Tony Pérez: “O ‘Flat Track’ é o que máis emociona do motociclismo"

—Que representa para vostede lograr o ouro no Campionato Nacional de Flat Track de Portugal? Para min significou bastante por varios motivos. Levo catro anos practicando esta disciplina e até o de agora sempre corría por libre, competía nunha carreira aquí e noutra alá. O club Motard de Chaves deume a oportunidade de federarme e para min foi moi importante, porque me permitiu acceder a esta competición que xa goza de certo prestixio. —O ‘Flat Track’ aínda é unha disciplina pouco coñecida no mundo do motor. Por que cre que ten menos visibilidade que outras especialidades do motociclismo? Non é tan recoñecido como o motocross. Entendo que non hai tanto pilotos que compitan nesta especialidade na Galiza, mais é unha mágoa que non se promova máis. Levamos un par de anos sen ter unha competición importante no país. Hai uns anos o ‘Flat Track’ estaba en proceso de expansión, pero por falta de recursos esa dinámica positiva detívose. Desde o meu punto de vista, é unha disciplina moito máis emocionante que outra calquera, e aquí hai sitios para correr; o problema é que non hai apoio institucional. —Cal foi o maior reto durante a competición? O máis complicado é que non todos os circuítos da competición son iguais e que non os coñeces todos. Ademais, entre as seis carreiras que puntuaban ás veces aparecían novos competidores por sorpresa que non correran antes e que engadían máis presión. O máis difícil foi loitar contra dous rivais bastante duros, especialmente contra un piloto portugués bastante forte que se chama Renaldo. Competir con el si que me custou bastante, tiven que conservar a cabeza fría e manter o ritmo nas últimas tres carreiras porque había pouca diferenza de puntos entre nós, aínda que xa cara ao final logrei desmarcarme e sacar vantaxe. —Como e cando chegou ao ‘Flat Track’? Que lle chamou a atención desta disciplina fronte a outras modalidades do motor? Cheguei a esta disciplina grazas a un amigo meu que me propuxo participar nunha carreira de ‘Flat Track’ que se celebraba en Salceda de Caselas (comarca de Vigo). Ao principio tiven que facer un pequeno investimento para comprar unhas pinas e unhas rodas, e a partir de aí entrei de cheo no vicio do ‘Flat Track’. Até ese momento eu practicaba motocross como afección, pero desde que coñecín este mundo non volvín ao motocross xa. —O motociclismo adoita estar moi ligado ao equipo humano. Que importancia ten para vostede a preparación física e o traballo en equipo nun título coma este? Non teño moito tempo para adestrar. Ás veces intento correr e facer bicicleta para gañar fondo, mais o principal adestramento é enriba da moto probando circuítos. O club Motard de Chaves foi moi importante para min, foron eles quen contactaron comigo para que puidese correr con eles. Estaban buscando pilotos porque este club se iniciou este mesmo ano no ‘Flat Track’. A través dun contacto da Federación chamáronme e chegamos a un trato. Eles están orgullosos de min e eu deles, porque me apoiaron en todo o que necesito. —Como ve o presente e o futuro do ‘Flat Track’ e do motociclismo na nosa terra? Véxoo moi cru. En todo o ano só hai unha carreira firme de ‘Flat Track’ na Galiza, que organiza o club Papaia desde hai dúas décadas aquí no Porriño, e de feito este ano eu son partícipe no cartel. Este ano si que houbo unha sorpresa porque apareceu unha segunda carreira do campionato galego en Carballo (Bergantiños) que se celebrará o 13 de setembro. Ogallá no futuro haxa máis carreiras. En Portugal competimos seis ou sete galegos porque aquí non hai competición. —O motociclismo tamén ten un compoñente de risco elevado. Como xestiona o medo, a concentración e a seguridade nunha disciplina tan exixente? O medo deixoo de lado porque ao estar na carreira céntraste no circuíto. Si que é certo que nas primeiras competicións sentes máis respecto por correr, pero o medo desaparece canto máis adestras. Cando tes confianza na moto e en ti mesmo, o medo desaparece. —Despois de lograr este ouro, cales son os seus próximos obxectivos? Pensa en consolidarse a nivel internacional ou en reforzar a súa traxectoria na península? O meu próximo obxectivo é volver participar no mesmo campionato o ano que vén na mesma categoría (250 cc³). Despois, para dentro de dous, teño pensado dar o salto á categoría máis alta. Mais agora quero volver sentirme cómodo porque teño pensado cambiar un par de elementos na moto. Imos buscar unha moto máis moderna, con outro tipo de pinas, e avanzar. Se te estancas, os teus rivais non se deteñen. O meu club vai querer facer melloras para intentar volver levar o título.