes virán os cuartos e despois terán lugar as semifinais, nas que os equipos se enfrontarán nunha Final Four en sede única, pendente de determinar, saíndo así o futuro campión. A dureza vén marcada polo factor de que todas as eliminatorias se xogan a partido único e no campo do rival de categoría máis baixa, presentando un formato similar ao da Copa de fútbol e que permite que os equipos máis pequenos poidan dar de que falar na competición. No caso de que os equipos compartan categoría, o factor cancha decídese polo extraído primeiro no sorteo. O Obradoiro xa rozou a gloria na posta de largo da Copa O Obradoiro Clube de Amigos do Baloncesto xa sabe o que é estar aquí, nesta nova competición. O conxunto de Félix Alonso García foi subcampión da copa a tempada pasada, na súa primeira edición. Os de Compostela caerían na competición ante o San Pablo Burgos por un contundente 97 a 69, no que o arxentino do conxunto burgalés, Gonzalo Corbalán, foi MVP. Os dirixidos polo brasileiro Bruno Savignani foron os campións da primeira edición da competición, obtendo así na 2024-2025 un histórico dobre campionato, pois foron os primeiros clasificados da Primeira FEB, o que lles permitiu o ascenso directo á Liga ACB tras tres tempadas na LEB Ouro. Non obstante, polo momento, os resultados non acompañan os de Burgos, pois figuran como penúltimos da ACB con só unha vitoria nun total de sete partidos. Como vimos sinalando, na primeira edición os de Santiago estiveron ás portas do ceo tras firmar unha excelente fase de grupos coa que selaron o seu pase a cuartos, onde se imporían ao Real Valladolid na eliminatoria a ida e volta e despois, na Final Four, ao Betis Baloncesto por 86 a 71. Está por ver se desde o Obradoiro son quen de facerse coa competición este ano.